1 Ongora, O ngkami aomata n au ekaretia, e taku te Uea ae Atuami, ao kakauongo n ana taeka te Uea ibukimi—

2 Te Uea are e na karina n roko n ana tembora; te Uea are e na ruo nako aon te aonaba ma te kamaraia ni motikitaeka; eng, i aoia botanaomata ni kabaneia ake a mwanuokina te Atua, ao i aoia ni kabane ake buakaka i buakomi.

3 Bwa e na kaota baina ae tabu i mataia botanaomata ni kabaneia, ao a na bane tabotabon aonaba n noora ana kamaiu Atuaia.

4 Mangaia are, katauraoingkami, katauraoingkami, O au botanaomata; kaitiaki ngkami; ikoikotingkami, O ngkami aomata n au ekaretia, i aon aban Tion, ngkami ni kabane ake a tuai tuangaki bwa a na tiku.

5 Kam na kitana Bwaburon. Kam na itiaki ngkami ake kam uouoti ana bwai ni mwakuri te Uea.

6 Tewea ami botaki n taromauri, ao kabatia te marooro i marenami. Ao a riai aomata ni kabaneia ni wetea aran te Uea.

7 Eng, e kaoaua ae I a manga tuangkami, e a roko te tai are bwanaan te Uea e na nakoimi: Kam na kitana Bwaburon; ikoikotingkami mai buakoia botanaomata nako, man aang ake aua, mai tabon karawa are teuana nakon are teuana.

8 Kanakoia unimwaane n au ekaretia nakon aaba ake a raroanako; nakon aaba ake i marawa; kanakoia nakon aaba ake ianena; weteia botanaomata ni kabaneia, weteia moa Tientaire, ao i mwina Iutaia.

9 Ao nooria, ao taraia, a na takaruaea aio, ao bwanaan te Uea nakoia aomata ni kabaneia: Naako nakon aban Tion, bwa a aonga ni kabuburaaki tiaia au aomata, ao bwa aonga ana titeiki ni kakorakoraaki, ao bwa e aonga Tion ni waaki nakon aaba ake i rarikina.

10 Eng, e riai n waaki nako takaruaia i buakoia aomata ni kabaneia: Uti ao teirake ao waaki nako ni butimwaea te Tia Mare te Mwaane; nooria ao taraia, e a roko te Tia Mare te Mwaane; nako butimwaia. Katauraoingkami ibukin ana bong ae kakannato te Uea.

11 Ngaia are, tarataraia bwa kam aki ata te bong ke te aoa.

12 Ngaia are, kariaia nake a mena i buakoia Tientaire bwa a na birinako nako Tion.

13 Ao kariaia naake kaain te baronga ae Iuta bwa a na birinako nako Ierutarem, nakon maunga n ana auti te Uea.

14 Kam na nako mai buakoia botanaomata, are mai Bwaburon, mai buakon te buakaka, are bon Bwaburon n te maiu n tamnei.

15 Ma e koaua, ae taku te Uea, tai ienikuri ni birinako, ma a riai n tauraoi bwaai ni kabane i mwaimi; ao ane e nako, e riai n aki tanrikaaki bwa e aonga n aki karina n roko i aona te kamaunaaki.

16 Ongora ao kakauongo; O ngkami kaain te aonaba. Ongora, ngkami unimwaane n au ekaretia ni kabane, ao kakauongo nakon bwaanan te Uea; bwa e weweteia aomata ni kabaneia, ao e tuangiia aomata ni kabaneia n taabo nako bwa a na raira nanoia.

17 Bwa nooria, te Uea ae te Atua e a tia ni kanakoa te anera are takarua ri nukan karawa ni kangai: Kam na katauraoa kawain te Uea, ao kaeti kawaina, bwa e a kaan te aoa are na roko iai—

18 Ngkana e na tei te Tiibu te Teei i aon te Maunga are Tion, ao raona tebubua ao abwi ma aua tenga, aika koreaki aran Tamana i aon ramwaia.

19 Mangaia are, katauraoingkami ibukin rokon te Tia Iein; naako ngkami, naako ngkami bwa kam na butimwaia.

20 Bwa nooria, e na tei i aon te Maunga are Oriwete, ao i aon marawa ae korakora, are marawa ae nano, ao i aon aban marawa, ao i aon aban Tion.

21 Ao e na kaota bwanaana mai Tion, ao e na taetae mai Ierutarem, ao a na ongo bwanaana i buakoia aomata ni kabaneia;

22 Ao e na riki bwa te bwana ae ai aron rurungaan raan aika mwaiti, ao ai aron rebwen te ba ae korakora, are e na urui maunga, ao akea taian mwarua aika a na kuneaki.

23 E na tua nakon marawa ae nano, ao e na kaokaki rikaaki nakon aaba ake i meang, ao atimwakoro a na riki bwa teuana te aba;

24 Ao aban Ierutarem ao aban Tion a na kaokaki nakon nneia, ao te aonaba e na okira arona ni boong ake i mwain ae e bwenaua.

25 Ao te Uea, are te Tia Kamaiu, e na tei i buakoia ana aomata, ao e na tautaeka i aoia aomata ni kabane.

26 Ao naake a mena n aaba ake i meang a na uringaki iroun te Uea, ao aia burabeti a na ongo bwanaana, ao a na aki manga tautau aroia; ao a na orei taian bwa; ao e na ran nako te aiti i matam.

27 Ao e na kateaki te kawai i nukan marawa ae nano.

28 Aia kairiribai a na riki bwa konaia.

29 Ao n rereua ake akea kanoaia a na riki neei n ran ae maiu; ao aontano are e mautakataka e na aki manga bwatakataka.

30 Ao a na uoti kaubwaia nakoia natin Eberaim, au taan mwakuri.

31 Ao tian tabuki ake akea tokia ana ruru ngkana a roko.

32 Ao ikekei a na bobaraki ao a na baunaki ma te mimitong, i boni Tion, ni baia ana taan mwakuri te Uea, are natin Eberaim.

33 Ao a na kaonaki ma anenen te kimwareirei ae akea tokina.

34 Nooria, bon aio ana kakabwaia te Atua ae akea tokina i aoia ana baronga Iteraera, ao te kakabwaia ae korakora riki i aon atun Eberaim ma raona.

35 Ao naake n ana baronga naba Iuta, i mwin marakiia, a na kaitiakaki n ae tabu imatan te Uea, bwa a na maeka imatana n te ngaina ma te bong, n aki toki.

36 Ao ngkai, e koaua ae taku te Uea, bwa a aonga bwaai aikai n ataaki i buakomi, O kaain te aonaba, I a tia ni kanakoa au anera ae kibakiba ri nukan karawa, are iai irouna te euangkerio ae akea tokina, are e a tia ni kaoti nakoia tabeman ao e anga nakoia aomata, are e na kaoti nakoia aika mwaiti ake a maeka i aon te aonaba.

37 Ao te euangkerio aei e na tataekinaki nakon aaba nako, ao reeti, ao neewe, ao aomata.

38 Ao ana taan mwakuri te Atua a na waaki nako, ni kangai ma te bwana ae korakora: Maaka te Atua ao anganna te mimitong, bwa e a roko ana aoa ni motikitaeka;

39 Ao taromauria teuare e karaoa karawa, ao aonaba, ao marawa, ao koburake n ran—

40 Wetea aran te Uea n te ngaina ma te bong, ni kangai: O bwa ko na bwenaua karawa, bwa ko na ruo, bwa a na bwaro rikaaki taian maunga imatam.

41 Ao e na kaekaaki i aon atuia; bwa rokon te Uea e na riki bwa ai aron te ai ae raanga are e ura, ao ai aron te ai are karika te ran bwa e na buro.

42 O te Uea, ko na ruo bwa e na ataaki aram irouia am kairiribai, ao a na bane botanaomata n ruru i matam—

43 Ngkana ko karaoi bwaai aika kakamaku, bwai ake a aki kantaningaia;

44 Eng, ngkana ko ruo, ao maunga a bwaro rikaaki imatam, ko na kaitibo ma naake a kimwareirei ao a karaoi mwakuri aika raoiroi, ake a uringko n am waaki nako.

45 Bwa man moan rikin te aonaba aomata a tuai n ongo ke n teke iai taningaia, ke e a ti n nooria te mata, O te Atua, irarikim, ai korakorara bwaai aika ko tia ni katauroi ibukin are e kantaningaiko.

46 Ao e na taekinaki: Antai aei are e ruo mai iroun te Atua i karawa ma kunikaina aika uraura; eng, man mwakoron aaba ake aki ataaki, e kunikaia ni kunikaina aika mimitong, ae mwananga ni korakorana ae rangi ni korakora?

47 Ao e na kangai Ngai teuare e taetae n te raoiroi, ae mwaaka ni kamaiu.

48 Ao te Uea e na uraura kunikaina, ao kunikaina ai aron te tia kamanti n te tabo ni kamanti kurebe.

49 Ao e na rangi ni korakora mimitongin rokona n te aro are taai e na karaba matana ni maama, ao namwakaina e na taua otana, ao itoi a na tewenakoaki mani nneia.

50 Ao a na ongo bwanaana: I a tia n toutoua te tabo ni kamanti wain n ti ngai, ao I tia ni karokoa te motikitaeka i aoia aomata ni kabaneia; ao bon akea raou.

51 Ao I a tia n toubekaia ni uniu, ao I bon toutouia n uniu, ao I tia ni katimtimwa raraia i aon kunikaiu, ao ni kamemea kunikaiu ni kabane; bwa aio bon bongin te kabomwi are e mena i nanou.

52 Ao ngkai e a roko aia ririki ake a kamaiuaki ni kabooaki Irou; ao a na taekina ana tangira n akoi aia Uea, ao bwaai ni kabane ake E a tia ni katoka i aoia ni kaineti ma raoiroina, ao ni kaineti ma ana tangira n akoi, n aki tootoki.

53 N rawaawataia ni kabane e karawaawataaki. Ao te anera are mena i matana e kamaiuia; ao n ana tangira, ao n ana nanoanga, e kabooia, ao e uotiia, ao e tabekiia ni boong nako ake ngkoa;

54 Eng, ao Enoka naba, ao naake a raonna; burabeti ake mai mwaaina; ao Noa naba, ao naake mai mwaina; ao Mote naba, ao naake mai mwaina;

55 Ao mai iroun Mote ni karokoa Eria, ao mai iroun Eria ni karokoa Ioane, ake bon raon Kristo ni mangautina, ao abotoro ake a tabu, ma Aberaam, Itaaka, ao Iakobwa, a na mena i matan te Tibu Te Teei.

56 Ao ruanimateia aomata aika itiaki a na kaukaki; ao a na otinako ao n tei i angaatain te Tiibu te Teei, ngkana e na tei i aon te Maunga are Tion, ao i aon te kaawa ae tabu, Ierutarem ae Boou; ao a na anenea kunan te Tiibu te Teei, n te ngaina ao n te bong n aki tootoki.

57 Ao ibukin te waaki aei, bwa aonga aomata n riki bwa taan katoong mimitong ake a na kaotaki, te Uea e tia ni kaota bwaninin ana euangkerio, ana berita ae tabu ae akea tokina, ni kabwarai ni kamaatatai ao ni kabebetei—

58 Ni katauraoia ake a mamaara ibukin bwaai ake a na roko i aon te aonaba, ao ibukin ana mwakuri te Uea n te bong are nake a mamaara a na kamangaoia nake a wanawana, ao are e uarereke e na riki bwa te botanaomata ae korakora, ao uoman a na kabirinakoia aia bwi ni nga ma nga.

59 Ao man bwaai aika mamaara n te aonaba te Uea e na kamaenakoia botanaomata ni mwaakan Tamneina.

60 Ao ibukin te waki aei ae anga tuua aikai; a bon tuangaki bwa a na karabai man te aonaba n te bong are a kaotaki iai, ma ngkai a na kaotaki nakoia aomata ni kabaneia—

61 Ao aio e kaineti ma ana iango ao nanon te Uea, are e tautaeka i aoia aomata ni kabaneia.

62 Ao nakon are e raira nanona ao e kaitiakia i matan te Uea e na anganaki te maiu ae akea tokina.

63 Ao i aoia naake aki ongo ni bwanaan te Uea e na kakoroaki nanon are e koreaki iroun te Burabeti are Mote, are a na kamaunaaki mai buakoia aomata.

64 Ao are e koreaki naba iroun te Burabeti ae Maraki: Bwa, nooria, e na roko te bong are e na bue n ai aron te ai n umuum, ao ni kabane taan kainikatonga, eng, ao ni kabane ake a a karaoa ae buakaka, a na riki bwa maange; ao n rokon te bong arei a na kabuekaki, e taku aia Uea taanga ni buaka, are e na katukuia n akea wakaaia ke mwangaia.

65 Mangaia are, aio bon ana kaeka te Uea nakoia:

66 N te bong arei ngke I roko nakoia au botanaomata, akea temanna i buakomi ae butimwaeai, ao kam kakionakoaki.

67 Ngke I manga wewete riki bon akea mai iroumi ae kaeka; ma e aki kakimototoaki baiu teutana n te aro are I aki kona ni kabooia, ke mwaakau ni kainaomataia.

68 Nooria, ni boakiia i kamwaua taari. I karaoi karaanga bwa rereua; a mwaung ikaia, ao a mate man te taka.

69 I rabuni taian karawa n te rotongitong, ao I karaoi rabunaia kunikai aika raerobwa.

70 Ao kam na anganaki aei ni baiu—kam na wene ma te nanokaawaki.

71 Nooria, ao taraia, bon akea ae na kainaomataingkami; bwa kam aki ongeaba ni bwanau ngke I weteingkami mai karawa; kam aki kakoauaia au taan mwakuri, ao ngke a kanakoaki nakoimi kam aki butimwaiia.

72 Mangaia are, a kaina te kakoaua ao a kabaea te tua, ao kam kanakoaki nakon te rotongitong.

73 Aikai ake a a na nako nakon te roo are i ao, ike e mena iai te tang ma te tanginiwenei, ao te kangeenge wi.

74 Nooria te Uea ae Atuami e a tia n taekinna. Amen.