Mwakoro 137
Te mi ni burabeti ae anganaki Iotebwa Timiti te Burabeti, n te tembora i Kirtland, Ohio, n Tianuare 21, 1836. Te tai aei bon karaoan otenanti ni katauraoi ibukin katabuan te tembora.
1–6, Te Burabeti e noora tarina ae Alvin n te abanuea ae te tiretio; 7–9, Te reirei ibukin kamaiuakiia maate e kaotaki; 10, Ataei ni kabane a kamaiuaki n te abanuea ae te tiretio.
1 A kaukaki karawa i aora, ao I nora uean te Atua ae te tiretio, ao mimitongina, tao i nanon te rabwata ke tiaki I aki kona n ataia.
2 I nora te mataroa ae rianako tamaroana are a na rin iai taan bwaibwai n te abanuea arei, are ai aron uran te ai ae tobibi;
3 Ao ana kaintokanuea naba te Atua ae takiakia n ota, ao a tekateka i aona te Tama ao te Nati.
4 I noora tikiraoin kawain te abanuea arei, are taraana e rabunaki n te koora.
5 I noora te Tama ae Atam ao Aberaam; ao tamau ao tinau, tariu ae Alvin, are e a kaman motirawa;
6 Ao I miimi bwa e kanga ni karekea te bwaibwai n te abanuea arei, n nooran ae e a kaman kitana te maiu aei i mwaain ae moana ana waaki te Uea ni bobota Iteraera te ka-uatai, ao e tuai ni bwabetitoaki ibukin kamaunaan bure.
7 Ngaia are e roko bwanaan te Uea nakoiu, ae kangai: Ni kabane ake a mate n akea aia atatai n te euangkerio aei, ake a na bon butimwaia ngke arona bwa a kariaiakaki bwa a na tiku, a na riki bwa taan bwaibwai n uean te Atua ae te tiretio.
8 Ni kabane naba ake a na mate man te tai aei n akea te atatai n te euangkerio aei, ake a na bon butimwaia ma nanoia ni kabane, bon taan bwaibwai n te abanuea arei.
9 Bwa Ngai, te Uea, N na motiki taekaia aomata ni kabane ni kaineti ma aia mwakuri, ni kaineti ma are a tangiria i nanoia.
10 Ao I nooria naba bwa ataei ni kabane ake a mate i mwain ae a roko n roro ni bukinaki a bon kamaiuaki n te abanuea ae te tiretio i karawa.