1 O Lenei, faauta, Ou te fai atu ia te oe, ona ua e tuu atu i lima o se tagata amioleaga tusitusiga na tuu atu ia te oe le mana e faaliliu ai e ala i le Urima ma le Tumema, o lea ua leiloa ai ia te oe.

2 Ma sa toesea foi lau meaalofa i lea lava taimi, ma sa oo ina faapouliuligia lou mafaufau.

3 Ae ui i lea, ua toefuatai atu nei ia te oe; o lea, vaai ia e faamaoni ma faaauau pea i le faamaeaina o le toega o le galuega o le faaliliuga e pei ona e amata mai ai.

4 Aua le momo’e televave pe galue sili atu nai lo le malosi ua ia te oe ma ala ua tuu atu e mafai ai ona e faaliliu; ae ia e filiga e oo i le iuga.

5 Tatalo e lē aunoa, ina ia mafai ona e sau ai o lē ua manumalo; ioe, ina ia mafai ona e manumalo ia Satani, ma ina ia e sao ese mai lima o auauna a Satani ua sapasapaia lana galuega.

6 Faauta, sa latou saili e faaumatia oe; ioe, e oo lava i le tagata o lē na e faatuatuaina na saili e faaumatia oe.

7 Ma o le pogai lenei na Ou fai atu ai o ia o se tagata amioleaga, ona sa saili o ia e aveese mea na faatuatuaina atu ia te oe; ma sa saili foi o ia e faaumatia lau meaalofa.

8 Ma ona ua e tuu atu tusitusiga i ona lima, faauta, ua ave i latou e tagata amioleaga mai ia te oe.

9 O lea, ua e tuu atu i latou, ioe, ia mea ua paia, i e amioleaga.

10 Ma, faauta, ua tuu e Satani i o latou loto e sui upu na e faia ia tusia, po o ia na e faaliliuina, lea ua tea ese atu mai ou lima.

11 Ma faauta, Ou te fai atu ia te oe, ona ua latou suia upu, ua ese lo latou faitauina mai mea na e faaliliuina ma faia ia tusiaina;

12 Ma, o le ala lenei, ua saili ai le tiapolo e faataoto se fuafuaga poto, e mafai ai ona ia faaumatia lenei galuega;

13 Ona ua ia tuu i o latou loto ia faia lenei mea, ina ia mafai, i le pepelo, ona latou fai mai ua latou maua oe i upu na e faatagā faaliliuina.

14 E moni, Ou te fai atu ia te oe, Ou te lē tuu atu ia faataunuu e Satani lana fuafuaga leaga i lenei mea.

15 Aua faauta, ua tuu e ia i o latou loto e uunai oe ia e tofotofo i le Alii lou Atua, i le ole atu lea ia toe faaliliu ia upu.

16 Ma, faauta, ona latou fai ane lea ma mafaufau i o latou loto—O le a tatou vaai pe na tuu mai e le Atua ia te ia le mana e faaliliu ai; afai na faapea, o le a ia toe tuu mai ia te ia le mana;

17 Ma afai e toe tuu mai e le Atua ia te ia le mana, pe afai e toe faaliliu o ia, po o, i ni isi upu, afai na te aumai upu lava ia e tasi, faauta, ua i ai ia te i tatou ia lava upu e tasi, ma ua tatou suia i latou;

18 O lea o le a lē tutusa i latou, ma o le a tatou fai atu ai ua pepelo o ia i ana upu, ma ua lē o ia te ia se meaalofa, ma ua lē o ia te ia se mana;

19 O lea o le a tatou faaumatia ai o ia, ma le galuega foi; ma o le a tatou faia lenei mea ina ia tatou lē maasiasi i le iuga, ma ina ia tatou maua viiga a le lalolagi.

20 E moni, e moni, Ou te fai atu ia te oe, ua i ai ia Satani se uumau malosi i o latou loto; ua ia faaoso a’e i latou i le amioletonu e faasaga i mea ua lelei;

21 Ma ua eleelea o latou loto, ma tumu i le amioleaga ma mea inosia; ma ua latou fiafia i le pouliuli nai lo le malamalama, ona ua leaga a latou mea e fai; o lea latou te lē ole mai ai ia te a’u.

22 Ua faaoso a’e i latou e Satani, ina ia mafai ona ia taitai atu o latou agaga i le faafanoga.

23 Ma ua faapea ona ia faataoto o se fuafuaga poto, i le manatu e faaumatia ai le galuega a le Atua; ae o le a Ou manaomia lenei mea mai o latou lima, ma o le a liliu i lo latou maasiasi ma tausalaga i le aso o le faamasinoga.

24 Ioe, ua ia faaoso a’e o latou loto ia feitai e faasaga i lenei galuega.

25 Ioe, ua ia fai atu ia te i latou: Ia taufaasese ma lamalama e pu’e, ina ia mafai ona outou lepeti; faauta, ua lē o se mea e leaga lenei mea. Ma ua faapea ona ia faasee o i latou, ma fai atu ia te i latou e lē o se agasala le pepelo ina ia latou maua ai se tagata i se pepelo, ina ia mafai ona latou faaumatia o ia.

26 Ma ua faapea ona ia faasee o i latou, ma taitai ai i latou seia oo ina tosoina e ia o latou agaga i lalo i seoli; ma ua faapea ona ia faia ia te i latou, ia maua ai i latou lava i la latou lava mailei.

27 Ma ua faapea ona alu o ia i luga ma lalo, i lea mea ma lea mea i le lalolagi, e saili e faaumatia agaga o tagata.

28 E moni, e moni, Ou te fai atu ia te oe, oi talofa ia te ia o lē e pepelo e faasese atu ai ona ua manatu o ia ua pepelo se tasi tagata e faasese mai ai, ona o tagata faapea e lē sao mai le faamasinotonu a le Atua.

29 O lenei, faauta, ua latou suia nei upu, ona ua fai atu Satani ia te i latou: Ua ia faaseseina outou—ma ua faapea ona ia faasee ese o i latou ia fai le amioletonu, e faaoso ai oe ia e faaosooso i le Alii lou Atua.

30 Faauta, Ou te fai atu ia te oe, ia e le toe faaliliuina ia upu ua tea ese atu mai ou lima;

31 Aua, faauta, o le a latou lē faataunuuina a latou fuafuaga leaga i le pepelo e faasaga i upu na. Aua, faauta, afai e te aumai ia lava upu e tasi, o le a latou fai mai ua e pepelo ma ua e faatagā faaliliuina, ae ua e toe tetee ia te oe lava.

32 Ma, faauta, o le a latou faasalalauina lenei mea, ma o le a faamaaa e Satani loto o tagata e faaoso ai i latou ia feitai faasaga mai ia te oe, o le a latou lē talitonu ai i a’u upu.

33 Ua faapea ona manatu o Satani e faatoilalo lau molimau i lenei tupulaga, ina ia lē mafai ona agai ai i luma le galuega i lenei tupulaga.

34 Ae faauta, o le poto lenei, ma ona ua Ou faaali atu ia te oe le poto, ma tuu atu ia te oe poloaiga e faatatau i nei mea, le mea e tatau ona e faia, aua le faaalia atu lenei mea i le lalolagi, seia maea ona e faataunuu o le galuega o le faaliliuga.

35 Aua e te ofo ina ua Ou fai atu ia te oe: O le poto lenei, aua le faaalia atu lenei mea i le lalolagi—ona sa Ou fai atu, aua le faaalia atu lenei mea i le lalolagi, ina ia faasaoina ai oe.

36 Faauta, Ou te lē o fai atu aua e te faaalia atu lenei mea i e ua amiotonu;

37 Ae ona e lē mafai ona e iloa i taimi uma e ua amiotonu, pe ona e lē mafai ona e iloa e ua amioleaga mai e ua amiotonu i taimi uma, o lea ua Ou fai atu ai ia te oe, ia taofi lou filemu seia Ou vaai ua tatau ai ona faailoa atu o mea uma i le lalolagi e faatatau i le mataupu.

38 Ma o lenei, e moni Ou te fai atu ia te oe, o se tala o mea ia na e tusia, ia ua aveese atu mai ou lima, ua togitogia i luga o papatusi a Nifae;

39 Ioe, ma e te manatua na fai mai i tusitusiga na, e i ai se tala faapitoa tele atu e uiga i ia mea, ua tuuina mai i luga o papatusi a Nifae.

40 Ma o lenei, ona o le tala ua togitogia i luga o papatusi a Nifae ua faapitoa tele e uiga i mea ia o le a Ou aumai, e tusa ai ma lo’u poto, i le malamalama o tagata i lenei tala—

41 O lea, ia e faaliliu ai togitogiga ua i ai i luga o papatusi a Nifae, i lalo seia e oo atu lava i le nofoaiga a le tupu o Peniamina, pe seia e oo atu i mea ia na e faaliliuina, ia na e taofia;

42 Ma faauta, ia e lomia ia mea o se talafaamaumau a Nifae; ma o le a faapea ona Ou faafemēmēa’i ai o i latou o e ua suia a’u upu.

43 O le a Ou lē tuua ia latou faaumatia la’u galuega; ioe, o le a Ou faaali atu ia te i latou e sili atu lo’u poto nai lo le faitogafiti-poto o le tiapolo.

44 Faauta, ua latou maua na o se vaega, po o se otootoga o le tala a Nifae.

45 Faauta, e tele mea ua togitogia i luga o papatusi a Nifae ua tuuina mai ai ni vaaiga tetele atu e uiga i la’u talalelei; o lea, o le poto ua ia te a’u ua tatau ai ona e faaliliu o le vaega muamua lenei o togitogiga a Nifae, ma auina atu i le galuega lenei.

46 Ma, faauta, o le vaega atoa o totoe o lenei galuega o loo i ai vaega uma na o la’u talalelei na mananao i ai a’u perofeta paia, ioe, ma o’u soo foi, ia latou talosaga, ia oo mai i lenei nuu.

47 Ma sa Ou fai atu ia te i latou, o le a tuu atu ia te i latou lena mea e tusa ma lo latou faatuatua ia latou talosaga;

48 Ioe, ma o lo latou faatuatua lenei—ia oo atu i o latou uso o sa Lamanā, ma i latou uma foi o e ua avea ma sa Lamanā ona o a latou faatuiesega, la’u talalelei lea na Ou tuu atu ia te i latou ia latou talai atu.

49 O lenei, ua lē ona pau lea—o lo latou faatuatua ia latou talosaga o lenei, ia faailoa atu foi lenei talalelei, pe afai o le a mafai ona maua e isi atunuu lenei laueleele;

50 Ma sa faapea ona latou tuu ai o se faamanuiaga i luga o lenei laueleele ia latou talosaga, ia mafai e soo se tasi e talitonu i lenei talalelei i lenei laueleele ona maua le ola e faavavau;

51 Ioe, ina ia saoloto tagata uma o soo se atunuu, ituaiga, gagana, po o se nuu po o ai lava i latou.

52 Ma o lenei, faauta, e tusa ma lo latou faatuatua ia latou talosaga o le a Ou aumai ai le vaega lenei o la’u talalelei i le malamalama o o’u tagata. Faauta, Ou te lē aumaia e faaumatia ai mea ua latou maua, ae e ati a’e ai i luga.

53 Ma o le pogai lenei na Ou fai atu ai: Afai e lē faamaaaina e lenei tupulaga o latou loto, o le a Ou faatuina la’u ekalesia i totonu o i latou.

54 O lenei ua Ou lē fai atu lenei mea e faaumatia ai la’u ekalesia, ae ua Ou fai atu lenei mea e ati a’e ai i luga la’u ekalesia;

55 O lea, ai se tasi ua auai i la’u ekalesia, e lē tatau ona mata’u, ona o i latou ia o le a mautofi i le malo o le lagi.

56 Ae o i latou o e e lē matatau mai ia te a’u, pe tausi i a’u poloaiga, ae ua latou atia’e ekalesia ia te i latou lava e maua ai le ’oa, ioe, o i latou uma o e e fai amioleaga ma latou atia’e le malo o le tiapolo—ioe, e moni, e moni, Ou te fai atu ia te oe, o i latou ia o le a Ou faalavelaveaina, ma faia ia tetete ma luluina e oo i le totonugalemu.

57 Faauta, o A’u o Iesu Keriso, le Atalii o le Atua. Sa Ou sau i o’u lava, ae sa lē talia a’u e o’u lava.

58 O A’u o le malamalama ua susulu i le pouliuli, ae ua lē malamalama i ai le pouliuli.

59 O A’u o lē na fai atu—i o’u soo—Ua ia te A’u isi mamoe ua lē o i ai i lenei lotoa, ma e toatele e sa i ai sa lē malamalama mai ia te a’u.

60 Ma o le a Ou faaali atu i lenei nuu sa i ai ia te a’u ni isi mamoe, ma o i latou ia o se lala o le aiga o Iakopo;

61 Ma o le a Ou aumai i le malamalama a latou galuega ofoofogia sa latou faia i lo’u igoa;

62 Ioe, ma o le a Ou aumai foi i le malamalama la’u talalelei sa aoao atu ia te i latou, ma, faauta, o le a latou lē faafitia mea ua uma ona e maua, ae o le a latou atia’e i luga, ma o le a latou aumai i le malamalama aoaoga moni o la’u mataupu faavae, ioe, ma le mataupu faavae lea e tasi ua ia te a’u.

63 Ma Ou te faia lenei mea ina ia mafai ona Ou faatuina o la’u talalelei, ina ia mafai ona lē i ai o ni finauga e tele; ioe, ua faaoso e Satani loto o tagata i finauga e uiga i aoaoga o la’u mataupu faavae; ma ua latou sese i ia mea, ona ua latou faauiga ese tusitusiga paia ma lē malamalama ia te i latou.

64 O lea, o le a Ou fofola atu ai ia te i latou le mealilo tele lenei;

65 Aua, faauta, o le a Ou faapotopotoina i latou e pei ona ofaofatai e se matuamoa lana toloai i lalo o ona apaau, pe afai latou te lē faamaaa o latou loto;

66 Ioe, afai latou te fia o mai, e mafai ona latou o mai, ma taumamafa saoloto i le vai o le ola.

67 Faauta, o la’u aoaoga faavae lenei—ai se e salamo ma sau ia te a’u, o ia lava lea o la’u ekalesia.

68 Ai se na te folafola atu, e sili a’e pe itiiti ifo nai lo lenei, ua lē a a’u lava lea, ae ua tetee ia te a’u; o lea ua lē o ia o se o la’u ekalesia.

69 Ma o lenei, faauta, ai se ua auai i la’u ekalesia, ma tumau i la’u ekalesia e oo i le gataaga, o ia lea o le a Ou faatuina i luga o la’u papa, ma o le a lē mafai e faitotoa o seoli ona manumalo e faasaga ia te i latou.

70 Ma o lenei, ia manatua upu a ia o lē o le ola ma le malamalama o le lalolagi, o lou Togiola, o lou Alii ma lou Atua. Amene.