Chisel A Klaumerang Er A Retedei El Sioning

Bolodengei er a rokui el beluu, me a rekauchad, me a rosisiu a tikingir, me a di rechad, el mei er tir tiang el ureor: El kmo, ngoeak a chubechub er a Dios el Edam me a Rubak er kid el Jesus Kristo e kemam a mla omes a tibereberk el klalo el ngar erngii aikang el ngesechel a cherechar, el ngii a ngesechel a cherechar er a rechedal a Nephi me a direk el rechedal a Laman el odam ertir, me a direk el rechedal a Jared el mlei el mla er a metongakl el blai el dullekoi er ngii. Kemam a dirrek el medengei el kmo ngii a mloiuid el oeak a sengk me a klisiichel a Dios, le ngerel a mla ouchais er kemam; me a leuaisei e kemam a mui el medengei el kmo tia el ureor a klemerang. Me a ki dirrek louchais el kmo aki mla omes a blotk el ngar er a bebul ngii el tibereberk el klalo; ngii a mlo chemolt er kemam el oeak a klisiichel a Dios, el diak el chad. Me aki mouchais el olab a bleketakl el tekoi el kmo, a anghel er a Dios a mle metengel er a ianged, e ngilai el me kmed er medemam, me aki mulengeng, e miles ngii el tibereberk el klalo, me a blotk el ngar erngii; me kemam a medengei el kmo ngoeak a chubechub er a Dios el Edam me a Rubak er kid el Jesus Kristo e kemam a mlo ongeng e obang olechotel kmo, a ikang el tekoi a klemerang. Me ngii a mengasireng el mle er a medemam. Endi a ngerel a Rubak a mlei er kemam el llach el kmo, ng kiram el mo obang olechotel; me a leuaisei, e ngoeak omengull el mo er a llechul a Dios, e kemam ouchais el klaumerang aikang el tekoi. E kemam a medengei el kmo a lesekum e kemam a oumerang er a Kristo, e aki mo mekikiid a bilam er a resechir a rokui el chad, e mo chemolt el klikiid er medal a kingall er a kerrekeriil er a Kristo, e mo kiei el obengkel diak a ulebengelel er babluades. Me a omengull lebo er a Edam, me a mo er a Ngalk, me a mo er a Edaol Reng el ngii a ditang el Dios. Boluaisei.