1 Ut jo’kan wi’chik ex was wiitz’in, nawaj raj xtz’aamankil lee rab’ihom, xb’aan naq toj wan k’a’ruhaq chik li nawaj xyeeb’al eere; xb’aan naq k’ehomaq reetal, wan k’a’aq re ru tinye eere chirix li k’a’ru toj taachalq.

2 Ut li k’a’aq re ru tinye eere, k’eeb’il chinnaw xb’aan jun li anjel taqlanb’il xb’aan li Dios. Ut a’an kixye we: Ajen. Ut ki’aj wu, ut k’ehomaq reetal naq xaqxo chiwu.

3 Ut a’an kixye we: Ajen, ut ab’i li aatin li tinye aawe; xb’aan naq k’e reetal, chalenaqin chixch’olob’ankil chawu li sahil esilal re nimla sahil ch’oolejil.

4 Xb’aan naq li Qaawa’ rab’ihom laa tij, ut xtz’ilom rix laa tiikilal, ut xinixtaqla chi ch’olob’ank chawu re naq taasaho’q aach’ool; ut re tatruuq chi ch’olob’ank chiru laa tenamit, re naq eb’ a’an te’nujaq ajwi’ rik’in sahil ch’oolejil.

5 Xb’aan naq k’e reetal, taachalq xq’ehil, ut moko najt ta chaq, naq rik’in wankilal, li Qaawa’ Q’axal Nim Xwankil li na’awa’b’ejin, li wanjenaq ut li toj nawan, chalen chaq anchal li junelik q’e kutan toj anchal li junelik q’e kutan chik, taachalq chaq sa’ choxa sa’ xyanqeb’ li ralal xk’ajoleb’ li winq, ut taawanq jo’ muheb’aal ch’och’, ut tox’elq sa’ xyanqeb’ li winq, rik’in xk’anjelankil xninqal ru sachb’a-ch’oolej, jo’ xk’irtesinkileb’ li yaj, xwaklesinkileb’ li kamenaq, xk’eeb’al chi b’eek li yeeq roq, chixk’ulb’al rilob’aal li mutz’, ut chi ab’ink li tz’ap xik, ut rik’in xk’irtesinkil li k’iila paay chi yajel.

6 Ut taarisiheb’ laj tza, malaj li maa’us aj musiq’ej li neke’wan sa’ xch’ooleb’ li ralal xk’ajoleb’ li winq.

7 Ab’i ut, tixnumsi li aaleek, ut xrahil li tz’ejwalej, tz’okaak, chaqi-eel, ut tawaak, tixq’ax li naxkuy xnumsinkil li winq chi ink’a’ taakamq; xb’aan naq k’e reetal, na’el xkik’el ruuchil tiqob’, xb’aan naq q’axalaq xnimal lix yot’b’al xmusiq’ xb’aan xmaa’usilaleb’ ut xtz’eqb’eetalileb’ lix tenamit.

8 Ut Jesukristo taak’ab’a’iiq wi’, li Ralal li Dios, lix Yuwa’il li choxa ut ch’och’, laj Yo’ob’tesihom re chixjunil li k’a’aq re ru chalen chaq sa’ xtiklajik; ut lix na’ xMaria taak’ab’a’iiq wi’.

9 Ab’i ut, nachal rik’ineb’ li re, re naq taachalq li kolb’a-ib’ rik’ineb’ li ralal xk’ajoleb’ li winq rik’in xpaab’ankil lix k’ab’a’; ut chirix ajwi’ chixjunil a’in yal winq te’xk’oxla, ut te’xye naq wan aj tza rik’in, ut te’xraple, ut te’xk’e chiru krus.

10 Ut a’an taawakliiq chaq sa’ rox li kutan sa’ xyanqeb’ li kamenaq; ut k’e reetal, a’an naxaqli chi raqok aatin chirix li ruchich’och’; ut k’e reetal, nab’aanuman chixjunil li k’a’aq re ru a’in re naq taachalq jun li raqb’a-aatin tiik sa’ xb’eeneb’ li ralal xk’ajoleb’ li winq.

11 Xb’aan naq k’e reetal, ut jo’kan ajwi’ lix kik’el naxtoj rix lix maakeb’ li xe’t’ane’ xb’aan li q’etok aatin re laj Adan, li xe’kam chi ink’a’ neke’xnaw li naraj li Dios chirixeb’, malaj li ke’maakob’ chi maak’a’eb’ xnawom.

12 A’b’anan rahilal, rahilal sa’ xb’een li ani nanawok re naq naxpo’resi xch’ool rik’in li Dios! Xb’aan naq li kolb’a-ib’ maajun aj-e nachal xkomon a’an, ka’ajwi’ b’an rik’in li jalb’a-k’a’uxlej, ut xpaab’ankil li Qaawa’ Jesukristo.

13 Ut li Qaawa’ Dios kixtaqlaheb’ lix santil profeet sa’ xyanqeb’ chixjunil li ralal xk’ajoleb’ li winq, re xch’olob’ankil li k’a’aq re ru a’in chiru li junjunq kab’al, tenamit, ut aatinob’aal, re naq chi jo’kan yalaq ani te’paab’anq re naq taachalq li Kristo, eb’ a’an te’ruuq chixk’ulb’al li risinkil lix maakeb’, ut te’saho’q xch’ool rik’in sahil ch’oolejil q’axal nim, chanchan naq ak chalenaq sa’ xyanqeb’.

14 A’b’an li Qaawa’ Dios kiril naq lix tenamit a’aneb’ jun tenamit jipeb’ xk’a’uxl, ut kixxaqab’ choq’ reheb’ jun li chaq’rab’, a’an lix chaq’rab’ laj Moises.

15 Ut k’iila eetalil, ut sachb’a-ch’oolej, ut jaljookil ru na’leb’, ut muhel kixk’ut chiruheb’, chirix lix k’ulunik, ut jo’kaneb’ ajwi’ li santil profeet ke’raatinaheb’ chirix lix k’ulunik; a’ut ke’xkawob’resi li raameb’, ut ink’a’ ke’xtaw xyaalal naq lix chaq’rab’ laj Moises maak’a’ na’ok wi’, ka’ajwi’ rik’in li tojb’al rix li maak xb’aan xkik’el.

16 Ut wi ta taaruuq naq eb’ li kok’al te’ruuq chi maakob’k, ink’a’ raj te’ruuq chi kole’k; a’b’anan ninye aawe naq osob’tesinb’ileb’ a’an; xb’aan naq k’e reetal, jo’ chanru naq sa’ laj Adan, malaj rik’in naq ak reheb’ chi jo’kan, neke’t’ane’, jo’kan ajwi’ lix kik’el li Kristo naxtoj rix lix maakeb’.

17 Ut jo’kan wi’chik, ninye aawe, naq maajun chik k’ab’a’ej taak’eemanq, chi moko junaq chik b’e malaj chan chik ru taaruuq taachalq wi’ li kolb’a-ib’ reheb’ li ralal xk’ajoleb’ li winq, ka’ajwi’ rik’in ut xb’aan lix k’ab’a’ li Kristo, li Qaawa’ Q’axal Nim Xwankil.

18 Xb’aan naq k’e reetal, a’an naraqok aatin, ut tiik ru lix raqb’a-aatin, ut moko na’oso’ ta li k’uula’al li nakam sa’ xk’uula’alil; eb’ li winq b’an neke’uk’ak tojb’a-maak choq’ reheb’ li raam wi ink’a’ neke’xtuulanob’resi rib’ ut neke’ok chanchaneb’ li kok’al, ut neke’xpaab’ naq li kolb’a-ib’ kiwan, ut wan, ut toj taawanq rik’in ut sa’ xk’ab’a’ lix kik’el li Kristo li natojok rix li maak, a’ li Qaawa’ Q’axal Nim Xwankil.

19 Xb’aan naq li ruchich’och’il winq wan choq’ aj xik’ ilonel re li Dios, ut wanjenaq chalen chaq xt’anik laj Adan, ut toj taawanq chi junelik q’e kutan, wi ink’a’ naxkanab’ rib’ chi q’unb’esiik xch’ool xb’aan li Loq’laj Musiq’ej, ut narisi li ruchich’och’il winq chirix, ut na’ok choq’ aj santil paab’anel sa’ xk’ab’a’ lix tojb’al rix li maak xb’aan li Kristo li Qaawa’, ut na’ok chanchan jun li ch’ina al, kub’enaq ratawom, q’un xch’ool, tuulan, aj kuyunel, nujenaq rik’in rahok, wank xch’ool chixk’eeb’al rib’ rub’el chixjunil li k’a’aq re ru tixk’oxla li Qaawa’ naq us xk’eeb’al sa’ xb’een, jo’ chanru naq jun li ch’ina al naxk’e rib’ rub’el xwankil lix yuwa’.

20 Ut jo’kan wi’chik, ninye aawe, naq taachalq xq’ehil naq li na’leb’ chirix jun aj Kolonel taajek’imanq chiru li junjunq chi tenamit, junkab’al, aatinob’aal, ut teepal.

21 Ut k’e reetal, naq taawulaq li kutan a’an, maa’ani te’tawe’q chi maak’a’eb’ xjitb’al chiru li Dios, juneseb’ li kok’al, ka’aj b’an wi’ rik’in jalok k’a’uxlej ut xpaab’ankil lix k’ab’a’ li Qaawa’ Dios Q’axal Nim Xwankil.

22 Ut sa’ ajwi’ li kutan a’in, chirix naq xak’ut chiru laa tenamit li k’a’aq re ru katxtaqla wi’ li Qaawa’ laa Dios, rik’in a’an moko neke’tawe’ ta chik chi maak’a’eb’ xjitb’al sa’ rilob’aal li Dios, ka’ajwi’ jo’ chanru li aatin li inyehom aawe.

23 Ut anajwan ak inyehom li aatin kinixtaqla wi’ li Qaawa’ Dios.

24 Ut jo’ka’in naxye li Qaawa’: Taaxaqliiq li aatin jo’ lemtz’ ruhil yaal ch’olob’anb’il chirix li tenamit a’in sa’ xkutankil li raqb’a-aatin; li taaraqe’q wi’ aatin chirixeb’, li junjunq chi winq a’ yaal jo’ chanruheb’ lix k’anjel, ma useb’, malaj ink’a’ useb’.

25 Ut wi ink’a’ useb’, teneb’anb’il sa’ xb’eeneb’ rilb’al chi q’axalaqeb’ xxiw lix maakeb’ ut lix tz’eqb’eetalileb’, li naxk’eheb’ chixka’ch’inob’resinkil rib’ chiru li Qaawa’ re te’wanq sa’ rahilal ut sa’ rahob’tesiik li maak’a’ roso’jik, b’ar wi’ maajo’q’e chik te’ruuq chi sutq’iik chaq; jo’kan naq xe’uk’ak tojb’a-maak choq’ re li raameb’.

26 Jo’kan ut, xe’uk’ak chire li sek’ re lix josq’il li Dios, a’ li ink’a’ kiru li tiik ruhil na’leb’ chixramb’al chiruheb’ jo’ chanru ajwi’ naq ink’a’ kiru chixramb’al naq kit’ane’ laj Adan xb’aan naq kixk’ux li ru che’ li kiyehe’ naq ink’a’ taak’uxmanq; jo’kan ut, li uxtaan moko taaruuq ta chik chi wank xwankil sa’ xb’eeneb’ chi junelik.

27 Ut lix rahileb’ chanchan jun palaw re xam ut chuhil pek, li ink’a’ naru xchupb’al xxamlel, ut li nataqe’ xsib’el chi junelik q’e kutan. Jo’ka’in kinixtaqla li Qaawa’. Amen.