1 Ket ita napasamak a kimmaro ti panangidadanes nga inaramid dagiti saan a mamati iti simbaan ta nangrugi nga agtanabutob ti simbaan, ken yaasugda kadagiti dadauloda maipanggep kadaytoy a banag; ket immasugda ken ni Alma. Ket indatag ni Alma ti parikut iti arida, a ni Mosiah. Ket kinasarita ni Mosiah dagiti saserdotena.

2 Ket napasamak nga impaiwaragawag ni ari Mosiah iti aglawlaw ti daga a nasken nga awan ti asino man a saan a mamati ti mangidadanes iti asino man a kameng ti simbaan ti Dios.

3 Ket adda naiget a bilin iti amin a simbaan a nasken nga awan ti mangidadanes kadakuada, a nasken nga adda panagpapatas ti amin a tao;

4 A nasken a saanda nga ipalubos a riribuken ti kinapalangguad wenno kinapangas ti kappiada; a nasken a raemen ti tunggal tao ti kaarrubana a kas iti bagina, nga agtrabahoda babaen iti bukoda nga ima para iti pagbiagda.

5 Wen, ken nasken nga agtrabaho amin dagiti saserdote ken mannursuroda babaen iti imada nga agpaay iti pagbiagda, iti amin a kasasaad malaksid iti sakit, wenno iti nalabes a kinakurang; ket iti panagaramidda kadagitoy a banag, naglablabonanda iti parabur ti Dios.

6 Ket nangrugi manen ti makapnek a kappia iti daga; ket nangrugi nga immadu ti tao, ket nangrugida a nagwaras iti ganggannaet a rabaw ti daga, wen, iti amianan ken iti abagatan, iti daya ken iti laud, nagbangonda iti dadakkel a siudad ken purok iti amin a suli ti daga.

7 Ket sinarungkaran ken pinarang-ay ida ti Apo, ket nagbalinda a dadakkel ken babaknang a tao.

8 Ita naibilang dagiti lallaki nga annak ni Mosiah kadagiti saan a mamatpati; ken kasta met a naibilang kadakuada ti maysa kadagiti lallaki nga annak ni Alma, isu a nanaganan iti Alma, a naipasurot iti amana; nupay kasta, nagbalin a nadangdangkes ken managrukbab iti didiosen a tao. Ket isu ti tao nga aduan iti balikas, ket nagsao iti adu a pammatiray-ok kadagiti tattao; ngarud naiturongna ti adu a tao a sumurot kadagiti kinadangkesna.

9 Ket nagbalin a dakkel a tubeng iti panagdur-as ti simbaan ti Dios; taktakawenna ti puspuso dagiti tattao; mangar-aramid iti nalabes a panagsusuppiat dagiti tattao; mangmangted iti gundaway iti kabusor ti Dios a mangaramat iti bilegna kadakuada.

10 Ket ita napasamak a bayat ti panagsursorda a mangdadael iti simbaan ti Dios, ta sillimed a nagsursor a kaduana dagiti lallaki nga annak ni Mosiah tapno mangdadael ti simbaan, ken tapno maisiasi dagiti tattao ti Apo, a maisupadi kadagiti bilin ti Dios, wenno uray pay ti ari—

11 Ket kas nasaokon kadakayo, bayat iti panagsursorda a summupiat maibusor iti Dios, kitaen, maysa nga anghel ti Apo ti nagparang kadakuada; ket bimmaba a kasla adda iti ulep; ket nagsao a kasla gurruod ti timekna, a nakaigapuan ti panaggungon ti daga a nagtakderanda;

12 Ket nalaus unay ti siddaawda, ta natuangda iti daga, ket saanda naawatan dagiti balikas nga insaona kadakuada.

13 Nupay kasta immawag manen, a kinunana: Alma, bumangonka ket tumakderka, ta apay nga idadanesmo ti simbaan ti Dios? Agsipud ta kinuna ti Apo: Daytoy ti simbaanko, ket ipatakderko; ket awan ti makaparmek kadaytoy, malaksid iti panaglabsing dagiti tattaok.

14 Ket manen, kinuna ti anghel: Kitaen, nangngeg ti Apo dagiti kararag ti taona, kasta met dagiti kararag ti katulonganna, ni Alma, nga isu ti amam; agsipud ta nagkararag a napnuan iti pammati maipanggep kenka tapno maibagnoska iti pannakaammo iti pudno; ngarud, daytoy ti panggepko nga immayak tapno ipapatika iti bileg ken turay ti Dios, tapno masungbatan dagiti karkararag dagiti katulonganna a mayannurot iti pammatida.

15 Ket ita kitaen, mabalusingsingmo kadi ti bileg ti Dios? Agsipud ta kitaen, saan kadi dinayyeg ti timekko ti daga? Ken saannak kadi a makita iti sangom? Ket siak ti nabaon a naggapu iti Dios.

16 Ita kunak kenka: Mapanka, ket laglagipem ti pannakaadipen dagiti ammam iti daga a Helam, ken iti daga a Nephi; ken laglagipem dagiti napintas a bambanag nga inaramidna kadakuada; ta adipenda idi, ket winayawayaanna ida. Ket ita kunak kenka, Alma, mapankan, ket saanmon a panggepen pay a dadaelen ti simbaan, tapno masungbatan dagiti kararagda, ket daytoy uray pay a mapapanawka.

17 Ket ita napasamak a dagitoy ti naudi a balikas nga insao ti anghel ken ni Alma, ket pimmanawen.

18 Ket ita natuang manen ni Alma ken dagiti kaduana iti daga, agsipud ta nalaus ti panagsiddaawda; agsipud ta nakitada a mismo kadagiti matada ti anghel ti Apo; ket kasla gurruod ti timekna, a nangdayyeg iti daga; ket ammoda nga awan ti asino man malaksid iti bileg ti Dios a mabalin a mangdayyeg iti daga ken manggunggon a kas agrengngat daytoy.

19 Ket ita napaumel ni Alma gapu iti nalaus a siddaaw, ket saanna maungap ti ngiwatna; wen, ket kimmapsut, nga uray la a saanna makuti dagiti imana; ngarud innala dagiti kaduana, ket awan gawayna a binagkatda, agingga a naipaiddada iti sango ti amana.

20 Ket inulitda iti amana ti amin a napasamak kadakuada; ket nagrag-o ti amana, agsipud ta ammona a bileg dayta ti Dios.

21 Ket imbilinna nga aguummong a sangsangkamaysa ti pangen tapno imatanganda ti inaramid ti Apo para iti anakna, kasta met para kadagidiay kakaduanna.

22 Ket imbilinna nga agtitipon a sangsangkamaysa dagiti saserdote; ket rinugianda ti nagayuno, ken nagkararag iti Apo a Diosda nga ungapenna ti ngiwat ni Alma, tapno makapagsao, tapno pumigsa met dagiti saka ken imana—tapno maluktan ti mata dagiti tattao ket makita ken maammuanda ti kinaimbag ken kinatan-ok ti Dios.

23 Ket napasamak kalpasan ti panagayuno ken panagkararagda iti las-ud ti dua nga aldaw ken dua a rabii, pimmigsa dagiti saka ken takiag ni Alma, ket timmakder ken rinugianna ti nakisao kadakuada, kiddawenna ida a maaddaanda iti liwliwa:

24 Ta, kinunana, nagbabawiakon iti basbasolko, ket sinubbotnakon ti Apo; kitaenyo naipasngayak iti Espiritu.

25 Ket kinuna ti Apo kaniak: Saanka masdaaw nga amin a sangkatauan, wen, lallaki ken babbai, amin a pagilian, puli, pagsasao ken tattao, nasken a maipasngay manen; wen, maipasngay iti Dios, mabaliwan manipud iti nailubongan ken pannakatnag a kasasaad, iti kinalinteg a kasasaad, a sinubboten ti Dios, nga agbalin nga lallaki ken babbai nga annakna;

26 Ket kastoy ti panagbalinda a baro a parsua; ket malaksid no aramidenda daytoy, pulos a saanda matawid ti pagarian ti Dios.

27 Kunak kadakayo, malaksid no kastoy ti mapasamak, nasken a mapatalawda; ket ammok daytoy, gapu ta dandaniak met a naiwalin.

28 Nupay kasta, kalpasan ti ilalasatko iti adu a rigat, nagbabawiak a dandani iti ipapatay, nakita ti Apo babaen iti asina a rumbeng a maikanadaak a maagaw manipud iti pannakauram nga agnanayon, ket naipasngayak iti Dios.

29 Nasubbot ti kararuak manipud iti kaaddak iti pait ti apro ken kawar ti kinadangkes. Addaak idi iti kasipngetan a derraas; ngem ita makitak ti nakaskasdaaw a lawag ti Dios. Ti karuruak ket nairaked iti agnanayon a pannakatuok; ngem naagawak, ket awanen ti saem iti kararuak.

30 Linaksidko ti Mannubbotko, ken inlibakko ti insao dagiti ammak; ngem ita tapno nasaksakbay a makitada nga umayto, ken ta malagipna ti tunggal pinarsuana, agpakitanto iti amin.

31 Wen, agparintumengto ti tunggal tumeng, ken agpudnonto ti tunggal dila iti sangona. Wen, uray pay iti maudi nga aldaw, inton agtakder tapno ukomenna amin a tao, ket isunton ti panagpudnoda nga isu ti Dios; ket isunton ti panagpudnoda, dagiti nagbiag nga awanan iti Dios iti lubong, a nalinteg ti pannakaikeddeng ti agnanayon a pannusa kadakuada; ket agarigengendanto, ken agpigerger, ken iti italtaldiap ti manangmatmat a matana.

32 Ket ita napasamak a rinugian ni Alma iti dayta a kanito nga isuro dagiti tattao, ken dagiti kadua ni Alma a nagparangan ti anghel, a nagdaliasat iti aglawlaw ti amin a daga, a mangisaknap kadagiti tattao kadagiti banag a nangngegan ken nakitada, ken nangikasaba iti balikas ti Dios iti adu a rigat, iti nakaro a panangidadanes dagiti saan a mamatpati, a sinaplit ti adu kadakuada.

33 Ngem iti laksid amin daytoy, nangibinglayda iti adu a pangliwliwa iti simbaan, nga impatalgedda ti pammatida, ken ginutugotda ida nga addaan iti panagitured ken adu a panagtutuok iti panagtungpalda kadagiti bilin ti Dios.

34 Ket uppat kadakuada ti lallaki nga annak ni Mosiah; ket Ammon, ken Aaron, ken Omner, ken Himni ti naganda; dagitoy ti nagan dagiti lallaki nga annak ni Mosiah.

35 Ket nagdaliasatda iti amin a daga ti Zarahemla, ken iti amin a tao nga iturayan ni ari Mosiah, sireregtada a nangikarkarigatan a nangpalunit iti amin a sugat a naaramidda iti simbaan, nga impudnoda amin a basbasolda, ken impablaakda amin a banag a nakitada, ken inlawlawagda dagiti padto ken dagiti nasantuan a kasuratan iti amin nga agtarigagay a dumngeg kadakuada.

36 Ket kastoy ti panagbalinda a ramit iti ima ti Dios iti panangidanonda iti adu iti pannakaammo iti pudno, wen, iti pannakaammo iti Mannubbotda.

37 Ket anian a gasatda! Ta impablaakda ti kappia; insaknapda dagiti naimbag a damag ti naimbag; ken impakdaarda kadagiti tattao a ti Apo ti agturay.