1 Ug karon, nahitabo nga human si hari Mosiah nakaangkon og padayon nga kalinaw sulod sa tulo ka tuig, nagmatinguhaon siyang masayod kabahin sa katawhan nga nangadto aron mopuyo sa yuta sa Lehi-Nephi, o sa siyudad sa Lehi-Nephi; kay ang iyang katawhan walay nadunggan gikan kanila sukad sa panahon nga mibiya sila sa yuta sa Zarahemla; mao nga, gihasolan siya sa kanunay nilang pagpangutana bahin kanila.

2 Ug nahitabo nga si hari Mosiah mitugot nga ang dise-sayis ka lig-on niyang kalalakin-an moadto sa yuta sa Lehi-Nephi, aron magpakisayod kabahin sa ilang kaigsoonan.

3 Ug nahitabo nga sa pagkaugma gisugdan nila ang pagtungas, kauban nila ang usa nga si Ammon, usa ka lig-on ug kusgan nga tawo, ug kaliwat ni Zarahemla; ug siya usab ang ilang pangulo.

4 Ug karon, wala sila mahibalo sa agianan nga ilang agian sa kamingawan sa pagtungas ngadto sa yuta sa Lehi-Nephi; mao nga naglatagaw sila sulod sa daghang adlaw sa kamingawan gani kwarenta ka adlaw sila nga naglatagaw.

5 Ug sa dihang naglatagaw sila sa kwarenta ka adlaw miabot sila sa usa ka bungtod, nga nahimutang sa amihanang yuta sa Shilom, ug didto gitukod nila ang ilang mga tolda.

6 Ug gidala ni Ammon ang tulo niya ka kaigsoonang lalaki, ug ang ilang mga ngalan mao si Amaleki, Helem, ug si Hem, ug milugsong sila ngadto sa yuta sa Nephi.

7 Ug tan-awa, nahimamat nila ang hari sa katawhan nga didto sa yuta sa Nephi, ug sa yuta sa Shilom; ug giliyokan sila sa mga magbalantay sa hari, ug gidakop, ug gigapos, ug gibalhog sa bilanggoan.

8 Ug nahitabo sa dihang nabilanggo sila sulod sa duha ka adlaw gidala sila pag-usab sa atubangan sa hari, ug ang ilang mga gapos gibadbad; ug mibarog sila atubangan sa hari, ug gitugotan, o gimandoan, nga ilang tubagon ang iyang mga ipangutana kanila.

9 Ug miingon siya kanila: Tan-awa, ako si Limhi, ang anak ni Noah, nga anak ni Zeniff, nga gikan sa yuta sa Zarahemla aron sa pagpanunod niining yutaa, nga mao ang yuta sa ilang mga amahan, kinsa gihimong hari pinaagi sa tingog sa katawhan.

10 Ug karon, gusto kong masayod kon nganong kamo walay kahadlok nga mipaduol sa mga paril sa siyudad, dihang ako mismo, didto sa gawas sa ganghaan kauban sa akong mga magbalantay?

11 Ug karon, tungod niini nga hinungdan akong gitugot nga dili kamo hilabtan, aron mangutana ako kaninyo, kay kon dili pa tungod niana gipapatay ko na unta kamo sa akong mga magbalantay. Kamo gitugotan sa pagsulti.

12 Ug karon, dihang nakita ni Ammon nga gitugotan siya sa pagsulti, mipaduol siya ug miyukbo atubangan sa hari; ug mibarog pagbalik nga miingon: O hari, mapasalamaton kaayo ako atubangan sa Dios karong adlawa nga buhi pa ako, ug gitugotan nga makasulti; ug maningkamot ako sa pagsulti nga maisogon;

13 Kay nakasiguro ako nga kon nakaila pa unta ikaw kanako dili nimo itugot nga magapos ko. Kay ako si Ammon, ug kaliwat ko ni Zarahemla, ug mitungas gikan sa yuta sa Zarahemla aron magpakisayod kabahin sa among kaigsoonan, kinsa gipadala ni Zeniff gikan niana nga yuta.

14 Ug karon, nahitabo nga human nadungog ni Limhi ang mga pulong ni Ammon, hilabihan ang iyang kalipay, ug miingon: Karon, nasayod ako nga ang akong kaigsoonan nga atua sa yuta sa Zarahemla buhi pa diay. Ug karon, magmaya ako; ug sa pagkaugma akong buhaton nga ang akong katawhan magmaya usab.

15 Kay tan-awa, giulipon kami sa mga Lamanita, ug gipabuhis kami og dagko nga buhis nga lisod kaayong bayaran. Ug karon, tan-awa, ang atong kaigsoonan moluwas kanato gikan sa atong pagkaulipon, o gikan sa mga kamot sa mga Lamanita, ug kita himoon nilang mga ulipon; kay mas maayo nga maulipon kita sa mga Nephita kay sa magbayad og buhis ngadto sa hari sa mga Lamanita.

16 Ug karon, si hari Limhi misugo sa iyang mga magbalantay nga dili na nila gaposon si Ammon ni ang iyang mga igsoon, apan misugo nga moadto sila sa bungtod nga nahimutang sa amihanang Shilom, ug modala sa ilang mga kaigsoonan ngadto sa siyudad, nga niana sila mangaon, ug moinom, ug mopahulay sila gikan sa mga kahago sa ilang pagpanaw; kay giantos nila ang daghang butang; giantos nila ang kagutom, kauhaw, ug kakapoy.

17 Ug karon, nahitabo nga sa pagkaugma si hari Limhi mipadala og usa ka pahibalo sa tanan niyang katawhan, aron magpundok sila ngadto sa templo, sa pagpamati sa mga pulong nga iyang isulti kanila.

18 Ug nahitabo nga dihang napundok na sila namulong siya kanila sa ingon niini nga paagi, nga nag-ingon: O kamo, akong katawhan, ihangad ang inyong mga ulo ug paghupay kamo; kay tan-awa, ang panahon miabot na, o dili na layo, nga dili na kita mapaubos sa kamandoan sa atong mga kaaway, bisan pa sa kadaghan sa atong panglimbasog, nga nakawang; gani masaligon ko nga aduna pay mabungahon nga panglimbasog nga atong pagahimoon.

19 Mao nga, ihangad ang inyong mga ulo, ug pagmaya, ug ibutang sa Dios ang inyong pagsalig, niana nga Dios nga mao ang Dios ni Abraham, ug ni Isaac, ug ni Jacob; ug usab, niana nga Dios nga midala sa mga anak ni Israel gikan sa yuta sa Ehipto, ug mihimo nga sila makalakaw lahos sa Pulang Dagat sa uga nga yuta, ug mipakaon kanila og manna nga sila dili mamatay sa kamingawan; ug daghan pa kaayong mga butang ang iyang gihimo alang kanila.

20 Ug usab, ang mao gihapon nga Dios midala sa atong mga amahan palayo sa yuta sa Jerusalem, ug mipanalipod ug mipatunhay sa iyang katawhan bisan hangtod karon; ug tan-awa, tungod sa atong mga pagkadaotan ug mga pagkasalawayon siya midala kanato sa pagkaulipon.

21 Ug kamong tanan mga saksi niining adlawa, nga si Zeniff, kinsa gihimong hari niini nga katawhan, siya nga hilabihan kamadasigon nga mapanunod ang yuta sa iyang mga amahan, mao nga nalingla siya pinaagi sa pagkalimbongan ug kamalipoton ni hari Laman, kinsa misulod sa usa ka pakigsabot ni hari Zeniff, ug gitugyan ngadto sa iyang mga kamot ang pagpanag-iya sa usa ka bahin sa yuta, o gani ang siyudad sa Lehi-Nephi, ug ang siyudad sa Shilom; ug ang mga yuta nga naglibot niini—

22 Ug tanan kini iyang gihimo, alang sa bugtong nga katuyoan sa pagdala niini nga katawhan ubos sa kamandoan o sa pagkaulipon. Ug tan-awa, kita karong panahona nagbayad og buhis ngadto sa hari sa mga Lamanita, sa kantidad nga katunga sa atong mais, ug sa atong sebada, ug gani sa tanan natong mga lugas sa matag matang, ug katunga sa tubò sa atong gagmayng kahayopan ug sa atong dagkong kahayopan; ug gani katunga sa tanan nga anaa kanato o gipanag-iya paninglon kanato sa hari sa mga Lamanita, o ang atong kinabuhi.

23 Ug karon, dili ba bug-at kini nga pas-anon? Ug dili ba, ang atong kasakit, hilabihan? Karon tan-awa, pagkadako sa katarongan nga kita magbangotan.

24 Oo, sultihan ko kamo, kadako sa katarongan nga kita magbangotan; kay tan-awa pila sa atong kaigsoonan ang gipamatay, ug ang ilang dugo nausik sa walay hinungdan, ug ang tanan tungod sa pagkadaotan.

25 Kay kon kini nga katawhan wala pa mahulog sa pagpakasala ang Ginoo dili unta motugot nga kining dako nga kadaot modangat kanila. Apan tan-awa, wala sila mopatalinghog sa iyang mga pulong; apan adunay mitumaw nga mga panagbingkil taliwala kanila, gani hilabihan kaayo nga nag-unay na sila sa pagpaagas sa ilang mga dugo.

26 Ug usa ka propeta sa Ginoo ang ilang gipatay; oo, usa ka pinili nga tawo sa Dios, kinsa misulti kanila sa ilang pagkadaotan ug mga pagkasalawayon, ug nanagna sa daghang butang nga moabot, oo, gani sa pag-anhi ni Kristo.

27 Ug tungod kay misulti siya kanila nga si Kristo mao ang Dios, ang Amahan sa tanang mga butang, ug miingon nga mopakita siya nga sama og panagway sa tawo, ug mao kini ang panagway diin ang tawo gilalang sa sinugdanan; o sa laktod nga pagkasulti, siya miingon nga ang tawo gilalang sama sa panagway sa Dios, ug nga ang Dios manaog taliwala sa mga anak sa mga tawo, ug makaangkon og unod ug dugo, ug molakaw sa ibabaw sa yuta—

28 Ug karon, tungod kay gisulti niya kini, ila siyang gipatay; ug daghan pang butang ang ilang gibuhat nga mibunga og kasuko sa Dios nganha kanila. Mao nga, kinsa kaha ang matingala nga sila anaa sa pagkaulipon, ug gipangsilotan sila og mahapdos nga mga kasakit?

29 Kay tan-awa, ang Ginoo nag-ingon: Ako dili motabang sa akong katawhan sa adlaw sa ilang pagpakasala; apan akong alihan ang ilang mga agianan aron dili sila mouswag; ug ang ilang mga binuhatan mahimo nga usa ka babag sa ilang atubangan.

30 Ug usab, miingon siya: Kon ang akong katawhan mopugas og kahugawan sila moani sa tahop niana diha sa alimpulos; ug hiló ang sangpotanan niini.

31 Ug usab miingon siya: Kon ang akong katawhan mopugas og kahugawan moani sila sa silangan nga hangin, nga magdala ug diha-diha nga kalaglagan.

32 Ug karon, tan-awa, ang saad sa Ginoo natuman, ug kamo gihampak ug gisakit.

33 Apan kon modangop kamo ngadto sa Ginoo uban sa hingpit nga katuyoan sa kasingkasing, ug mosalig kaniya, ug moalagad kaniya uban sa tanang kakugi sa hunahuna, kon buhaton ninyo kini, siya sumala sa iyang kabubut-on ug kahimuot, moluwas kaninyo gikan sa pagkaulipon.