1 Naan eo an im Ankilaan Irooj kōn Kāām eo an Israel ilo ito-itak ko aer n̄an Rilik:

2 Aolep armej ro ilo Kabun̄ eo an Jisōs Kraist im Armej ro Rekwōjarjar ilo Raan ko Āliktata ren, im ro rej ito-itak ippāer, karōk er ilo jar ko, ippān juon bujen im kallim̧ur n̄an kōjparok aolep kien ko im naan in kain̄i ko an Irooj ad Anij.

3 Jar ko ren ekkar ippān kapen ro an bukwi ko, kapen ro an lemn̄oul ko, im kapen ro an jon̄oul ko, ippān president eo im rikōkapilōklōk ro an ruo ibōraer, ium̧win tōl an Jon̄oulruo Rijjilōk Ro.

4 Im en̄in enaaj bujen eo ad—bwe jenaaj etetal ilo aolep kain̄i ko an Irooj.

5 Kajjojo jar en kakke n̄an er make aolep kumi ko, wāikōn ko, aikuj ko, nuknuk, im aolep mennin aikuj ko jet n̄an ito-itak eo, ko im remaron̄i.

6 N̄e jar ko em̧ōj karōke er ren ilo̧k kōn aer maron̄, n̄an kōppojak n̄an ro rej itōn pād wōt.

7 Kajjojo jar en, ippān kapen ro im president ro aer, kāālete jete eo emaron̄ ilo̧k ilo jem̧ļo̧kin an̄ōnean̄ in ej itok; innām kāālet jān er oran eo ebwe in em̧m̧aan ro rekajoor ilo ānbwin im retijem̧ļo̧k, n̄an bōki kumiko, ine ko, im kein jerbal in kallib ko, n̄an etal āinwōt ro im̧aantata n̄an kōpooje n̄an kalbwin ekkan eo an jem̧ļo̧kin an̄ōnean̄.

8 Kajjojo jar en ineek jon̄an wōt juon eddo, ekkar n̄an jon̄an m̧ōttan m̧weiuk ko m̧weiier, ilo bōke ro rejeram̧ōl, kōrā ro ejako pāleer, ro ejjeļo̧k jemāer, im baam̧le ko an ro im rekar etal ilo jarin tariņae ko, bwe kūr ko an kōrā eo ejako pāleen im eo ejjeļo̧k jemān en jab wanlōn̄ļo̧k ilo lo̧jiln̄in Irooj ņae armej rein.

9 Kajjojo jar en kōpooji m̧ōko, im meļaaj ko n̄an ekkat grain, n̄an ro rej itōn pād wōt ilo tōre in; im en̄in ej ankilaan Irooj kōn armej ro An.

10 Aolep armej en kōjerbal aolep an maron̄ im m̧weiien n̄an kōm̧akūt armej rein n̄an jikin eo ijo Irooj enaaj kaalikkare bwe en juon stake an Zaion.

11 Im eļan̄n̄e kom̧ij kōm̧m̧ane men in kōn bōro ko rerreo, ilo aolep tiljek, kom̧ naaj jeraam̧m̧an; kom̧ naaj jeraam̧m̧an ilo bwijin in mennin mour ko reddik ami, im ilo bwijin in mennin mour ko reļļap ami, im ilo meļaaj ko ami, im ilo m̧ōko im̧ōmi, im ilo baam̧le ko ami.

12 Ro karejera Ezra T. Benson im Erastōs Snow ren karōke juon jar.

13 Im ro karejera Orson Pratt im Wilford Woodruff ren karōke juon jar.

14 Barāinwōt, ro karejera Amasa Lyman im George A. Smith ren karōke juon jar.

15 Im jitōn̄e president ro, im kapen ro an bukwi ko, im an lemn̄oul ko, im an jon̄oul ko.

16 Im ro im ededeļo̧k jitōn̄e er ren ilo̧k im katakin men in, ankilaō, n̄an ro rekwōjarjar, bwe ren maron̄ pojak n̄an etal n̄an juon āneen aenōm̧m̧an eo.

17 Kom̧in ilo̧k ilo iaļ eo ami im kōm̧m̧an āinwōt Iaar ba n̄an kom̧, im jab mijak rikōjdat ro ami; bwe ej jamin wōr aer kajoor n̄an kabbōjrak jerbal eo Aō.

18 Zaion naaj lo̧mo̧o̧ren e ilo iien eo Aō make.

19 Im eļan̄n̄e jabdewōt armej enaaj kappukot n̄an kalōkļo̧k e make, im jab kappukot naan in kapilōk eo Aō, e enaaj ejjeļo̧k an kajoor, im an bwebwe enaaj alikkar.

20 Kom̧in kappukot; im kōjparok aolep kallim̧ur ko ami n̄an doon; im jab ankoņake men eo me ej an eo jeiūm̧ im jatim.

21 Kōjparok kom̧ jān nana n̄an bōk etan Irooj ilo pata, bwe N̄aij Irooj ami Anij, em̧ool Anij an ro jemam̧i, Anij eo an Ebream im an Aisak im an Jekab.

22 N̄aij eo eaar tōl ro nejin Israel ļo̧k jān āneen Ijipt; im Peiū ej erļo̧kļo̧k ilo raan ko āliktata, n̄an lo̧mo̧o̧ren armej ro Aō Israel.

23 Kom̧in bōjrak jān aitwerōk juon ippān bar juon; kom̧in bōjrak jān ekkōnono nana juon ņae bar juon.

24 Kom̧in bōjrak jān kadek; im naan ko ami ren n̄an kōketak bar juon.

25 Eļan̄n̄e kwōj jata jān eo riturum̧, kwōn bar kōjepļaakļo̧k men eo me kwaar jataiki; im eļan̄n̄e kwo jab maron̄ bar kōļļāiki innām kwōn kaiurļo̧k im ba n̄an eo riturum̧, n̄e eab liaakeļo̧k eok.

26 Eļan̄n̄e kwo naaj lo men eo me eaar jako jān eo riturum̧, kwōn kanooj niknik etale m̧ae iien kwo naaj bar bōke ļo̧k n̄an e.

27 Kwōn tiljek ilo kōjparok men eo ewōr ippam̧, bwe kwōn maron̄ juon ribōk eddo emālōtlōt; bwe e ej mennin letok ejjeļo̧k wōņāān jān Irooj am̧ Anij, im kwe kwōj an ribōk eddo.

28 Eļan̄n̄e kwo m̧ōņōņō, nebare Irooj kōn al, kōn kōjan̄jan̄, kōn eb, im kōn juon jar in nebar im kam̧m̧oolol.

29 Eļan̄n̄e kwo būrom̧ōj, kūr ioon Irooj am Anij kōn owar, bwe jetōb eo am en maron̄ lem̧ōņōņō.

30 Jab mijak rikōjdat ro am, bwe rej pād ilo Peiū im Inaaj kōm̧m̧an ekkar n̄an Aō kōņaan kake er.

31 Armej ro Aō reaikuj mālejjon̄ ilo men ko otemjeļo̧k, bwe ren maron̄ pojak n̄an bōk aiboojoj eo Ippa n̄an er, em̧ool aiboojoj eo an Zaion; im e eo enaaj ban ineek kauwe e ban tōllo̧ke aelōn̄ in kiin̄ eo Aō.

32 E eo ejaje en ekkatak mālōtlōt jān an kōttāik e make im kūr ioon Irooj an Anij, bwe mejān ren maron̄ peļļo̧k bwe en maron̄ lo, im lo̧jiln̄in ren peļļo̧k bwe en maron̄ ron̄jake;

33 Bwe Aō Jetōb em̧ōj jilkinļo̧k ilo laļ n̄an kōmeram ro rettā im erup burueer, im n̄an eo liaakeļo̧k eo an ro renana.

34 Ro jeiūm̧i im jātimi rekar jab bōk kom̧ im naan in kam̧ool eo ami, em̧ool laļ eo em̧ōj an lukwarkwareļo̧k kom̧;

35 Im kiiō ej itok raan in aer ioon ko̧kkure, em̧ool raan ko in būrom̧ōj, āinwōt juon kōrā eo em̧ōj bōke ilo kōlwan keotak; im aer būrom̧ōj enaaj ļap eļan̄n̄e rej jab kanooj m̧ōkaj im ukeļo̧k, aaet, em̧ool kanooj m̧ōkaj.

36 Bwe rekar m̧an rikanaan ro, im er ro kar jilkinļo̧k n̄an ippāer; im rekar kōto̧o̧rļo̧k bōtōktōk eo ejjeļo̧k ruōn, eo ej kūr jān bwidej ņae er.

37 Kōn menin, jab ilbōk kaki men kein, bwe kom̧ij jan̄in erreo; kom̧ij jan̄in maron̄ bōk aiboojoj eo Aō; a kom̧ naaj lo e eļan̄n̄e kom̧ij tiljek ilo kōjparok aolep naan ko Aō im em̧ōj Aō kar liwōj n̄an kom̧, jān raan ko an Adam n̄an Ebream, jān Ebream n̄an Moses, jān Moses n̄an Jisōs im rijjilōk ro An, im jān Jisōs im rijjilōk ro An n̄an Josep Smith, eo Iaar kūr ioon enjeļ ro Aō, ro Aō rikarejar in jipan̄, im jān Ainikiō make jān lan̄ ko, n̄an bōk m̧aantak jerbal eo Aō;

38 Foundasōn eo eaar kadedeļo̧k, im eaar tiljek; im Iaar bōk e n̄an Ippa.

39 Elōn̄ rekar ilbōk kōnke men eo an; a ekar mennin aikuj bwe en sili naan in kam̧ool eo an kōn bōtōktōkin, bwe En maron̄ kautiej e im En maron̄ liaakeļo̧k ro renana.

40 Iaar jab kōtļo̧k kom̧ jān rikōjdat ro ami ke, im ilo wāween in Iaar likūt kam̧ool eo kōn Eta?

41 Kiiō, kōn menin, eo̧ron̄, O kom̧ armej ro an kabun̄ eo Aō; im kom̧ elder ro kom̧in ron̄jake ippān doon; kom̧ ar bōk aelōn̄ in kiin̄ eo Aō.

42 Kom̧in niknik ilo kōjparok aolep kien ko Aō, n̄e ekajet ko raab itok ioomi, im ami tōmak eab m̧ōjņo̧, im rikōjdat ro ami raab anjo̧ ioomi. Āindein ejjeļo̧k eļapļo̧k ilo iien in. Amen im Amen.