Wase 118
Na ivakatakila sa soli yani mai vei Josefa Simici na Parofita e Fa Wesi, Misuri, ena 8 ni Julai 1838, me isau ni vakatakekere oqo, “Oi Kemuni na Turaga, ni vakatakila mada vei keitou na lomamuni me baleti iratou na Le Tinikarua.”
1–3, Sa na vakarautaka na Turaga na veika me baleti ira na nodratou dui matavuvale na Le Tinikarua; 4–6, Me vakatawani tale na itutu sa lala ena Tinikarua.
1 Sa kaya vakaidina vakaoqo na Turaga: Me kacivi kusarawa sara oqo e dua na koniferedi; me cokonaki kina na Tinikarua; me ra lesi na turaga me ra sosomitaki ira era sa lutu yani.
2 Me tei toka mada ena dua na gauna ena vanua ko Saioni ko Tomasi na noqu tamata, me tabaka vakaivola na noqu vosa.
3 Ko ira na kena vo me ra ia tiko ga yani na vunau mai na gauna ko ya, ia kevaka era sa vakayacora oqo ena yalo lokumi, ena yalomalumalumu, yalomalua, ena vosota vakadede kei na ivalavala malua, au sa yalataka vei ira, koi Au na Turaga, ni’u na vakarautaka na veika e baleta na nodra matavuvale; raica ena dolavi vei ira e dua na katuba mana, ena gauna oqo ka lako yani.
4 Ia me ra cavutu ena vulaitubutubu ka tarava ka lako kosova yani na veiwasawasa lelevu ka vunautaka yani na noqu kosipeli, io ena kena taucoko, ka vakadinadinataka na yacaqu.
5 Ia me ra biubiu mai vei ira na noqu yalododonu ena koro ko Fa Wesi, ena ikaruasagavulu kaono ni siga ni Epereli ka tu mai, mai na vanua sa digitaki me tara kina na noqu vale, sa kaya na Turaga.
6 Me ratou kacivi na noqu tamata ko Joni Teila, kei na noqu tamata talega ko Joni E. Peji, kei na noqu tamata talega ko Wilivote Uturavu, kei na noqu tamata talega ko Wiladi Rusiate, me ratou vakatawana na itutu era sa vakalala ko ira era sa lutu yani, ka me tukuni sara yani vei iratou na nodratou ilesilesi.