Mukanda wa Omoni

1 Monayi, biakalua ne mema, Omoni, mupeshibua mukenji kudi tatuanyi, Yaloma, bua mfunda nansha kakesa pa bitata ebi, bua kukuba bulondanganyi buetu—

2 Bua nanku, mu matuku anyi, ndi musua bua numanya ne mvua muluangana bikola ne muela wa mvita bua kuepula bantu banyi, Bena Nefi, bua kabaponyi mu bianza bia bena lukuna babu, Bena Lamana. Kadi monayi, mema muina ndi muntu mubi, ne ntshivua mulama mikandu ne mikenji ya Mukalenga bu mumvua ne tshia kuenza.

3 Ne biakalua ne bidimu nkama ibidi ne makumi muanda muteketa ne bisambombo bikavu bipita, ne tuvua bapeta bikondu bia bungi bia ditalala; ne tuvua bapeta bikondu bia bungi bia mvita mikola ne dimatshisha dia mashi. Eyowa, ne mu tshikosu, bidimu nkama ibidi makumi muanda mukulu ne bibidi biakapita, ne mvua mulama bitata ebi bilondeshila ku mikenji ya batatuanyi; ne ngabiambikidi muananyi Amalona. Ne ngajikiji.

4 Ne mpindiewu mema, Amalona, ndi mfunda bintu bionsu mbindi mfunda, bidi bikala bikesa, mu mukanda wa tatuanyi.

5 Monayi, biakalua ne bidimu nkama isatu ne makumi abidi bivua bipita, ne tshitupa tshibi tshipita tshia Bena Nefi tshivua tshibutuka.

6 Bualu Mukalenga kavua ulekela ne, kunyima kua kubalombola pambelu pa bulaba bua Yelushalema ne kubalama ne kubakuba ku dipona mu bianza bia bena lukuna babu, eyowa, kavua ulekela bua ne mêyi avuaye muambila batatuetu ka’ajadikibu to, wamba ne: Monsu munuapanga kulama mikenji yanyi kanuakulubuluka mu bulaba to.

7 Bua nanku, Mukalenga wakabakumbula ne tshitungu tshinena; kadi, wakepelesha bakana bua kabafu to, kadi wakabapatuisha mu bianza bia bena lukuna babu.

8 Ne biakalua ne ngakafila bitata kudi muanetu wa baluma Kemishi.

9 Mpindiewu mema, Kemishi, ndi mfunda bintu bikesa bindi mfunda, mu mukanda umua ne muanetu wa baluma; bualu monayi, mvua mumona ne mufundu wa ndekelu uvuaye mufunda, ne uvua muwufunda ne tshianza tshienda nkayenda; ne uvua muwufunda mu dituku divuaye mubifila kundi. Ne ki mu mushindu ewu utudi tulama miandiku, bualu bidi bilondeshila ku mikenji ya batatuetu. Ne ngajikiji.

10 Monayi, mema, Abinadoma, ndi muana wa baluma wa Kemishi. Monayi, biakalua ne ngakamona mvita mivula ne makokangana pankatshi pa bantu banyi, Bena Nefi, ne Bena Lamana; ne mema, ne muela wa mvita wanyi nkayanyi, ngakangata mioyo ya Bena Lamana ba bungi mu disungidila dia bana betu.

11 Ne monayi, miandiku ya bantu aba idi mikanunyibua pa bitata bidi bilamibua kudi bamfumu, bilondeshila ku bikondu; ne ntshiena mumanya dibuluila nansha dimua divua kadiyi difunda, anyi buambi; bua nanku, bidi bikumbanyina mbifundibua. Ne ngajikiji.

12 Monayi, ndi Amaleki, muana wa baluma wa Abinadoma. Monayi, nennuambila kakesa bua Mosiya, uvua mubanjibua mfumu mu bulaba bua Zalahemela; bualu, monayi, yeya mumanyisha kudi Mukalenga ne anyema bulaba bua Nefi, ne bonsu bavua basua kumvuila dîyi dia Mukalenga bavua pabu ne tshia kumbuka nenda mu bulaba, kuya mu tshipela—

13 Ne biakalua ne wakenza bilondeshila muvua Mukalenga mumupeshela mukenji. Ne bakumbuka ku bulaba kuyabu mu tshipela, bonsu bakasua kumvuila dîyi dia Mukalenga; ne bakalombodibua ne mayisha ne mambi a bungi. Ne bakadimuishibua misangu yonsu kudi dîyi dia Nzambi; ne bakalombodibua ku bukola bua diboku dienda, kupitshila mu tshipela tô ne pakapuekabu mu bulaba budi bubikidibua ne bulaba bua Zalahemela.

14 Ne bakasangana bamua bantu bavuabu babikila ne Bena Zalahemela. Mpindiewu, kuvua disanka dinena munkatshi mua bantu ba Zalahemela; ne Zalahemela kabidi uvua musanka bikola, bualu Mukalenga uvua mutuma bantu ba Mosiya ne bitata bia kalabi bivua ne miandiku ya Bena Yuda.

15 Monayi, biakalua ne Mosiya wakamanya ne bantu ba Zalahemela bavua bapatuka mu Yelushalema mu tshikondu tshivua Sedekiya, mfumu wa Yuda, bakaya nenda mukuatshibu ku Babulona.

16 Ne bakenza luendu mu tshipela, ne bavua basambuishibua mâyi manena kudi tshianza tshia Mukalenga, mu bulaba buvua Mosiya mubasangana; ne bavua basombamu katshia diba adi.

17 Ne diba divua Mosiya mubasangana, bavua balua bapita bungi menamena. Kadi, bavua bapeta mvita ya bungi ne makokangana makola, ne bavua bafua ku muela wa mvita ku tshikondu ne tshikondu; ne muakulu wabu ukavua munyanguka; ne kabavua balua ne miandiku to; ne bavua bavila kuikala kua Mufuki wabu; ne nansha Mosiya, anyi bantu ba Mosiya kabavua mua kubumvua to.

18 Kadi biakalua ne Mosiya wakenzeja ne balongeshibua muakulu wenda. Ne biakalua ne bamana kulongeshibua muakulu wa Mosiya, Zalahemela wakalonda bulondanganyi bua batatuenda, bilondeshila, mvulukilu wenda; ne bidi bifunda, kadi kabiyi pa bitata ebi to.

19 Ne biakalua ne Bena Zalahemela, ne Bena Mosiya, bakadisanga pamua; ne Mosiya wakasungudibua bua kuikala mfumu wabu.

20 Ne biakalua ne mu matuku a Mosiya, kuvua dibua dinena divua nadi kudiye ne mikanunu pa mutu padi; ne wakandamuna miakulu ya mikanunu ku dipa ne bukola bua Nzambi.

21 Ne ivua ne mulubu wa umua muntu muena dîna dia Koliantumela, ne ba ku bantu benda bavua bashipibua. Ne bantu ba Zalahemela basangana Koliantumela; ne wakasomba nabu bua mutantshi wa ngondu tshitema.

22 Ivua kabidi yamba imua miaku idi mitangila batatuenda. Ne baledi benda ba kumpala bakaluila ku kaleya, diba divua Mukalenga mubuejakaja muakulu wa bantu; ne tshiji tshia Mukalenga tshiakabakuata bilondeshila ku bitungu bienda, bidi bikala bilulama; ne mifuba yabu idi mitangalajibua mu bulaba bua ku node.

23 Monayi, mema, Amaleki, mvua muledibua mu matuku a Mosiya; ne mvua muikala ne moyo bua kumona lufu luenda; ne Benyamina, muanenda wa baluma, udi ukôkesha pa muaba wenda.

24 Ne monayi, mvua mumona, mu matuku a mfumu Benyamina, mvita mikola ne dimatshisha dia mashi dia bungi munkatshi mua Bena Nefi ne Bena Lamana. Kadi monayi, Bena Nefi bakabatamba bukola; eyowa, mua ne mfumu Benyamina wakabapatula mu mu bulaba bua Zalahemela.

25 Ne biakalua ne ngakatuadija kulua mununu; ne, ntshiyi ne ndelanganyi, ne mumanya ne mfumu Benyamina udi muntu mululama kumpala kua Mukalenga, bua nanku, ne mfila bitata ebi kudi ya, ndomba bantu bonsu bua kulua kudi Nzambi, Wa Tshijila wa Isalele, ne bua kuitabuija kua buambi ku Nyuma, ne kua mabuluila, ne kua disadila dia banjelu, ne kua dipa dia kuakula miakulu, ne kua dipa dia kuandamuna miakulu, ne kua bionsu bidi bimpa; bualu kakuena tshidi tshimpa amu tshiotshi tshiluila kudi Mukalenga; ne tshidi tshibi tshiluila kudi diabulu.

26 Ne mpindiewu, bana betu bananga, ndi njinga bua nulua kudi Kilisto, udi Wa Tshijila wa Isalele, ne nupeta lupandu luenda, ne bukola bua disungila dienda. Eyowa, luayi kudiye, ne lambulayi anyima yenu mijima bu mulambu kudiye, ne tungunukayi mu dijila ne disambila, ne nanukilayi tô ne ku ndekelu; ne bu mudi Mukalenga ne moyo, ne nenupandishibua.

27 Ne mpindiewu, ndi njinga kuakula kakesa bua bamua bangi bakabanda mu tshipela bua kupingana ku bulaba bua Nefi; bualu kuvua tshisumbu tshinena tshiakajinga kuasa mu bulaba bua bupianyi buabu.

28 Bua nanku, bakabanda mu tshipela. Ne bumuvua mulombodi wabu muikala muntu muena bukola ne makanda, ne muntu wa nshingu muiminyina, bua nanku wakabangisha dikokangana munkatshi muabu; ne bakashipibua bonsu, mu tshipela, pa kumbusha makumi atanu, ne bakapingana kabidi ku bulaba bua Zalahemela.

29 Ne biakalua ne bakangata kabidi bakuabu mu bungi bunena, ne bakangata kabidi luendu luabu mu tshipela.

30 Ne mema, Amaleki, mvua ne muanetu wa baluma, wakaya penda nabu; ne tshitu mumvua lumu luabu katshia. Ne ndi pabuipi ne kulala mu lukita luanyi; ne bitata ebi bidi biwula ntenta. Ne ngajikiji kuakula kuanyi.