Miaku ya Molomo

1 Ne mpindiewu, mema, Molomo, muikala pabuipi ne kufila miandiku imvua muikala ngenza mu bianza bia muananyi wa baluma Moloni, monayi mvua mumona pabuipi ne dibutuka dionsu dia bantu banyi, Bena Nefi.

2 Ne bikadi bidimu nkama ya bungi kunyima kua dilua dia Kilisto pandi mfila miandiku eyi mu bianza bia muananyi wa baluma; ne ndi ngela meji ne neamona dibutuka dionsu dia bantu banyi. Kadi Nzambi anyisha bua ashala ne moyo kunyima kuabu, bua afunda kakesa bibatangila, ne kakesa bitangila Kilisto, bua pamuapa bibapesha tshipeta tshimpa dikuabu dituku.

3 Ne mpindiewu, ndi ngakula kakesa bua bimvua mufunda; bualu kunyima kua mema mufunda tshikosu tshia ku bitata bia Nefi, tô ne ku bumfumu bua mfumu Benyamina ewu, uvua Amaleki mutela, mvua mukeba munkatshi mua miandiku ivua mifidibua mu bianza bianyi, ne ngakapeta bitata ebi, bivua bikala ne mulubu mukesa wa bambi ewu, kumbukila kudi Yakoba tô ne ku bumfumu bua mfumu Benyamina ewu, ne kabidi miaku ya bungi ya Nefi.

4 Ne malu adi pa bitata ebi adi ansankisha, bualu bua mambi a dilua dia Kilisto; ne batatuanyi bavua bamanya ne a bungi awu akavua makumbajibua; eyowa, ne ndi panyi mumanya ne bu mukadi malu a bungi avua mambibua ku Nyuma bitutangila tô ne ku dituku edi avua makumbajibua, ne onsu alua kunyima kua dituku edi bushuwa adi ne tshia kuenzeka—

5 Pananku, ngasungudi malu â, bua kujikijapu miandiku yanyi, tshishadi tshina tshia miandiku yanyi tshingangatshila ku bitata bia Nefi; ne ntshiena nansha mua kufunda tshitupa tshia lukama tshimua tshia malu a bantu banyi to.

6 Kadi monayi, nengangata bitata ebi, bidi bikala ne mambi ne mabuluila â, ne nembiteka pamua ne tshishadi tshia miandiku yanyi, bualu bia disungula kundi; ne ndi mumanya ne nebikala bia disungula kudi bana betu.

7 Ne ndi ngenza nanku bua kipatshila ka meji; bualu ki tshidi tshinnungena, bilondeshila ngenzelu wa Nyuma wa Mukalenga udi mundi. Ne mpindiewu, ntshiena mumanya bintu bionsu to; kadi Mukalenga udi mumanya bintu bionsu bidi ne tshia kulua; bua nanku, udi wenza munda muanyi bua kuenza bilondeshila disua dienda.

8 Ne disambila dianyi kudi Nzambi didi ditangila bana betu, ne badi mua kulua kabidi ku dimanya dia Nzambi, eyowa, disungila bua Kilisto, bua bikala kabidi bantu basanguluka.

9 Ne mpindiewu, mema, Molomo, ndi ntungunuka kujikija miandiku yanyi, indi ngangata ku bitata bia Nefi; ne ndi mbienza bilondeshila dimanya ne ngumvuilu udi Nzambi mumpesha.

10 Bua nanku, biakalua ne kunyima kua Amaleki mumana kufila bitata ebi mu bianza bia mfumu Benyamina, wakabiangata ne wakabiteka ne bitata bikuabu, bivua ne miandiku ivua mifidibua kudi bamfumu, ku tshikondu ne tshikondu, tô ne ku matuku a mfumu Benyamina.

11 Ne bivua bifila kubangila kudi mfumu Benyamina, ku tshikondu ne tshikondu tô ne muvuabi bipona mu bianza bianyi. Ne mema, Molomo, ndi nsambila Nzambi bua bikubibua kubangila mpindiewu tô ne to. Ne ndi mumanya ne nebikala bikuba; bualu kudi malu manena mafundamu, bilondeshilawu bantu banyi ne bana babu nebalumbuluishibua mu dituku dinena ne dia ndekelu, bilondeshila dîyi dia Nzambi didi difunda.

12 Ne mpindiewu, bitangila mfumu Benyamina ewu—uvua ne amua makokangana munkatshi mua bantu benda nkayenda.

13 Ne biakalua kabidi ne misumba ya basalayi ya Bena Lamana yakapatuka mu bulaba bua Nefi, bua kuluisha bantu benda. Kadi monayi, mfumu Benyamina wakasangisha misumba yenda ya basalayi pamua, ne wakabakandamena; ne wakaluangana ne bukola bua diboku dienda nkayenda, ne muela wa mvita wa Labana.

14 Ne mu makanda a Mukalenga bakakokangana ne bena lukuna babu, tô ne pavuabu bashipa binunu bia bungi bia Bena Lamana. Ne biakalua ne bakakokangana ne Bena Lamana tô ne pavuabu babipata mu malaba a bupianyi buabu onsu.

15 Ne biakalua ne kunyima kua kuikala ne ba Kilisto ba mafi, ne mikana yabu ivua mikangibua, ne bobu banyokibua bilondeshila mibi yabu;

16 Ne kunyima kua kuikala ne bambi ba mafi, ne bayishi ne balongeshi ba mafi munkatshi mua bantu, ne ne bonsu aba banyokibua bilondeshila mibi yabu; ne kunyima kua kuikala ne makokangana ne matapuluka a bungi bua kuya kudi Bena Lamana, monayi, biakalua ne mfumu Benyamina, ne diambuluisha dia bambi bansantu bavua munkatshi mua bantu benda—

17 Bualu monayi, mfumu Benyamina uvua muntu munsantu, ne uvua mukôkesha bantu benda mu buakana; ne kuvua bantu bansantu ba bungi mu bulaba, ne bavua bamba dîyi dia Nzambi ne bukola ne ne bukôkeshi; ne bavua bakula mêyi matua bualu bua dîminyina dia nshingu dia bantu—

18 Pananku, ne diambuluisha dia aba, mfumu Benyamina, ku dikuata dia mudimu ne bukitu bua mubidi wenda bonsu ne bukôkeshi bua anyima wenda mujima, ne bambi kabidi, wakashikika kabidi ditalala mu bulaba.