1 Ita napasamak a kalpasan ti panangaramid dagiti lallaki nga annak ni Mosiah amin dagitoy a banag, inkuyogda ti sumagmamano kadakuada ket nagsublida iti amada, ti ari, ket indawatda kenkuana nga ipalubosna a mapanda, a kakuyogda dagiti pinilida, iti daga a Nephi tapno ikasabada dagiti banag a nangngeganda, ken tapno maiburayda ti balikas ti Dios kadagiti kabsatda, dagiti Lamanita—

2 Ta bareng maiturongda ida iti pannakaammo iti Apo a Diosda, ken mapamati ida iti kinadangkes dagiti ammada; ken ta bareng maagasanda ida iti gurada kadagiti Nephita, tapno mairamanda met nga agrag-o iti Apo a Diosda, tapno agbalinda a mannakigayyem iti tunggal maysa, ken tapno awanen ti panagsususik iti amin a daga nga inted kadakuada ti Apo a Diosda.

3 Ita tinarigagayanda a nasken a maipakdaar ti pannakaisalakan iti amin a parsua, agsipud ta saanda maibturan a nasken a maungaw ti kararua ti asinoman; wen, uray mamagaringenggen ken mamagpigerger kadakuada ti mismo a kapanunotan a nasken nga agibtur iti awan inggana a panagtutuok ti asinoman a karurua.

4 Ket kasta ti panagtignay ti Espiritu ti Apo kadakuada, agsipud ta isuda ti kadadaksan kadagiti managbasol. Ket nakita ti Apo a maikanada iti awan inggana nga asina nga isalakanna ida; nupay kasta sinagabada ti nalaus a leddaang ti kararua gapu kadagiti kinadangkesda, a nalaus ti panagsagaba ken panagbutengda ta nasken a maisinada iti agnanayon.

5 Ket napasamak a nagpakaasida iti amada iti adu nga aldaw tapno makapanda iti daga a Nephi.

6 Ket napan nagdamag ni ari Mosiah iti Apo no rumbeng a palubosanna dagiti lallaki nga annakna a mapan mangikasaba iti balikasna kadagiti Lamanita.

7 Ket kinuna ti Apo ken ni Mosiah: Palubosam ida a mapan, agsipud ta adunto ti mamati kadagiti balikasda, ket maaddaandanto iti agnanayon a biag; ket wayawayaakto dagiti lallaki nga annakmo manipud kadagiti ima dagiti Lamanita.

8 Ket napasamak nga impalubos ni Mosiah a mabalin a mapanda ken aramidenda ti mayannurot iti dinawatda.

9 Ket nagdaliasatda iti langalang tapno ikasaba ti balikas kadagiti Lamanita; ket itdek ti pakaammuan iti inaramidda kalpasanna.

10 Ita awan ti asino man a pakaitalkan ni ari Mosiah iti pagarian, agsipud ta awan ti asino man kadagiti lallaki nga annakna ti umawat iti pagarian.

11 Ngarud innalana dagiti kasuratan a naikitikit kadagiti pinanid a gambang, kasta met dagiti pinanid ni Nephi, ken amin a banag a sinalimetmetan ken tinaginayonna a kas mayannurot kadagiti bilin ti Dios, kalpasan ti panangipatarusna ken pannakaipasuratna dagiti salaysay nga adda kadagiti pinanid a balitok a nasarakan dagiti tattao ni Limhi, nga inyawat kenkuana ni Limhi;

12 Ket inaramidna daytoy gapu iti nalaus a gagar dagiti taona; agsipud ta saan a marukod ti tarigagayda a mangammo iti maipanggep kadagidiay tao a nadadael.

13 Ket ita impatarusna ida babaen dagidiay dua a bato a naimuntar iti dua nga iking ti bai.

14 Ita naisagana dagitoy a banag manipud pay idi punganay, ket naipaima iti agsasaruno a kaputotan, iti panggep a panangyulog kadagiti pagsasao;

15 Ket nasaluadan ken nasalaknibanda babaen ti ima ti Apo, ta nasken a maipalgak iti tunggal parsua no asino ti mangtagikua iti daga dagiti kinadangkes ken dagiti kinarimon ti taona;

16 Ket asino man nga agtagikua dagitoy a bambanag maawagan iti mammadto, a naipasurot iti wagas dagiti nagkauna a panawen.

17 Ita kalpasan ti panangipatarus ni Mosiah kadagitoy a kasuratan, kitaen, intedna ti pakaammuan kadagiti tattao a nadadael, manipud iti panawen a pannakadadaelda agpasanud iti panawen a pannakaipasdek ti dakkel a torre, agpasanud iti panawen a riniro ti Apo iti pagsasao dagiti tattao ket naiwaraswarasda iti ganggannaet iti amin a daga, wen, ken uray pay a manipud iti dayta a panawen nga agsubli agingga iti pannakaparsua ni Adan.

18 Ita pinarnuay daytoy a pakaammuan ti nalaus a panagleddaang dagiti tattao ni Mosiah, wen, napnoda iti ladingit; nupay kasta nangted daytoy kadakuada iti nawada a pannakaammo, ket iti dayta nagrag-oda.

19 Ket maisuratto daytoy a pakaammuan kalpasanna; agsipud ta kitaen, rumbeng unay a maammuan ti amin a tao dagiti banag a naisurat iti daytoy a pakaammuan.

20 Ket ita, kas nasaokon kadakayo, a kalpasan ti panangaramid ni ari Mosiah kadagitoy a banag, innalana dagiti pinanid a gambang, ken amin dagiti banag a sinalimetmetanna, ket intalekna ida ken ni Alma, a lalaki nga anak ni Alma; wen, amin dagiti kasuratan, kasta met dagiti barubasa, ket intalekna ida kenkuana, ket imbilinna kenkuana a nasken a salimetmetan ken taginayonenna ida, kasta met nga idulinna ti kasuratan dagiti tattao, nga impaimana manipud iti maysa a sangkaputotan iti sumaruno, a kas met iti pannakaipaimada manipud iti panawen nga ipapanaw ni Lehi iti Jerusalem.