1 Afei ɔbaa dɛ ebusuasantsen a wɔaba do no mu mba pii enntum anntse ɔhen Benjamin ne nsɛm no ase, osiandɛ ber a ɔkasaa kyerɛɛ no nkorɔfo no nna wɔyɛ mbofra nkakraba ntsi wɔanngye hɔn egyanom no hɔn amambra no enndzi.

2 Wɔanngye dza wɔakã a ɔfa owusoɛr anaa dza ɔfa Christ ne mbaa ho no enndzi.

3 Na afei osian hɔn ekyingye ntsi woenntum anntse Nyame n’asɛm ase; na hɔn akoma pirimii.

4 Na wɔamma woennuma hɔn, eso wɔanndɔm asɔr no. Na wɔyɛ nkorɔfo a hɔnho nntsew osian mbrɛ hɔn gyedzi tse ntsi, na wɔtsenaa wɔ hɔn honam su nye hɔn bɔn tsebew mu dɛmara dze kɔr ewiei, na wɔammpɛ dɛ wobosũ afrɛ Ewuradze hɔn Nyankopɔn.

5 Na afei Mosiah n’ahendzi aber do no nna hɔn dodow nndu Nyame no nkorɔfo no hɔn mu fã mpo; na mbom ɔnam etuatsew a ɔbaa enuanom no mu no ntsi wɔdɔree.

6 Na ɔbaa dɛ wɔdze ndaadaasɛm daadaa hɔn a wɔwɔ asɔr no mu pii, na wɔmaa wɔyɛɛ bɔn pii; dɛm ntsi okehiaa dɛ hɔn a wɔwɔ asɔr no mu na wɔyɛɛ bɔn no wɔkã hɔn enyim.

7 Na ɔbaa dɛ wɔdze hɔn baa asɔfo no na akyerɛkyerɛfo no enyim, na woyii hɔn maa asɔfo no na asɔfo no so dze hɔn baa Alma a ɔyɛ sɔfopanyin no enyim.

8 Afei nna ɔhen Mosiah ama Alma tum dɛ ɔnhwɛ asɔr no do.

9 Na ɔbaa dɛ nna Alma nnyim biribiara a ɔfa hɔn ho; na mbom adasegyefo pii gyee dase tsiaa hɔn; nyew, nkorɔfo gyinaa gyee dase wɔ hɔn emumuyɛdze pii ho.

10 Afei nna adze a ɔtse dɛm biara nnsii da wɔ asɔr no mu; dɛm ntsi Alma haaw wɔ no sunsum mu na ɔmaa wɔdze hɔn baa ɔhen no enyim.

11 Na ɔsee ɔhen dɛ: Hwɛ, nyimpa dodow a yɛdze hɔn aba w’enyim ha yi, hɔn enuanom agye dase etsia hɔn; nyew, wɔayɛ emumuyɛdze ahorow pii. Na wonnu hɔnho wɔ hɔn emumuyɛ ho; dɛm ntsi yɛdze hɔn aba w’enyim, ama ebu hɔn fɔ dɛ mbrɛ hɔn bɔn tse.

12 Mbom ɔhen Mosiah see Alma dɛ: Hwɛ, murummbu hɔn atsɛn; dɛm ntsi medze hɔn hyɛ wo nsa ma ɔwoara ebu hɔn atsɛn.

13 Na afei Alma no sunsum tseetsee bio wɔ no mu; na ɔkɔree na okebisaa Ewuradze dza ɔnyɛ wɔ asɛm yi ho, osiandɛ osuro dɛ ɔbɛyɛ bɔn wɔ Nyame enyim.

14 Na ɔbaa dɛ aber a ohue ne kra nyinara maa Nyame no, Ewuradze ne ndze baa ne nkyɛn see dɛ:

15 Nhyira akã wo, Alma, na nhyira akã hɔn a wonumaa hɔn wɔ Mormon esu mu no so. Woehyira wo osian gyedzi mbordo a enya wɔ m’akowaa Abinadi ne nsɛm ho no ntsi.

16 Na nhyira akã hɔn so osian hɔn gyedzi mbordo a wonyae wɔ nsɛm a ekãa kyerɛɛ hɔn no ntsi.

17 Na nhyira akã wo osiandɛ akyekyer asɔr wɔ dɔm yi mu; na wɔbɔdɔr na wɔbɛyɛ mo nkorɔfo.

18 Nyew, nhyira akã nkorɔfo a wɔagye ato mu dɛ wɔbɛgye me dzin; na wɔdze me dzin bɛfrɛ hɔn; na wɔayɛ medze.

19 Na osiandɛ ebisa me biribi a ɔfa mbratonyi ho ntsi, nhyira akã wo.

20 Ɔwo nye m’akowaa; na menye wo edzi ahyɛmu dɛ ibenya onnyiewiei nkwa; na ɔwo ebɔsom me na anantsew wɔ me dzin mu, na edze mo nguan aboa ano.

21 Na nyia obetsie me ndze no bɛyɛ mo guan; na ɔno na gye no wɔ m’asɔr mu, na mo so mebɛgye no.

22 Na hwɛ, iyi nye m’asɔr; na obiara a wonuma no no, wobonuma no akɔ nnuho mu. Na obiara a ebɛgye no no bɛgye me dzin edzi na ɔno na medze no bɔn bɛkyɛ no kwa.

23 Na Emi na mafa wiadze bɔn nyinara ato mo do; na Emi na mobɔɔ hɔn; na Emi na mema hɔn a wɔgye me dzi kɔ ewiei no bea wɔ m’abanyimfa.

24 Na hwɛ, me dzin mu na wɔafrɛ hɔn; na sɛ wohu me a wobefir aba, na woebenya tsenabew a onnyiewiei wɔ m’abanyimfa.

25 Na ɔbɛba dɛ aber a totorobɛnto a otsĩa ebien no bɔbɔ mu no, hɔn a wonnyim me no befir aba ebegyina m’enyim.

26 Na aber no na wobohu dɛ Emi nye Ewuradze hɔn Nyankopɔn no a meyɛ hɔn Pomfo; na mbom wɔrommpon hɔn.

27 Na mebɛse hɔn dɛ minnyim hɔn; na wobefi hɔ akɔ daapem ogya a woesiesie ama abɔnsam nye n’abɔfoe no mu.

28 Dɛm ntsi, mese hom dɛ, nyia onnketsie me ndze no, dɛm nyimpa noara so na mma hom nngye no nnto m’asɔr mu, na dɛm nyimpa no merenngye no wɔ da a odzi ewiei no mu.

29 Dɛm ntsi mese wo dɛ, Kɔ; na obiara a ɔbɛyɛ bɔn etsia me no, hwɛ bɔn a ɔayɛ no ho na bu no atsɛn dɛ mbrɛ ɔsɛ; na sɛ ɔkã no bɔn wɔ ɔwo na Emi enyim na onu no ho nokwar mu wɔ n’akoma mu a fa kyɛ no, na Emi so medze bɛkyɛ no.

30 Nyew, mber dodow biara a mo nkorɔfo bonu hɔnho no, medze hɔn mfom a wɔayɛ etsia me no bɛkyɛ hɔn.

31 Na hom so hom mfa hom bɔn nkyekyɛ homho nkorkor; na nokwar mese wo dɛ, nyia ɔammfa ne nyɛnko no bɔn annkyɛ no wɔ aber a ɔakã dɛ oenu noho no, dɛm nyimpa no dze noho ahyɛ afɔbu mu.

32 Afei Mese wo dɛ, Kɔ; na nyia a oennu noho wɔ no bɔn ho no, dɛm nyimpa no mma wɔnnkan no mmfora mo nkorɔfo; na iyi hom nhyɛ no nsew fitsi aber yi dze kɔ.

33 Na ɔbaa dɛ aber a Alma tsee dɛm nsɛm yi no ɔkyerɛwee too hɔ ama ɔdze eesie na ɔdze ebu nkorɔfo a wɔwɔ asɔr no mu no atsɛn dɛ mbrɛ Nyame ne mbrasɛm no tse.

34 Na ɔbaa dɛ Alma kɔree na okobuu hɔn a wɔayɛ emumuyɛ no atsɛn, dɛ mbrɛ Ewuradze n’asɛm se.

35 Na hɔn a wonuu hɔnho na wɔkãa hɔn bɔn no, hɔn na ɔkaan hɔn foraa asɔrmba no.

36 Na hɔn a wɔannkã hɔn bɔn na woennu hɔnho wɔ hɔn emumuyɛ ho no, ɔannkan hɔn ammfora asɔrmba no, na ɔpepaa hɔn edzin.

37 Na ɔbaa dɛ Alma hyehyɛɛ asɔr no mu dwumadzi nyinara; na wɔhyɛɛ ase bio nyaa asomdwee na wɔyɛɛ prɔmprɔm mbordo wɔ asɔr no dwumadzi nyinara mu, wɔnantseew nyimdzee mu wɔ Nyame enyim, wonyaa dɔm pii, na wonnumaa pii so.

38 Na afei dɛm ndzɛmba yi nyinara na Alma nye n’edwumayɛfo a wɔhwɛ asɔr no do no yɛe, wɔnantseew enyimpi do, kyerɛkyerɛɛ Nyame n’asɛm no wɔ adze nyinara mu, wohun amandze ahorow pii, na hɔn a wɔnndɔm Nyame n’asɔr no tseetsee hɔn ara yie.

39 Na wɔbɔɔ hɔn enuanom no kɔkɔ, na hɔnara so nyaa kɔkɔbɔ fii Nyame n’asɛm mu, obiara dɛ mbrɛ no bɔn tse, anaa bɔn a ɔayɛ, na Nyame hyɛɛ hɔn dɛ wɔmbɔ mpaa aber nyinara, na wɔnda ase wɔ adze nyinara mu.