1 Ako, si Zeniff, tungod kay natudloan sa tanang pinulongan sa mga Nephita, ug tungod kay adunay kasayoran bahin sa yuta sa Nephi, o sa yuta nga unang kabilin sa among mga amahan, ug tungod kay gipadala isip espiya taliwala sa mga Lamanita aron ako moespiya sa pundok sa ilang kasundalohan, aron ang among kasundalohan mosulong kanila ug molaglag kanila—apan sa diha nga akong nakita ang maayo taliwala kanila nagtinguha ako nga dili na sila malaglag.

2 Busa, nakiglantugi ko sa akong kaigsoonan didto sa kamingawan, kay nanghinaot ako nga ang among tigmando makigsabot kanila; apan kay tawo man siya nga bangis ug uhaw sa dugo mimando nga patyon ako; apan naluwas ako pinaagi sa grabeng pagpaagas og dugo; kay ang amahan nakig-away batok sa amahan, ug ang igsoong lalaki batok sa igsoong lalaki, hangtod nga ang mas daghang bahin sa among kasundalohan nangalaglag didto sa kamingawan; ug namauli kami, kaming naluwas, ngadto sa yuta sa Zarahemla, aron isaysay kana nga sugilanon ngadto sa ilang mga asawa ug sa ilang mga anak.

3 Ug bisan pa, ako nga hilabihan ka madasigon nga makapanunod sa yuta nga kabilin sa among mga amahan, mipundok og daghan kutob sa gusto nga moadto aron mopanag-iya sa yuta, ug misugod na usab sa among panaw padulong sa kamingawan aron moadto sa yuta; apan nag-antos kami sa kagutom ug mahapdos nga mga kasakit; kay wala dayon kami mahinumdom sa Ginoo nga among Dios.

4 Bisan pa niana, human sa daghang adlaw nga paglatagaw sa kamingawan gipabarog namo ang among mga tolda sa dapit diin gipangpatay ang among kaigsoonan, nga duol sa yuta sa among mga amahan.

5 Ug nahitabo nga miadto na usab ako kauban sa akong mga tawo ngadto sa siyudad, ug ngadto sa hari, aron akong mahibaloan ang hunahuna sa hari, ug aron akong mahibaloan kon makasulod ba ako kuyog sa akong katawhan ug makapanag-iya sa yuta nga malinawon.

6 Ug akong giadto ang hari, ug nakigsaad siya kanako nga ako makapanag-iya sa yuta sa Lehi-Nephi, ug sa yuta sa Shilom.

7 Ug misugo usab siya nga ang iyang katawhan mopahawa sa mao nga yuta, ug ako ug ang akong katawhan nangadto sa yuta aron kami makapanag-iya niini.

8 Ug gisugdan namo ang pagtukod og mga gambalay, ug pag-ayo sa mga paril sa siyudad, oo, gani sa mga paril sa siyudad sa Lehi-Nephi, ug sa siyudad sa Shilom.

9 Ug gisugdan namo ang pagtikad sa yuta, oo, gani sa tanang matang sa liso, mga liso sa mais, ug sa trigo, ug sa sebada, ug sa mga neas, ug sa sheum, ug sa mga liso sa tanang matang sa mga bunga; ug nagsugod kami sa pagdaghan ug pag-uswag sa yuta.

10 Karon mao kadto ang malimbongon ug malipoton nga tumong ni hari Laman, ang pagdala sa akong katawhan ngadto sa pagkaulipon, hinungdan nga gitugyan niya ang yuta aron maangkon namo kini.

11 Busa nahitabo, nga human kami makapuyo sa yuta sulod sa napulog duha ka tuig si hari Laman misugod sa pagkabalaka, basin unya sa bisan unsang paagi ang akong katawhan mahimong lig-on sa yuta, ug nga sila dili na makabuntog kanila ug makadala kanila ngadto sa pagkaulipon.

12 Karon mga tapolan sila ug tigsimba og dios-dios nga katawhan; busa matinguhaon sila nga madala kami sa pagkaulipon, aron makapahimulos sila sa mga paghago sa among mga kamot; oo, aron mabusog sila sa mga gagmayng kahayopan sa among kaumahan.

13 Busa nahitabo nga si hari Laman misugod sa paghulhog sa iyang katawhan aron magkabingkil sila sa akong katawhan; busa didto nagsugod ang mga gubat ug mga panagbingkil sa yuta.

14 Kay, sa ikanapulog tulo nga tuig sa akong paghari sa yuta sa Nephi, layo sa habagatang yuta sa Shilom, dihang ang akong katawhan nagpainom ug nagpakaon sa ilang mga gagmayng kahayopan, ug nagtikad sa ilang kayutaan, usa ka bagâ nga panon sa mga Lamanita misulong kanila ug misugod sa pagpatay kanila, ug mikuha sa ilang mga gagmayng kahayopan, ug sa mga mais sa ilang kaumahan.

15 Oo, ug nahitabo nga nanglayas sila, ang tanan nga wala madakpi, bisan didto sa siyudad sa Nephi, ug nangayo kanako og panalipod.

16 Ug nahitabo nga gisangkapan nako sila og mga gapasan, ug mga panâ, mga espada, ug mga sundang, ug mga bunal, ug mga saplong, ug sa tanang matang sa mga hinagiban nga among mamugna, ug misulong ako ug ang akong katawhan sa mga Lamanita aron sa pagpakiggubat.

17 Oo, pinaagi sa kusog sa Ginoo miasdang kami aron sa pagpakiggubat batok sa mga Lamanita; kay ako ug ang akong katawhan nangamuyo sa hilabihan sa Ginoo nga luwason niya kami gikan sa mga kamot sa among mga kaaway, kay nahigmata kami sa usa ka panumdoman bahin sa pagkaluwas sa among mga amahan.

18 Ug naminaw gayod ang Dios sa among mga pangamuyo ug mitubag gayod sa among mga pag-ampo; ug misulong kami dala ang iyang kusog; oo, misulong gayod kami batok sa mga Lamanita, ug sulod sa usa ka adlaw ug usa ka gabii nakapatay gayod kami og tulo ka libo ug kap-atan og tulo; gipatay gayod namo sila gani hangtod nga naabog namo sila gikan sa among yuta.

19 Ug ako mismo, gamit ang kaugalingon nakong mga kamot, mitabang gayod sa paglubong sa ilang mga patay. Ug tan-awa, sa among dako nga kasubo ug pagbangotan, duha ka gatos ug kapitoan og siyam sa among kaigsoonan ang napatay.