1 A afio mai le Faaola o le a tatou vaai ia te ia e pei ona i ai o ia. O le a tatou vaai o ia o se tagata e pei o i tatou lava.

2 Ma o lea lava mafutaga ua i ai ia te i tatou iinei o le a i ai ia te i tatou iina, ae o le a na’o na faatasia ma le mamalu e faavavau, o se mamalu e lē o ia i tatou i le taimi nei.

3 Ioane 14:23—O le faaali mai o le Tamā ma le Alo, i le fuaiupu lena, o se afifio patino mai lava lea; ma o le manatu e faapea e mau le Tamā ma le Alo i le loto o le tagata, o se manatu tuai faalelotu, ma ua sese.

4 I le tali atu i le fesili—Ua lē tusa ea le faitauga o le taimi a le Atua, taimi a le agelu, taimi a le perofeta, ma le taimi a le tagata ma le paneta ua latou nonofo ai?

5 Ou te tali atu, Ioe. Peitai e leai ni agelu e auauna mai i le lalolagi lenei vagana ai i latou o e e i ai pe na i ai i le lalolagi lenei.

6 E lē nonofo agelu i se paneta e pei o le lalolagi lenei;

7 Ae ua nonofo i latou i le afioaga o le Atua, i luga o se kelope ua pei o se sami tioata ma le afi, i le mea o loo faaalia ai mea uma mo lo latou mamalu, o le tuanai, taimi nei, ma le lumanai, ma ua i ai pea lava i luma o le Alii.

8 O le nofoaga ua afio ai le Atua o se Urima ma se Tumena tele lava.

9 O le lalolagi lenei, i lona tulaga faapaiaina ma ola pea, o le a faia e pei o se maatioata ma o le a avea o se Urima ma se Tumena ia te i latou o e e nonofo ai, lea o le a faaalia ai mea uma tau i se malo maualalo, po o malo uma o se faatulagaga maualalo, ia te i latou o e e nonofo ai; ma o le lalolagi lenei o le a ā Keriso ia.

10 Ona avea ai lea o le maa sinasina ua ta’ua i le Faaaliga 2:17, o se Urima ma se Tumena i tagata taitoatasi e mauaina se tasi, lea o le a faailoa mai ai mea uma e faatatau i se faatulagaga o malo maualuluga;

11 Ma o le a tuuina atu se maa sinasina i tagata taitoatasi o e e o mai i le malo selesitila, lea ua tusia ai i luga se igoa fou, lea e leai se tagata na te iloa vagana ai o ia ua mauaina. O le igoa fou o le upu tatala.

12 Ou te vavalo atu, i le suafa o le Alii le Atua, o le amataga o faigata ia o le a mafua ai le faamasaatoto tele ae lei afio mai le Atalii o le Tagata o le a i Karolaina i Saute.

13 Atonu e tupu mai i le fesili e faatatau i tagata pologa. O lenei mea sa tautino mai e se leo ia te a’u, a’o ou tatalo faatauanau atu e uiga i le mataupu, ia Tesema 25, 1832.

14 Sa ou tatalo faatauanau malosi atu i se tasi taimi e fia iloa le taimi o le afio mai o le Atalii o le Tagata, ae ou faalogoina ai se leo ua toe fetalai mai i upu nei:

15 Iosefa e, lo’u atalii, afai e te ola seia valusefulu-lima ou tausaga, o le a e vaai i foliga o le Atalii o le Tagata; o lea ia lava ai lea, ma aua le toe faalavelave mai ia te a’u i lenei mataupu.

16 Sa faapea ona tuua ai a’u, e aunoa ma le mafai ona filifili pe ua faasino lenei afio mai i le amataga o le meleniuma po o i se isi afio mai ua mavae atu, pe sei ou oti ma faapea ona vaai ai i ona fofoga.

17 Ou te talitonu o le afio mai o le Atalii o le Tagata o le a lē vave mai nai lo le taimi lena.

18 Soo se mataupu autu o le atamai tatou te maua i le olaga lenei, o le a tutu mai faatasi ma i tatou i le toetutu.

19 Ma afai e maua e se tagata le poto ma le tomai sili atu i le olaga lenei i lo se isi tagata e ala i lona filiga ma le usiusitai, o le a maua e ia le avanoa tele atu i le lalolagi a sau.

20 E i ai se tulafono, na folafola lē maaveesea i le lagi a o le i faavaeina le lalolagi lenei ua faavae ai i luga faamanuiaga uma—

21 Ma a tatou maua se faamanuiaga mai le Atua, e maua lea i le usiusitai i lena tulafono ua faavae ai i luga.

22 Ua i ai i le Tamā se tino o aano ma ivi e mafai ona pa’i i ai e pei o le tagata; ua faapea foi le Alo; ae o le Agaga Paia e leai se tino o aano ma ivi, ae o se peresona Agaga. A na le faapea, e le mafai e le Agaga Paia ona mau i totonu o i tatou.

23 E mafai e se tagata ona maua le Agaga Paia, ma atonu e mafai ona oo ifo i luga o ia ma lē tumau ia te ia.