1 Ug karon, nahitabo nga dihang si hari Benjamin nakapamulong na sa iyang katawhan, nagsugo siya nga ipaadto sila, nagtinguhang mahibalo sa iyang katawhan kon mituo ba sila sa iyang mga gipamulong kanila.

2 Ug silang tanan misinggit sa usa ka tingog, nga nag-ingon: Oo, mituo kami sa tanan nga imong gipamulong kanamo; ug, nahibalo usab kami sa pagkatinuod ug sa kamatuoran niini, tungod sa Espiritu sa Ginoong Makagagahom, nga mihimo og dakong kausaban kanamo, o sa among mga kasingkasing, nga kami wala nay tinguha sa pagbuhat og daotan, apan sa pagbuhat og maayo kanunay.

3 Ug kami, sa among kaugalingon, usab, pinaagi sa walay kinutoban nga kaayo sa Dios, ug sa mga gipakita sa iyang Espiritu, adunay dakong panglantaw niana nga moabot; ug kon angay man, makapanagna kami sa tanang butang.

4 Ug ang among pagtuo mahitungod sa mga butang nga gikapamulong sa among hari ngari kanamo mao ang nagdala kanamo niining talagsaong kahibalo, nga tungod niini kami nagmaya sa hilabihan nga kalipay.

5 Ug andam kami nga mosulod sa pakigsaad ngadto sa among Dios sa pagbuhat sa iyang kabubut-on, ug magmasulondon sa iyang mga sugo sa tanang butang nga iyang isugo kanamo, sa tanang adlaw nga nahibilin sa among kinabuhi, aron dili namo madala diha sa among kaugalingon ang usa ka walay kataposan nga hilabihang kasakit, sigon sa gipamulong sa anghel, aron dili kami makainom sa kopa sa kasuko sa Dios.

6 Ug karon, mao kini ang mga pulong nga gitinguha ni hari Benjamin kanila; ug mao nga miingon siya kanila: Nakapamulong na kamo sa mga pulong nga akong gitinguha; ug ang pakigsaad nga inyong gihimo usa ka matarong nga pakigsaad.

7 Ug karon, tungod sa pakigsaad nga inyong gihimo pagatawgon kamo nga mga anak ni Kristo, iyang mga anak nga lalaki, ug iyang mga anak nga babaye; kay tan-awa, niining adlawa sa espirituhanong paagi kamo iyang gipanganak; kay nag-ingon kamo nga ang inyong mga kasingkasing nausab pinaagi sa pagtuo sa iyang ngalan; mao nga, kamo natawo kaniya ug nahimong iyang mga anak nga lalaki ug mga anak nga babaye.

8 Ug ubos niini nga ngalan gihimo kamong gawasnon, ug wala nay lain nga ngalan diin kamo mahimong gawasnon. Wala nay lain nga ngalan nga gihatag diin ang kaluwasan moabot; mao nga, manghinaot ko nga kamo modala diha kaninyo sa ngalan ni Kristo, tanan kamo nga nakasulod sa pakigsaad uban sa Dios nga kamo magmasulundon hangtod sa kataposan sa inyong kinabuhi.

9 Ug mahitabo nga kinsa kadtong magbuhat niini makaplagan diha sa tuo nga kamot sa Dios, kay mahibaloan niya ang ngalan diin siya pagatawgon; kay pagatawgon siya pinaagi sa ngalan ni Kristo.

10 Ug karon mahitabo, nga kinsa kadtong dili modala diha kaniya sa ngalan ni Kristo kinahanglan pagatawgon sa lain nga ngalan; mao nga, makit-an niya ang iyang kaugalingon nga anaa sa wala nga kamot sa Dios.

11 Ug manghinaot ako nga kamo mahinumdom usab, nga mao kini ang ngalan nga akong giingon nga kinahanglan akong ihatag kaninyo nga dili na pagapapason, gawas kon pinaagi sa kalapasan; mao nga, pagmatngon nga dili kamo makalapas, nga ang ngalan dili mapapas gikan sa inyong kasingkasing.

12 Sultihan ko kamo, akong tinguha nga hinumdoman ninyo nga ipabiling nakasulat kanunay ang ngalan diha sa inyong mga kasingkasing, nga kamo dili makaplagan diha sa wala nga kamot sa Dios, apan kamo makadungog ug masayod sa tingog diin kamo pagatawgon, ug, sa ngalan usab nga iyang itawag kaninyo.

13 Kay unsaon pagkaila sa usa ka tawo sa agalon kinsa siya wala makaalagad, ug dili niya kaila, ug layo sa mga pagbati ug katuyoan sa iyang kasingkasing?

14 Ug usab, kuhaon ba sa usa ka tawo ang asno nga gipanag-iya sa iyang silingan, ug tagoan kini? Sultihan ko kamo, Dili; dili man gani siya motugot nga mokaon kini kauban sa iyang mga gagmayng kahayopan, apan bugawon kini, ug papahawaon kini. Sultihan ko kamo, nga mahitabo usab kini kaninyo kon dili kamo makaila sa ngalan nga itawag kaninyo.

15 Mao nga, manghinaot ako nga kamo magmakanunayon ug dili matarog, sa kanunay puno sa mga maayo nga buhat, aron si Kristo, ang Ginoong Dios nga Makagagahom, moselyo kaninyo ngadto kaniya, nga kamo madala ngadto sa langit, nga kamo makaangkon sa walay kataposang kaluwasan ug kinabuhing dayon, pinaagi sa kaalam, ug gahom, ug kaangayan, ug kaluoy kaniya kinsa milalang sa tanang butang, sa langit ug sa yuta, kinsa mao ang Dios nga labaw sa tanan. Amen.