1 Le Atua e, o fea ea lau afio? Ma o fea o i ai le faapaologa ua ufitia ai lou lafitaga?

2 O le a le umi e taofia ai lou aao, ma silasila mai ai mai le lagi faavavau lou fofoga, ioe, lou fofoga manino, i sese ua faia i lou nuu ma au auauna, ma oo atu ai i ou fofoga o a latou tagi?

3 Ioe, le Alii e, o le a le umi latou te mafatia ai i nei sese ma sauaga e lē tusa ai ma le tulafono, ae lei faamalūlūina lou finagalo ia te i latou, ma uunaia ai lou finagalo i le agaalofa ia te i latou?

4 E, le Alii e le Atua Malosi Aoao, o Lē na faia le lagi, lalolagi, ma sami, ma mea uma o i ai, o lē na te taofiofi ma pulea le tiapolo, ma le malo pogisa ma faapouliuligia o Seoli—faaloaloa mai ia lou aao; sei ati mai ia lou fofoga-silasila; sei to a’e ia i luga lou faapaologa; ia lē toe punia lou lafitaga; sei uai mai ia ou fofoga; sei faamalūlūina lou finagalo, ma liuliu mai ia lou finagalo agaalofa ia te i matou.

5 Ia tuu atu lou toasa e sasao faasaga i o matou fili; ma, ia e tauimasui i matou i le toasa tele o lou finagalo ma lau pelu, mo sese ua faia ia te i matou.

6 Ia manatua lau au paia mafatia, lo matou Atua e; ma o le a olioli ai au auauna i lou suafa e faavavau.

7 Lo’u atalii e, ia filemu lou agaga; o lou tiga ma ou puapuaga o le a na o sina taimi laitiiti;

8 Ma ona oo lea, afai e te gafatia lelei, o le a faaeaina oe e le Atua i lugā; o le a e manumalo i ou fili uma.

9 O loo tutulai au uo i ou tafatafa, ma o le a latou toe faafeiloa’i ia te oe ma loto mafana ma lima faauo.

10 E lei avea lava oe e pei o Iopu; e lē o finau au uo faasaga mai ia te oe, pe tuua’i oe i se solitulafono, e pei ona latou faia ia Iopu.

11 Ma o i latou o e ua tuua’ia oe i le solitulafono, o le a lepetiaina lo latou faamoemoe, ma o o latou faamoeme o le a liusuavai ese e pei ona liusuavai le sau to’a i luma o ave mumū o le la oso;

12 O lenei foi ua faatuina e le Atua lona aao ma le faamaufaailoga e sui ai taimi ma tau, ma faatauaso o latou mafaufau, ina ia lē mafai ona latou malamalama i ana galuega ofoofogia; ina ia mafai ona faamaonia ai foi e ia i latou ma maua ai i latou ia latou lava togafiti;

13 O lenei foi, ona ua eleelea o latou loto, o mea foi ua latou naunau ia aumaia i luga o isi, ma fiafia ia mafatia ai isi, e mafai ona oo mai i o latou lava luga i le atoatoa a’ia’i;

14 Ina ia latou faanoanoa ai foi, ma ia vavae ese ai o latou faamoemoe;

15 Ma e lē tele ni tausaga mai le taimi nei, ae o le a tafia ese i latou ma a latou fanau mai i lalo o le lagi, ua fetalai mai ai le Atua, ina seia leai se toatasi o i latou e totoe e tulai i tafatafa o le pa.

16 Ia fetuuina lava i latou uma o e e siia’e i luga le mulivae e faasaga i a’u ’au faauuina, ua fetalai mai ai le Alii, ma alaga ua latou agasala ae ua lē agasala i latou i o’u luma, ua fetalai mai ai le Alii, ae ua latou faia mea na tatau ai i o’u mata, ma na Ou poloaiina ai i latou.

17 Ae o i latou o e ua alalaga ua solitulafono, ua latou faia lea mea ona o i latou o auauna a le agasala, ma o fanau i latou lava o le lē usiusitai.

18 Ma o i latou o e e tauto pepelo e faasaga i a’u auauna, ina ia latou aumai i latou i le pologa ma le oti—

19 Oi talofa ia te i latou; ona ua latou faatausuai i a’u fanau iti, o le a vavae ese i latou mai sauniga o lo’u fale.

20 O le a lē tumu la latou ato, o le a fano o latou fale ma a latou falemanu, ma o le a inosia i latou lava e i latou o e na faaseeina i latou.

21 O le a latou lē maua le aiā i le perisitua, po o a latou fanau pe a mavae atu i latou mai lea tupulaga i lea tupulaga.

22 Sa sili ona lelei mo i latou pe a na nonoa se maaolo i o latou ūa, ma malelemo ai i latou i le loloto o le sami.

23 Oi talofa ia i latou uma o e ua faaatuatuvaleina o’u tagata, ma tulia, ma fasiotia, ma molimau faasaga ia te i latou, ua fetalai mai ai le Alii o ’Au; o le a lē sao lava se tupulaga o gata feai mai le malaia o seoli.

24 Faauta, ua vaai o’u mata ma iloa a latou galuega uma, ma ua Ou faaagagaina se faamasinoga vave i lona tau, mo i latou uma;

25 Aua ua i ai se taimi atofaina mo tagata taitoatasi, e tusa ai ma ana galuega.

26 O le a tuu atu e le Atua ia te outou le poto e ala i lona Agaga Paia, ioe, e ala i le meaalofa lē mafaamatalaina a le Agaga Paia, sa lei faaalia lava talu ona i ai le lalolagi sei oo mai i le taimi nei;

27 Lea sa faatalitali i ai tua’ā o o tatou tua’ā ma le faamoemoe naunautai e faaali mai i taimi mulimuli, lea sa faasino atu i ai o latou mafaufau e agelu, e pei ona taofia faaagaga mo le atoatoaga o lo latou mamalu;

28 E oo mai se taimi o le a leai ai se mea o le a taofia, pe toatasi se Atua o i ai pe toatele ni atua, o le a faaali mai lava i latou.

29 O nofoalii ma malo, itumalo ma mana uma, o le a faaali ma tuu mai i luga o i latou uma o e na tumau ma le lototoa mo le talalelei a Iesu Keriso.

30 O lenei foi, afai e i ai ni tuaoi ua faatutuina i le lagi po o le sami, po o i le laueleele matutu, po o i le la, masina, po o fetu—

31 O taimi uma o a latou taamilosaga, o aso atofaina uma, masina, ma tausaga, ma aso uma o o latou aso, masina, ma tausaga, ma o latou mamalu uma, tulafono, ma taimi faatutuina, o le a faaali mai i aso o le tisipenisione o le atoaga o taimi—

32 E tusa ma lena na faauuina i totonu o le Aufono a le Atua Faavavau o isi atua uma ae lei i ai le lalolagi lenei, e tatau ona faaagaga mo le faamae’aina ma lona iuga, pe a ulu atu tagata taitoatasi i lona afioaga faavavau ma i lona malologa ola pea.

33 O le a le umi e mafai ona tumau ai vai e tafe i le eleelea? O le a le mana e taofia ai le lagi? E pei ona lē mafai e le tagata ona faaloaloa atu lona lima faatauvaa e taofi ai le vaitafe o le Misuri i lona ala faatonuina, pe toe liliu ai i tua lona tafe, ua faapena ona lē mafai ona taofia le Malosi Aoao mai le liligi ifo o le malamalama mai le lagi i luga o ulu o le Au Paia o Aso e Gata Ai.

34 Faauta, e toatele e e valaaulia, ae toaitiiti e ua filifilia. Ma, pe aisea e lē filifilia ai i latou?

35 Aua ua pupū tele o latou loto i mea o lenei lalolagi, ma saili i viiga a tagata, ua latou lē aoaoina ai le lesona lenei e tasi—

36 O aiā a le perisitua ua fesootai e lē mavavaeeseina ma mana o le lagi, ma o mana o le lagi e lē mafai ona pulea pe faaaogaina tau lava i mataupu autu o le amiotonu.

37 Atonu e mafai ona faaee mai i latou i luga o i tatou, e moni; ae a tatou taumafai e ufiufi a tatou agasala, pe faamalie lo tatou faamaualuga, lo tatou fiasili lē aoga, pe faaaoga ai le pule po o le puleaga po o le faamalosi i luga o agaga o le fanauga a tagata, i soo se tikeri o le amioletonu, faauta, e aveese e le lagi i latou lava; e faanoanoa le Agaga o le Alii; ma a aveesea, Amene i le perisitua po o le pule a lena tagata.

38 Faauta, ae lei iloa e ia, ua tuua o ia ia te ia lava, e a’a i tui, e faasaua i le au paia, ma tau faasaga i le Atua.

39 Ua tatou aoao e ala i mea faanoanoa e tutupu mai e faapea o le natura ma le uiga o le toeitiitii lava o tagata uma, o le vave lava latou te maua ai sina pule itiiti, e pei ona latou manatu i ai, e vave lava ona latou amata le faaaogaina o le puleaga amioletonu.

40 O lena e toatele ai e e valaaulia, ae toaitiiti e ua filifilia.

41 E leai se mana po o se aafiaga e mafai pe tatau ona faatumauina ona o le perisitua, nao i le faatauanau, i le tali-tiga, i le agamaualalo ma le agamalu, ma le alofa faamaoni;

42 I le agalelei, ma le malamalama manino, lea o le a faalautele sili ai le agaga e aunoa ma le faagutugutulua, ma aunoa ma le faa’ole’ole—

43 E aoai atu i taimi e tatau ai ma le tuusao, pe a uunaia ai e le Agaga Paia; ma ona faaali atu ai lea pe a mavae, o se alofa faateleina ia te ia o lē na e aoaiina, ne’i manatu o ia ia te oe o sona fili;

44 Ina ia iloa ai e ia e sili atu le malosi o lou faamaoni i lo fusi o le oti.

45 Ia tuu foi lou loto ia tumu i le alofa mama i tagata uma, ma i le auaiga o le faatuatua, ma ia tuu le amiomamā e teuteuina ai ou mafaufauga e lē aunoa; ona faasolo malosi ai lea o lou lototele i luma o le Atua; ma o le a to ifo i luga o lou agaga le mataupu faavae o le perisitua e pei o le sau mai le lagi.

46 O le a avea le Agaga Paia ma āu soa e lē aunoa, ma o lou tootoo o le a avea ma se tootoo lē feliuliua’i o le amiotonu ma le upumoni; ma o lau puleaga o le a avea ma se puleaga tumau e faavavau, ma e aunoa ma ni ala faamalosia, o le a tafe mai ia te oe e faavavau faavavau lava.