1 Era na taroga na yacamu mai na iyalayala kei vuravura, ia era na vakalialiai iko ko ira na lialia ka ra vorati iko na luvei eli;

2 Ia ko ira sa savasava na lomadra, kei ira sa vuku, kei ira sa itovo vakaturaga, kei ira sa yalododonu, era na vakasaqara na ivakasala, na kaukauwa, kei na veivakalougatataki ena veigauna mai na ligamuni.

3 Raica era na sega sara ni rawai na nomu itokani me ra vorati iko ena nodra ivakadinadina na nomu dau vere.

4 Ka dina ni na vakaleqai iko, ka biuti iko ki valeniveivesu na nodra sasaga, ia ko na dau rokovi tikoga; ia ena dua ga na gauna lekaleka sa na vakarerevaki vakalevu cake vei ira na kemu meca na domomu mai na domona na laione kila, ena vuku ni nomu buladodonu; ka na tiko ga e yasamu na nomu Kalou me sega ni mudu ka sega ni mudu.

5 Kevaka ko na sota kaya na veika rarawa; kevaka era na vakaleqai iko na wekamu vakailasu; kevaka era na vakaleqai iko na daubutako; kevaka ko na vakaleqai ena vanua mamaca se e wasawasa;

6 Kevaka ko na beitaki ena veimataqali veibeitaki vakailasu kecega; kevaka era na vorati iko na kemu meca; kevaka era na kaliraki iko tani mai vei tamamu kei tinamu kei ira na tacimu kei ira na ganemu; ia kevaka era na dulaka vei iko na iseleiwau ko ira na kemu meca ka kaliraki iko tani mai na lomaserei watimu, kei ira na luvemu, kei na luvemu tagane qase, e dina kevaka e se qai yabaki ono, me na lilita na nomu isulu, ka kaya, I tamaqu, I tamaqu, vakaevei mo tiko vata ga kei keitou? Isa, tamaqu, na cava era sa via kitaka vei iko na tamata oqo? Ia kevaka ena gauna oqori ena qai kaliraki tani mai vei iko ena iseleiwau, ka ko yarataki yani ki valeniveivesu, ka ra vakavolivoliti iko na nomu meca me vaka na wolifa era sa via vakamatea na lami;

7 Ia kevaka ko na biu ki na qara, se era tauri iko na daulaba, se tau vei iko na itotogi mate; kevaka ko sa biu ki na wasaliwa titobu; kevaka era sa nakita na biau lelevu me ra bikai iko; kevaka sa yaco me kemu meca na cagi kaukauwa; kevaka sa kumukumuni vata na o loaloa ni lomalagi, ka ra cokovata na vei vu ni ka me latia na nomu sala; ka me kena ilutua, kevaka ena dalaga na gusui eli me tilomi iko, mo kila tiko na luvequ, ni veika kece oqori ko na yalomatua kina, ka vinaka cake.

8 Raica na Luve ni Tamata sa vosota rawa na veika e toro sobu sara mai vei ira kecega. Ko sa vinaka cake li mai vua?

9 O koya, mo tudei tikoga kina ena nomu sala, ka na tikoga kina kei iko na matabete; ni sa dei tu na kedra iyalayala, ka ra na sega ni ulabaleta. Sa kilai tu na nomu veisiga, ka na sega ni tini dole na nomu veiyabaki; o koya, mo kakua kina ni rerevaka na veika e rawa ni vakayacora na tamata, ni na tiko vata kei iko na Kalou me sega ni mudu ka sega ni mudu.