Wase 103
Na ivakatakila sa soli yani mai vei Josefa Simici na Parofita mai Katiladi, Oaio, ena 24 ni Feperueri 1834. A ciqomi na ivakatakila oqo ni rau sa tadu oti yani ki Katiladi, Oaio, ko Pali P. Pereta kei Laimeni Waiti, ena nodrau ilakolako mai Misuri me ratou mai veivosaki kei na Parofita, me baleta na nodra vukei ka vakalesui na Yalododonu ki na nodra qele mai na yasayasa vaka-Jekesoni.
1–4, Na vuna ka vakatara kina na Turaga me ra vakararawataki na Yalododonu mai na yasayasa vaka-Jekesoni; 5–10, Era na qaqa tale na Yalododonu kevaka era sa muria na vunau; 11–20, Ena vueti ko Saioni ena kaukauwa, ka na liu na Turaga vei ira na Nona tamata; 21–28, Me ra soqoni vata yani ki Saioni ko ira na Yalododonu, ko ira sa vakayalia na nodra bula era na rawata tale; 29–40, Era sa lesi eso na turaga me ra vakarautaka na Keba mai Saioni ka lako ki Saioni; sa yalataki ni ra na qaqa kevaka era sa yalodina.
1 Au sa kaya vakaidina vei kemudou na wekaqu, raica, au na solia vei kemudou e dua na ivakatakila ka ivakaro mo dou kila vinaka kina na ivakarau mo dou qarava vinaka kina na nomudou itavi me baleta na nodra vakabulai ka vueti na wekamudou, era sa veiseyaki tu ena vanua ko Saioni;
2 Ena nodra sa vakasavi ka yaviti ena ligadra na noqu meca, ia au na qai sovaraka vei ira na noqu cudru waqawaqa e sega ni vakaiyalayala ena gauna ka’u sa lewa.
3 Niu a laivi ira tiko me yacova mai na gauna oqo, me ra vakatawana na ivakarau ni nodra ivalavala ca, me sinai sara;
4 Me rawa ni ra cudruvi mada kina ena dua na cudru mosi ka rarawa ko ira era sa vakatokai ira ena yacaqu me dua na gauna lekaleka, baleta ni ra a sega ni vakarogoca vakavinaka sara na ivakavuvuli kei na ivakaro kau a solia vei ira.
5 Ia au sa kaya vakaidina vei kemudou, au sa vakatauca oqo e dua na lewa me ra kila na noqu tamata, ni ra sa tekivu vakarorogo ena gauna sara ga oqo ki na ivakasala au na solia vei ira koi Au na Turaga na nodra Kalou.
6 Raica au sa lewa, ni sa na tekivu sara ga ena auwa oqo na nodra rawai ira na noqu meca.
7 Ia ni ra sa muria tiko ga na vosa kece au na vosataka vei ira koi Au na Turaga na nodra Kalou, ena sega sara ni mudu na nodra rawai ira tiko me yacova ni ra sa vakamalumalumutaki e ruku ni yavaqu na veimatanitu e vuravura, ka soli yani na vuravura vei ira na yalododonu, me ra taukena me sega ni mudu ka sega ni mudu.
8 Ia kevaka era sa sega ni muria na noqu ivakaro ka sega ni qarauna me ra muria tiko na noqu vosa kecega, era na rawai mai na veimatanitu e vuravura.
9 Raica era a viritu me rarama kei vuravura, ka me ra nodra ivakabula na tamata;
10 Ia kevaka era sa sega ni nodra ivakabula na tamata, era sa tautauvata ga kei na masima sa seyavu tani na kena tuituina, a sa sega kina ni yaga ena dua na ka, me biu ga ki tautuba me ra butuka sobu ko ira na tamata.
11 Ia au sa kaya vakaidina vei kemudou; au sa lewa me ra na lesu tale ki na vanua sa nodra ivotavota vakawa, io me ra na la’ki tara cake na veiyasana lala mai Saioni.
12 Ia me vaka au a tukuna ena noqu ivakaro e liu vei kemudou, ena qai yaco na veivakalougatataki ni sa oti na veivakararawataki.
13 Raica oqo na veivakalougatataki au a yalataka ni sa oti na nomudou vakararawataki, kei na nodra vakararawataki na wekamudou—na nomudou vueti, kei na nodra vueti na wekamudou, io na nodra vakalesui tale ki na vanua ko Saioni, me ra vakadeitaki, ka sega tale ni vakabalei.
14 Ia, kevaka era sa vakadukadukalitaka na nodra ivotavota vakawa, era na vakabalei sobu; raica au na sega ni vosoti ira kevaka era sa vakadukadukalitaka na nodra ivotavota vakawa.
15 Raica, au sa kaya vei kemudou, na vakabulai nei Saioni ena yaco mai ena kaukauwa;
16 O koya, au na vakatubura kina e dua mai vei ira na noqu tamata, o koya ena qai liutaki ira me vaka a liutaki ira na luvei Isireli ko Mosese.
17 Ni dou sa luvei Isireli, ka dou sa kawa i Eparaama, ia sa dodonu mo dou sereki tani mai na veivakabobulataki ena kaukauwa, kei na liga sa dodo tu.
18 Ia me vaka era a sereki e liu na nomudou qase, ena vakatale ga kina na vakabulai kei Saioni.
19 O koya, me kakua kina ni rere na lomamudou, raica au sa sega ni tukuna vei kemudou me vaka au a tukuna vei ira na nomudou qase: Ni ra na liu vei kemudou na noqu agilosi, ia e sega ni kequ iserau.
20 Ia au sa kaya vei kemudou: Era na liu vei kemudou na noqu agilosi, ka vakakina na kequ iserau, ia ena yaco na gauna dou na taukena kina na vanua yalataki.
21 E dina, e dina au sa kaya vei kemudou, au sa vakatautauvatataki Josefa Simici Lailai na noqu tamata, kei na nona tamata na iTaukei ni were ni vaini ka tukuni ena vosa vakatautauvata ka’u a tukuna vei kemudou.
22 Ia me vosa mada ko Josefa Simici Lailai na noqu tamata, ki vei ira na noqu tamata digitaki, ko ira na noqu cauravou kei na tamata uabula—Dou soqoni kemudou vata yani ki na vanua ko Saioni, io ki na vanua au sa volia ena ilavo sa vakatabui me noqu.
23 Ia na isoqosoqo lewe ni lotu kece me ra talai ira yani na tamata vuku vata kei na nodra ilavo, ka la’ki volia na qele me vaka ka’u sa vakarota vei ira.
24 Ia kevaka era sa vorati kemudou ka vakasavi kemudou mai na vanua yalataki na noqu meca, ka’u sa vakatabuya me tara kina ko Saioni, io me ra vakasavi kemudou tani mai na nomudou vanua ni sa tu vei kemudou na ivakadinadina oqo, mo dou beitaki ira kina e mataqu, mo dou qai cudruvi ira;
25 Ia ko ira kecega dou sa cudruva, au na cudruva tale ga, io dou na qai sauma vei ira na noqu meca na nodra caka cala vei au.
26 Ia ena tiko vata kei kemudou na noqu iserau ni dou sa cudruvaki au vei ira na noqu meca, me yacova na ikatolu ni itabatamata kei na kena ikava, io vei ira sa cati au.
27 Me kakua ni dua na tamata e rere ni solia na nona bula ena vukuqu; ia ko koya yadua sa solia na nona bula ena vukuqu, ena kunea tale.
28 Ia ko koya sa sega ni via solia na nona bula ena vukuqu, sa sega ni noqu tisaipeli.
29 Sa noqu lewa me tabalaka cake na domona ko Sidini Rikitoni na noqu tamata vei ira na ivavakoso lewe ni lotu ena veivanua mai na tokalau, me vakarautaki ira na isoqosoqo lewe ni lotu me ra muria na ivakaro au sa tukuna vei ira, me baleta na vakalesui mai kei na vueti kei Saioni.
30 Sa noqu lewa me rau kakua ni lesu tale ki na nodra vanua na wekadrau na noqu tamata ko Pali P. Pereta kei na noqu tamata ko Laimeni Waiti, me yacova ni sa so na nodrau ilawalawa me ra lako cake vata ki na vanua ko Saioni, io me ra lakolako yatini, se yaruasagavulu, se yalimasagavulu, se yadua na drau, io me yacova ni ra sa lewe lima na drau taucoko na noqu tamata digitaki.
31 Raica oqo na noqu lewa; dou kerekere ka na soli vei kemudou; ia era sa sega tu ga ni dau muria na tamata na noqu lewa.
32 Ia kevaka drau sa sega ni rawata e le lima na drau, drau segata vagumatua mo drau rawata mada ga e le tolu na drau.
33 Ia kevaka drau sa sega ni rawata e le tolu na drau, drau segata vagumatua mo drau rawata mada ga e le dua na drau.
34 Ia au sa kaya vakaidina vei kemudrau, au sa solia vei kemudrau e dua na ivakaro, mo drau kakua ni lako cake ki na vanua ko Saioni me yacova ni drau sa rawata e dua na drau na noqu tamata digitaki, me ra lako vata kei kemudrau ki na vanua ko Saioni.
35 Ia, me vaka au sa kaya vei kemudou, dou kerekere ena soli vei kemudou; dou masu vagumatua me na rawa ni lako vata kei kemudou ko Josefa Simici Lailai na noqu tamata, ka me liutaki ira na noqu tamata, io me tauyavutaka na noqu matanitu ena vanua sa vakatabui, ka vakadeitaki ira na lewei Saioni ena lawa kei na ivakaro sa tu rawa oqo kei na kena ena qai soli vei kemudou.
36 Na qaqa kece kei na lagilagi ena rawa ena vukumudou ena nomudou gugumatua, yalodina, kei na nomudou masu ni vakabauta.
37 Me lako na noqu tamata ko Pali P. Pereta, vata kei Josefa Simici Lailai na noqu tamata.
38 Me lako na noqu tamata ko Laimeni Waiti, vata kei Sidini Rikitoni na noqu tamata.
39 Me lako na noqu tamata ko Airame Simici, vata kei Veretariki G. Viliame na noqu tamata.
40 Me lako na noqu tamata ko Osoni Aidi, vata kei Osoni Pereta na noqu tamata, ena vanua cava ga ena vakasalataki rau kina ko Josefa Simici, Jun., na noqu tamata, me rawa kina ni vakataucokotaki na ivakaro oqo au sa solia vei kemudou, ka qai laiva na kena vo e ligaqu. A sa vakakina. Emeni.