1 Kōnke Irooj eaar kwaļo̧k n̄an eō bwe rikōjdat ro aō, jim̧or ilo Missouri im ilo Bukwōn in, rekar bar juon alen pukpukot eō; im toun wōt aer lukwarkware eō kōn ejjeļo̧k unin, im ejjeļo̧k jidik mōran kien ak jim̧we ippāer ilo aer lelōn̄tak liaakeļo̧k ko aer ņae eō; im toun wōt an aolep etao ko aer pedped ioon riab ilo uno ekilmeejtata, Iaar ļōmņak emennin aikuj im mālōtlōt ilo n̄a bwe in likūt jikin in ium̧win juon tōre ekadu, kōn jokane eo aō im jokane eo an armej rein. Ikōņaan ba n̄an aolep ro im ewōr aō jerbal ippāer, bwe em̧ōj aō likūt jerbal ko aō ippān ro riņa ainikiō im rijeje ro im renaaj kadedeļo̧k aolep jerbal ilo juon wāween eo em̧ōkaj im ekkar, im naaj lale bwe aolep m̧uri ko aō ren m̧aniļo̧k ilo iien eo ekkar, jān wiakake bwidej, ak ilo bar juon wāween, āinwōt case eo emaron̄ aikuji, ak āinwōt an jekjek ko maron̄ kōtļo̧ke. N̄e ijeļā bwe lan̄ eo elukkuun eļļā, innām inaaj ro̧o̧lwaj n̄an ippemi bar juon alen.

2 Im kōn kauwōtata ko me kūr eō bwe in deblo̧ki, āinwōt rej juon men edik n̄an eō, āinwōt ke juunm̧aade im illu an armej ekar ijo ekkā jikū aolepān raan ko in aō mour; im kōn ta unin ej āinwōt mennin ittino, ijello̧kun wōt n̄e kar kapit eō jān m̧okta jān pedped eo an laļ n̄an jet jem̧ļo̧k rem̧m̧an, ak nana, āinwōt ami naaj kāālet n̄an ba. Kom̧in ekajete n̄an kom̧ make. Anij ejeļā aolep men kein, eļan̄n̄e ej n̄an em̧m̧an ak nana. A mekarta, dān m̧wilaļ ej ta ij aikuj in aō ie. Em̧ōj an erom juon mennin imminene n̄an eō; im ij en̄jake, āinwōt Paul, n̄an likōmjāje ilo en̄taan; bwe n̄an rainin em̧ōj an Anij eo an ro jema lo̧mo̧o̧ren eō jān er aolep, im naaj lo̧mo̧o̧ren eō jān iien in m̧aanļo̧k; bwe lo, im lo, inaaj anjo̧ ioon aolep rikōjdat ro aō, bwe Irooj Anij eaar ba men in.

3 Ro rekwōjarjar ren aolep m̧ōņōņō, kōn menin, im kanooj lo̧udin̄din̄ otem lo̧udin̄din̄; bwe Anij an Israel ej Anij eo aer, im E naaj jon̄e wōņāān eo ejim̧we ioon bōran aolep rikebiōp ro aer.

4 Im bar juon alen, em̧ool āindein Irooj ej ba: Jerbal eo an tampeļ eo Aō, im aolep jerbal ko me Iaar jitōn̄e n̄an kom̧, ren wōnm̧aanļo̧k im jab bōjrak; im laļn̄ijn̄ij eo ami, im kijejeto eo ami, im kōmmaanwa, im jerbal ko ami ren karuo-aleer, im kom̧ naaj ilo ejja wāween in wōt jab m̧wijkōk jān woņeam̧i, Irooj in Inelep eo ej ba. Im eļan̄n̄e rej matōrtōre kom̧, āindein rekar matōrtōre rikanaan ro im armej ro rewānōk im̧aami. N̄an aolep men kein ewōr juon wōņāān ilo lan̄.

5 Im bar juon alen, Ij lewōj n̄an kom̧ juon naan kake peptaij ko kōn rimej ro ami.

6 Em̧ool, āindein Irooj ej ba n̄an kom̧ kōn rimej ro ami: N̄e jabdewōt iaami rej peptaij kōn ro remej ami, en wōr juon rilale lo̧o̧k, im en kam̧ool e peptaij ko ami kōn mejān make; e en ron̄jake kōn lo̧jiln̄in, bwe en maron̄ kam̧ool kōn m̧ool eo, Irooj ej ba;

7 Bwe ilo aolep kanne ko ami en maron̄ jeje ilo lan̄; jabdewōt kom̧ij liāpe ioon laļ, emaron̄ in liāpe ilo lan̄; jabdewōt kom̧ij kōtļo̧k ioon laļ, maron̄ in kōtļo̧k ilo lan̄;

8 Bwe I nan̄in kōjepļaak elōn̄ men ko n̄an laļ, ekkejelļo̧k n̄an priesthood eo, Irooj in Inelep eo ej ba.

9 Im bar juon alen, aolep ļo̧o̧k ko ren kōm̧m̧an ilo koņ, bwe ren maron̄ likūti ilo jikin ko̧koņ ko an tampeļ eo ekwōjarjar Aō, bwe ren ememeji wōt jān epepen n̄an epepen, Irooj in Inelep eo ej ba.

10 Inaaj ba n̄an aolep ro rekwōjarjar, bwe Iaar kōņaan, kōn ikdeelel eo eļap otem ļap, n̄an ekkōnono n̄an er kōn unleplep in peptaij kōn ro remej, ilo Jabōt eo in ej itok. A toun wōt an jab jān kajoor eo aō n̄an kōm̧m̧an āinwōt, inaaj jeje naan eo an Irooj jān iien n̄an iien, kōn unleplep en, im jilkinwaj e n̄an kom̧ ilo lōta, barāinwōt elōn̄ bar men ko jet.

11 N̄aij kiiō kili lōta in n̄an ilo tōre in, bwe kōnke ej jab bwe iien; bwe rikōjdat ej wāmourur, im āinwōt Rilo̧mo̧o̧r eaar ba, bwidak eo an laļ in ej itok, a ejjeļo̧k jabdewōt ippān kake eō.

12 Lo, jar eo aō n̄an Anij ej bwe kom̧in aolep jokane. Im ij je eta n̄an kom̧ rikarejeram̧i ilo Irooj, rikanaan im rilolo an Kabun̄ eo an Jisōs Kraist im Armej ro Rekwōjarjar ilo Raan ko Āliktata.