1 Em̧ool āindein Irooj ej ba n̄an eok rikarejera Tomas: Iaar ron̄ jar ko am; im joortak ko am rekar wanlōn̄tak āinwōt juon mennin keememej Im̧aō, ilo etan ro, jeiūm̧ im jatūm, ro kar kāālet er n̄an kwaļo̧k kam̧ool kōn Eta im n̄an jilkinļo̧k ijoko rettoļo̧k ilubwiljin aolep laļ ko, bwij ko, lo ko, im armej, im kar kapit er kōn jerbal an ro karejera.

2 Em̧ool Ij ba n̄an eok, ekar wōr jet men ko ilo būruōm̧ im ippam̧ ko me N̄a, Irooj, ekar jab bun̄ Buruō kaki.

3 Mekarta, toun wōt am kar kōttāik eok naaj kautiej eok; kōn menin, aolep jero̧wiwi ko am em̧ōj jeoriļo̧k jān eok.

4 Būruōm̧ en lem̧ōņōņō im̧aan Meja; im kwo naaj kam̧ool kōn Eta, jab wōt n̄an ro riAelōn̄ ko, a barāinwōt n̄an riJu ro; im kwo naaj jilkinļo̧k naan eo Aō n̄an jem̧ļo̧k ko in laļ.

5 Kwōn jum̧ae, kōn menin, jibbon̄ ilo̧k jibbon̄; im raan ilo̧k raan kōtļo̧k bwe ainikien kakkōl am en ilo̧k; im n̄e bon̄ ej itok jab kōtļo̧k bwe ro rej pād ilaļ in ren kiki, kōnke ekkōnono eo am.

6 Kwōn kwaļo̧k jikin jokwe eo am ilo Zaion, im jab em̧m̧akūt jān m̧weo im̧ōm; bwe N̄a, Irooj, Ippa ewōr juon jerbal eļap n̄an kwe n̄an kōm̧m̧ane, ilo kabun̄bun̄ļo̧k Eta ilubwiljin ro nejin armej raņ.

7 Kōn menin, mejmije laļūm̧ n̄an jerbal eo. Kwōn erre neem barāinwōt, bwe kwe em̧ōj kāālet eok, im iaļ eo am ej pād ilubwiljin toļ ko, im ilubwiljin elōn̄ laļ ko.

8 Im jān naan eo am elōn̄ ro reutiej naaj kōttāik er, im jān naan eo am elōn̄ ro rettā naaj kautiej er.

9 Ainikiōm enaaj juon kauwe n̄an eo ebōd; im ilo am kauwe loōn riruruwe ej bōjrak an ankeke.

10 Kwōn kōttāik eok; im Irooj am Anij enaaj tōl eok kōn peim, im lewōj n̄an eok uwaak n̄an jar ko am.

11 I jeļā būruōm̧, im Iaar ron̄ jar ko am kōn ro jeiūm̧ im jatūm. Kwōn jab jepiaer ilo iakwe ilōn̄inļo̧k ro jet, a am iakwe en n̄an er āinwōt n̄an kwe make; im am iakwe en ļap n̄an aolep armej, im n̄an aolep ro rej iakwe Eta.

12 Im jar kōn ro jeiūm̧ im jatūm Jon̄oulruo ro. Kwōn ekkan̄ am kauwe er kōn wōt Eta, im ren bōk kauwe kōn aolep jero̧wiwi ko aer, im kwōn tiljek Im̧aō n̄an Eta.

13 Im ālikin kapo ko aer, im eļap kaen̄tanaan, lo, N̄a, Irooj, I naaj būrom̧ōjļo̧k ilo̧kaer, im eļan̄n̄e rej jab kapen burueer, im kakijn̄en̄e kōnwaer ņae Eō, renaaj oktaktok, im I naaj kōmour er.

14 Kiiō, Ij ba n̄an eok, im ta ij ba n̄an eok, Ij ba n̄an aolep Jon̄oulruo ro: Jutak im kan̄ōrn̄ōr ipūm̧, kotak debwāāl eo am, ļoore Eō, im naajdik sip ko Aō.

15 Jab lelōn̄ļo̧k kom̧ make; jab jum̧ae rikarejera Josep; bwe em̧ool Ij ba n̄an kom̧, Ij pād ippān, im Peiū renaaj pād ioon; im ki ko me Iaar liļo̧k n̄an e, im barāinwōt waj n̄an kom̧, naaj ban bōki jān e m̧ae iien Ij itok.

16 Em̧ool Ij ba n̄an eok, rikarejera Tomas, kwe kwōj juon em̧m̧aan eo Iaar kāālete n̄an kabwijer ki ko an aelōn̄ eo Aō, āinwōt an ekkejel ļo̧k n̄an Jon̄oulruo ro, ijoko rettoļo̧k ilubwiljin aolep laļ ko—

17 Bwe kwōn maron̄ rikarejera n̄an kōpeļļo̧ke kōjām eo an aelōn̄ eo ilo aolep jikin ko ijoko rikarejera Josep, im rikarejera Sidney, im rikarejera Hyrum, reban maron̄ itok;

18 Bwe ioer Iaar likūt eddo in aolep jarlepju in rijar ko ium̧win jidik iien.

19 Kōn menin, jabdewōt jikin eo renaaj jilkinļo̧k eok, kwōn ilo̧k, im I naaj pād ippam̧; im ilo jabdewōt jikin kwōnaaj kabun̄bun̄ļo̧k Eta juon kōjām ewōr tokjān enaaj peļļo̧k n̄an eok, bwe ren maron̄ bōk naan eo Aō.

20 Jabdewōt eo ej bōk naan eo Aō ej bōk Eō, im jabdewōt eo ej bōk Eō, ej bōk er, Presidency eo Kein Kajuon, ro Iaar jilkinļo̧k er, ro Iaar kōm̧m̧an bwe ren rikōkapilōklōk ro kōn wōt Eta n̄an kom̧.

21 Im bar juon alen, Ij ba n̄an kom̧, bwe jabdewōt eo kom̧ naaj jilkinļo̧k ilo Eta, jān ainikien ritōl ro, Jon̄oulruo ro, kajejjet ilo jakem̧aanļo̧k im kōmālim jān eok, enaaj wōr aer kajoor n̄an kōpeļļo̧k kōjām in aelōn̄ eo Aō n̄an jabdewōt laļ ijoko jabdewōt kwōnaaj jilkinļo̧k er—

22 Toun wōt aer naaj kōttāik er make Im̧aō, im pād ilo naan eo Aō, im eo̧ron̄e ainikien Jetōb eo Aō.

23 Em̧ool, em̧ool, Ij ba n̄an kom̧, maroklep ej kalbubuuk laļ, im maroklep eļap epād ilo ļōmņak ko an armej, im aolep kanniōk em̧ōj aer ijurwewe im̧aan Meja.

24 Lo, idenoņe em̧ōkaj an itok ioon aolep ro rej pād ilaļ, juon raan in libabne, juon raan in kattil, juon raan in kōlo̧urō, in jan̄, in būrom̧ōj, im in liaajlo̧ļ; im āinwōt juon aire enaaj itok ioon aolepān mejān laļ, Irooj ej ba.

25 Im ioon m̧weo Im̧ō enaaj ijjino, im jān m̧weo Im̧ō enaaj ilo̧k, Irooj ej ba;

26 M̧oktata ilubwiljin ro ilubwiljim, Irooj ej ba, ro rekar kōmmejāje n̄an jeļā Eta im rekar jab jeļā wōn N̄a, im ro rekar blaspim ņae Eō ilujeen m̧weo Im̧ō, Irooj ej ba.

27 Kōn menin, lale bwe kwōn jab kainepataik eok kōn jerbal ko an kabun̄ eo Aō ilo jikin in, Irooj ej ba.

28 Ak karreoik būruōm̧ Im̧aō; innām kwōn ilo̧k ilo aolepān laļ, im kwaļo̧k naan kōn gospel eo Aō n̄an aolep armej ro rejjan̄in kar bōk e;

29 Im eo ej tōmak im ej peptaij enaaj mour, im eo ej jab tōmak, im ej jab peptaij, enaaj jako.

30 Bwe n̄an kom̧, Jon̄oulruo ro, im er, Presidency eo Kein Kajuon, ro kar jitōn̄ er ippam̧ bwe ren am rikōkapilōklōk im am ritōl, kajoor eo an priesthood eo kar lewōj, n̄an raan ko āliktata im n̄an iien eo āliktata, eo me ilo e ej tarlep in tōrean iien bōk ko,

31 Kajoor eo kom̧ij kabwijere, ej ekkejeltok ippān aolep ro rekar bōke juon tōrean iien bōk eddo ilo jabdewōt iien jān jinoin kōm̧anm̧an eo;

32 Bwe em̧ool Ij ba n̄an kom̧, ki ko an tōrean bōk eddo in, eo kom̧ ar bōk e, eaar wanlaļtak jān ro jemāmi, im āliktata ian aolep, kar jilkinlaļtak jān lan̄ n̄an kom̧.

33 Em̧ool Ij ba n̄an kom̧, lo ekōjkan an ļap kūr eo ami. Karreoik būruōmi im men ko ballemi, n̄e bōtōktōkin epepen in ab aikuji jān peimi.

34 Kom̧in tiljek m̧ae Aō itok, bwe em̧ōkaj Aō itok; im wōņāān eo jān Eō ippa n̄an kōļļāik kajjojo armej enaaj ekkar n̄an jerbal ko an. N̄a Alpa im Omega. Amen.