Wase 121
Na masu kei na parofisai a vola ko Josefa Simici na Parofita ena dua na ivola ki na Lotu ena 20 ni Maji 1839, oqo ena gauna a tiko vakavesu kina ena vale ni veivesu mai Lipati, Misuri. Sa vula vica tiko ena vale ni veivesu ko koya na Parofita kei na so na nona itokani. A sega ni rawa ni ra vakacegui ena vuku ni nodra ivola ni kerekere kei na vakamamasu, ka a vakauti vei ira na vakaitutu liu kei na tabacakacaka ni veilewai.
1–6, Sa vakamasuta na Turaga ko koya na Parofita ena vukudra na Yalododonu era sa kune rarawa tu; 7–10, Sa tukuna vua na Turaga na vosa me vakacegu kina; 11–17, Era na cudruvi ko ira kece sa beitaka vakailasu ni ra sa talaidredre na tamata ni Turaga; 18–25, Era na cudruvi ka vakuwai mai na ilesilesi ni matabete; 26–32, Sa yalataki ni na vakatakilai na veika lagilagi vei ira sa gumatua sara ni vosota tiko; 33–40, Na vuna sa lewe levu kina e kacivi ka lewe lailai e digitaki; 41–46, Me taurivaki ga na matabete ena kena ivakarau dodonu.
1 Oi kemuni na Kalou, ko ni sa tiko evei? Evei na vale ni vakaruru sa ubia na nomuni ivunivuni?
2 A cava na kena dede ko ni na tarova tiko kina na ligamuni, kei na matamuni, io na matamuni savasava sara, ko ni sa sarava tiko kina mai na lomalagi tawamudu na veika rarawa sa yaco tiko vei ira na nomuni tamata kei ira na nomuni talai, kei na nomuni rogoca tiko na nodra tagi?
3 Io, Oi kemuni na Turaga, me vakaevei na kena dede me ra vosota tiko kina na veika rarawa kei na ivalavala tawadodonu sa vakayacori tiko vei ira, ni bera ni qai lomani ira na yalomuni, ka yalololoma vei ira na lomamuni?
4 Oi kemuni na Turaga na Kalou Kaukauwa, oi kemuni sa bulia na lomalagi, na vuravura, kei na wasawasa, kei na ka kecega sa tu kina, ko ni sa kila ka lewa na tevoro kei na tikina butobuto ko Sioli—mo ni dodoka mai na ligamuni; io me serau mai na matamuni; mo ni cereka mada na nomuni ivakaruru; ni cereka mada na ilati ni nomuni ivunivuni; mo ni vakala mai na daligamuni; mo ni loloma mada, ka yalololoma sara vei keimami na lomamuni.
5 Mo ni cudruvi ira mada na neimami meca; ia, ena katakata ni lomamuni, ena nomuni iseleiwau mo ni sauma na neimami vakacalai.
6 Oi Kemuni na Kalou, mo ni nanuma na nodra vakararawataki na nomuni yalododonu; io me ra vakacaucautaka tiko ga na yacamuni na nomuni talai me sega ni mudu.
7 Ia na luvequ, me vakacegu na yalomu; raica sa lekaleka wale ga na gauna ni nomu rarawa kei na vutugu;
8 Ia, kevaka ko sa vosota rawa, ena vakacerecerei iko cake na Kalou; raica ko na vakamalumalumutaki ira kecega na nomu meca.
9 Era na totaki iko tiko ga na nomu itokani, io era na ciqomi iko ena loma marau kei na liga loloma.
10 Ia ko sa sega ni vakataki Jope sara; era sa sega ni vakacacani iko na wekamu, se beitaki iko ni ko sa talaidredre, me vaka era a kitaka vei Jope.
11 Ia ko ira era sa beitaki iko ni ko sa talaidredre, ena vakarusai na nodra vakanuinui, io ena waicala ga yani na nodra inaki me vaka na uca cevata sa cilava na siga;
12 Raica sa dodoka yani na ligana na Kalou ka vakadeitaka me veisautaka na gauna kei na draki, ka vakabutobutotaka na nodra vakasama, me ra kakua ni kila na nona cakacaka e veivakurabuitaki; io me vakatovolei ira ka toboki ira ena nodra ilawaki qaseqase;
13 Ka vakakina ni sa ca sara na lomadra, ia na veika era sa nakita me ra vakavuna vei ira na tani, kei na nodra taleitaka me ra vakararawataki na tani, me na qai yaco ga vei ira ena kena levu duadua;
14 Era na rarawa vakalevu kina, ka na sega ni yaco na nodra inaki;
15 Ia ni se bera mada ni oti e vica na yabaki mai na gauna oqo, era na qai vakawabokotaki mai na rukui lomalagi ko ira kei ira na nodra kawa, sa kaya na Kalou, ka na sega ni duabulu vei ira e vo.
16 Era na cudruvi ko ira kecega era sa leqeti ira ka’u sa lumuta, ka kaya ni ra sa ivalavala ca ko ira sa caka dodonu e mataqu ka kitaka na ka au sa vakarota, sa kaya na Turaga.
17 Ia ko ira sa beitaki ira, era sa kitaka vakakina ni ra sa bobula ki na ivalavala ca ka dau talaidredre.
18 Era sa bubului vakailasu me baleti ira na noqu tamata, io me ra vakabobulataki ira ka vakamatei ira—
19 Raica ena ca sara vei ira; io ena bokoci tani sara na yacadra mai na cakacaka vakalotu ni noqu vale, ni ra sa vakacalai ira na noqu italai.
20 Raica ena lala na nodra sova, ka na rusa na nodra vale kei na nodra lololo, ia era na beci ira sara ko ira sa vakabekabei ira.
21 Ena sega ni soli na itutu vakabete vei ira, kei ira tale ga na nodra kawa, mai na itabatamata ki na itabatamata.
22 Raica a vinaka cake vei ira kevaka sa vakarubeci e domodra e dua na vatu iqaqi levu, ka ra vakalutudromutaki ena wasaliwa titobu.
23 Ena ca vei ira sa vakararawataki ira na noqu tamata, io vei ira sa vakasavi ira, ka vakadinadina me saqati ira, sa kaya na Turaga ni Lewe vuqa; oi kemudou na itabatamata ni gata, dou na sega ni drotaka rawa na cudruvi mai eli.
24 Ia, sa raica ka kila na mataqu na nodra cakacaka kecega, ka’u sa biuta vakawawa tu na lewa, ka na tau vakatotolo vei ira kecega ena kena gauna;
25 Raica sa dui tu na gauna, era na tarogi kina na tamata yadua ena nodra cakacaka.
26 Raica ena solia vei kemudou na Kalou na nona Yalo Tabu mo dou vuku kina, io ena isolisoli ni Yalo Tabu e sega ni vakamacalataki rawa, raica e sa sega mada ni vakatakilai na ka oqo, mai na ivakatekivu kei vuravura me yacova edaidai;
27 Oqo na ka era a namaka tu ena yalo vakanuinui ko ira na noda qase me na vakatakilai mai ena gauna mai muri, io sa tukuna vei ira na agilosi ni sa waraki ira tu na isolisoli oqo me taucoko kina na kedra lagilagi;
28 Ia ena yaco mai na gauna, ena sega ni vunitaki tiko e dua tale na ka, se duabau ga na Kalou se ra lewevuqa na kalou, era na qai vakatakilai mai.
29 Raica ena vakatakilai mai vei ira sa gumatua ni muria na kosipeli i Jisu Karisito na itikotiko vakaturaga, na veimatanitu, na matanitu vakatui, ko ira na turaga sa liu, kei ira na turaga kaukauwa.
30 Ia ena vakatakilai tale ga na iyalayala kei lomalagi, se na wasawasa se na vanua mamaca, io na matanisiga tale ga, na vula kei na kalokalo—
31 Raica ena vakatakilai ena veisiga ni itabagauna ni taucoko ni gauna na nodra veitosoyaki, na veisiga sa yalataki, na kena veivula kei na kena veiyabaki, io na gauna kece, na kena veisiga, na kedra lagilagi, na nodra ivakaro kei na nodra dui gauna yalataki—
32 A sa vakayacori kecega me vaka na ka sa lewai ena nodratou Bose na Kalou Tawamudu, io na nodra Kalou na kalou kecega, ni sa bera ni buli ko vuravura oqo, ia sa vakarautaki tu ki na iotioti ni gauna, ni ra sa na curu ko ira sa digitaki ki na nona iserau ka tiko ena nona ivakavakacegu me tawamudu.
33 A cava na kena dede ena dukadukali tiko kina na wai ni uciwai sa kui? Ia na kaukauwa cava ena tarovi lomalagi? Raica sa sega ni rawa vua na tamata me dodoka yani na ligana malumalumu me tarova kina na kui sobu ni uciwai na Misuri ena kena sala tudei, se me tarova na kena wai me tuva cake tale, ia sa sega tale ga ni rawa vua me tarova vakakina na Kalou Kaukauwa, me kakua ni sovaraka na kilaka mai lomalagi ena uludra na Yalododonu Edaidai.
34 Raica sa lewe vuqa era sa kacivi, ia sa lewe lailai ga sa digitaki. Ia a cava era sa sega ni digitaki kina?
35 Sa baleta ga ni sa rui domona na lomadra na veika ni vuravura oqo, ka ra gadreva me ra dokai kina mai vei ira na tamata, ia era sa sega ni vulica na ivakavuvuli oqo—
36 Raica, na kaukauwa vakabete sa semati tudei tu kei na kaukauwa vakalomalagi, ia e sega ni rawa me taurivaki se vakayacori na kaukauwa vakalomalagi ena sala tani, ena ivakavuvuli duadua ga ni buladodonu.
37 Sa dina ni rawa ni lesi vei keda; ia kevaka eda saga me da ubia na noda ivalavala ca, se me da qaciqacia, dokadoka se guraka se lewa vakaukauwa, se vakasaurarataka na yalodra na luve ni tamata, se taurivaka ena ivalavala cava ga e sega ni dodonu, sa na lako tani ko lomalagi; a sa rarawa na Yalo ni Turaga; ia ni sa lako tani, sa na oti vakadua na matabete kei na dodonu ni tamata ko ya.
38 Ia ena gauna e qai liaca kina, sa tu taudua ga, a sa caqeta na mata ni moto, ka vakacacani ira na yalododonu, ka veivala kei na Kalou.
39 Ia eda sa kila mai na veika rarawa sa yaco oti, ni sa ivakarau ka itovo ni voleka ni tamata kecega, ena gauna ga sa taura vakalailai kina e dua na veivakadonui, ena nodra vakasama, sa tekivu me tauca sara na lewa kaukauwa e tawadodonu.
40 Io sa lewe levu era sa kacivi, ka lewe lailai ga sa digitaki.
41 Sa sega sara ni kilikili me vakayacori na cakacaka vakabete ena ivakarau kaukauwa se vakasaurara, ia me vakayacori ga ena veivakauqeti, na vosota vakadede, na yalomalua, na yalomalumalumu, kei na loloma e sega ni veivakaisini;
42 Io ena yalovinaka, kei na kila ka savasava, raica ena vakalevulevui sara kina na yalona, ka sega vua na lawaki kei na veivakaisini—
43 Me veivunauci vakaukauwa sara ena veivakauqeti ni Yalo Tabu; ia me kusarawa ka lomani koya vakalevu cake a vunauca, kevaka e sega, sa na okata ko koya me kena meca;
44 Io me kila ko koya ni sa kaukauwa cake na nomu lomadina ka malumalumu na ivesu ni mate.
45 Ia me vakasinaiti na lomamuni ena loloma uasivi vei ira na tamata kecega, kei ira era sa veitokani ena vakabauta, me vakaiukuukutaki tiko ga na nomudou vakanananu ena ivalavala savasava; ia ena vakaukauwataki kina na nomu vakabauta ena mata ni Kalou; ka na drodro sobu mai ki yalomu na ivunau vakabete, me vaka na tegu sa lutu mai lomalagi.
46 Ena sala vata voli ga kei iko na Yalo Tabu, ia na nomu ititoko sa ititoko ni yalododonu kei na dina sa tudei sara; ia na nomu lewa sa lewa e tawavakaiyalayala, ia ena yalo galala ena drodrovi iko, me sega ni mudu ka sega ni mudu.