1 ʻI he ʻaho tolu ʻo ʻOkatopa, ʻi hono taha afe hivangeau hongofulu mā valu ʻo e taʻú, naʻá ku nofo ʻi hoku lokí ʻo fakalaulauloto ki he folofolá;

2 Peá u fakakaukau ai ki he feilaulau fakalelei lahi ʻa ia naʻe fai ʻe he ʻAlo ʻo e ʻOtuá, ki hono huhuʻi ʻo e māmaní;

3 Pea mo e ʻofa lahi mo fakaofo ʻa ia naʻe fakahā ʻe he Tamaí pea mo e ʻAló ʻi he hāʻele hifo ʻa e Huhuʻí ki he māmaní;

4 Koeʻuhí ke tuʻunga ʻi heʻene fakaleleí, pea mo e talangofua ki he ngaahi tefitoʻi moʻoni ʻo e ongoongoleleí, ʻe lava ʻo fakamoʻui ai ʻa e faʻahinga ʻo e tangatá.

5 ʻI he lolotonga ʻa ʻeku fakalaulauloto peheé, naʻe toe foki ʻa ʻeku fakakaukaú ki he ngaahi tohi ʻa e ʻaposetolo ko Pitá, ki he kāingalotu ʻi he kuonga muʻá ʻa ia naʻa nau movetevete holo ʻi Ponitusi, mo Kalētia, mo Kapatōsia, mo e ngaahi feituʻu kehe ʻo ʻĒsiá, ʻa ē naʻe malanga ʻaki ai ʻa e ongoongoleleí ʻi he hili hono kalusefai ʻo e ʻEikí.

6 Naʻá ku fakaava hake ai ʻa e Tohi Tapú ʻo lau ʻa e vahe tolu mo e fā ʻo e ʻuluaki tohi ʻa Pitá, pea ʻi heʻeku lau iá naʻe ongo mamafa ʻaupito ʻa e ngaahi veesi ko ʻení kiate au, ʻo mahulu ange ia ʻi haʻaku ongoʻi pehē ki muʻa:

7 “He naʻe mamahi foki ʻo tuʻo taha pē ʻa Kalaisi koeʻuhí ko e ngaahi angahalá, ko e angatonú maʻá e taʻe-angatonu, koeʻuhí ke ne ʻomi ʻa kitautolu ki he ʻOtuá, kuo fakapoongi ia ʻi he kakanó, kae fakaake ʻe he Laumālié:

8 “ʻA ia naʻe ʻalu ai ia ʻo ne malanga ki he ngaahi laumālie ʻoku ʻi he fale fakapōpulá;

9 “ʻA kinautolu naʻe talangataʻa ʻi muʻa, ʻi he tatali mo e faʻa kātaki ʻa e ʻOtuá ʻi he ngaahi ʻaho ʻo Noá, lolotonga ʻa e teuteu ʻo e vaká, ʻa ia naʻe fakamoʻui ai ʻa e tokosiʻi ʻi he vaí, ko e toko valu pē.” (1 Pita 3:18–20.)

10 “He ko e meʻa ko ʻení naʻe malanga ʻaki ai ʻa e ongoongoleleí kiate kinautolu foki kuo maté, koeʻuhí ke fakamaau ʻa kinautolu ʻi he kakanó, ʻo fakatatau ki he tangatá, kae moʻui ʻo fakatatau ki he ʻOtuá ʻi he laumālié.” (1 Pita 4:6.)

11 ʻI he lolotonga ʻa ʻeku fakalaulauloto ki he ngaahi meʻa ko ʻeni kuo tohí, naʻe fakaava ʻa e mata ʻo ʻeku ʻiló, pea naʻe nofoʻia ʻiate au ʻa e Laumālie ʻo e ʻEikí, pea naʻá ku mamata ki he fuʻu kakai taʻefaʻalaua ʻo e kau pekiá, ʻa e iiki mo e lalahi fakatouʻosi.

12 Pea naʻe fakatahataha kātoa ki ha potu pē ʻe taha ʻa e ngaahi laumālie taʻefaʻalaua ʻo e kau angatonú, ʻa ia naʻa nau faivelenga ʻi heʻenau fakamoʻoni kia Sīsuú ʻi he lolotonga ʻenau moʻui ʻi he moʻui fakamatelié;

13 Pea kuo nau fai ha feilaulau ʻi he tatau ʻo e feilaulau lahi ʻa e ʻAlo ʻo e ʻOtuá, pea naʻa nau kātakiʻi ʻa e faingataʻá, koeʻuhi ko e huafa ʻo honau Huhuʻí.

14 Kuo nau mavahe kotoa atu ʻa kinautolú ni mei he moʻui fakamatelié, mo ha ʻamanaki lelei fakapapau ki ha toetuʻu nāunauʻia, tuʻunga ʻi he ʻaloʻofa ʻa e ʻOtua ko e Tamaí pea mo Hono ʻAlo pē Taha naʻe Fakatupu, ko Sīsū Kalaisí.

15 Naʻá ku mamata naʻa nau fonu ʻi he fiefia mo e nēkeneka, pea naʻa nau fiefia fakataha koeʻuhí he naʻe ofi ʻa e ʻaho ʻo honau fakahaofí.

16 Naʻa nau fakatahataha ʻo talitali ki he hāʻele ange ʻa e ʻAlo ʻo e ʻOtuá ki he maama ʻo e ngaahi laumālié, ke tala fakahāhā ʻa honau huhuʻi mei he ngaahi haʻi ʻo e maté.

17 Pea ke fakafoki ʻa honau sino ʻo e efu ʻoku mohé ki hono tuʻunga haohaoá, ko e huí ki he hui, pea mo e uouá mo e kakanó ki ai, pea ke toe fakatahaʻi ʻa e laumālié pea mo e sinó, pea ʻe ʻikai ke toe fakamavahevaheʻi, koeʻuhí ke nau maʻu ʻa e kakato ʻo e fiefiá.

18 ʻI he lolotonga ʻa e talitali mo e fetalanoaʻaki ʻa e ngaahi laumālie tokolahi ko ʻení, mo fiefia ʻi he houa ʻo honau fakahaofi mei he ngaahi haʻi ʻo e maté, naʻe hā mai ʻa e ʻAlo ʻo e ʻOtuá, ʻo ne tala fakahā ʻa e tauʻatāina ʻa e kau pōpula ʻa ia naʻe faivelengá;

19 Pea naʻá ne malanga ʻaki ai kiate kinautolu ʻa e ongoongolelei taʻengatá, ko e tokāteline ʻo e toetuʻú mo e huhuʻi ʻo e faʻahinga ʻo e tangatá mei he hingá, pea mei he ngaahi angahala fakatāutahá ʻo makatuʻunga ʻi he fakatomalá.

20 Ka naʻe ʻikai te ne hāʻele tonu ia ki he kau fai angahalá, pea naʻe ʻikai foki ke fanongoa ʻa hono leʻó ʻi he lotolotonga ʻo e kau taʻetui ʻOtuá mo e kau taʻe-fakatomalá, ʻa ia naʻa nau ʻuliʻi ʻa kinautolu lolotonga ʻa ʻenau ʻi he kakanó;

21 Pea naʻe ʻikai foki ke mamata kiate ia ʻa e kau angatuʻu ʻa ia naʻa nau fakasītuʻaʻi ʻa e ngaahi fakamoʻoni pea mo e ngaahi fakatokanga ʻa e kau palōfita ʻo onoʻahó, pea naʻe ʻikai te nau mamata ki hono fofongá.

22 Pea naʻe pule ʻa e fakapoʻulí ʻi he feituʻu ko ia naʻe ʻi ai ʻa kinautolu ní, ka naʻe ʻi he lotolotonga ʻo e kau māʻoniʻoni ʻa e melinó;

23 Pea naʻe fiefia ʻa e kau māʻoniʻoní ʻi hono huhuʻi kinautolú, pea naʻe peluki honau tuí ʻo fakahā ko e ʻAlo ʻo e ʻOtua ʻa honau Huhuʻi mo e Fakahaofi mei he maté pea mo e ngaahi sēini ʻo helí.

24 Naʻe ulo ʻa honau fofongá, pea naʻe nofo ʻiate kinautolu ʻa e maama mei he ʻao ʻo e ʻEikí, pea naʻa nau hiva ʻaki ʻa e ngaahi hiva fakafetaʻi ki hono huafa toputapú.

25 Naʻá ku ofo, he naʻe mahino kiate au naʻe ngāue ʻa e Fakamoʻuí ʻi ha taʻu pē ʻe tolu nai ʻi he lotolotonga ʻo e kau Siú pea mo kinautolu ʻo e fale ʻo ʻIsilelí, ʻi heʻene feinga ke akoʻi kiate kinautolu ʻa e ongoongolelei taʻengatá mo ui ʻa kinautolu ki he fakatomalá;

26 Ka neongo iá, neongo ʻa ʻene ngaahi ngāue maʻongoʻongá, mo e ngaahi maná, mo ʻene talaki fakahā ʻa e moʻoní, ʻi he fuʻu mālohi mo e mafai lahí, naʻe kei tokosiʻi pē ʻa e faʻahinga naʻa nau tokanga ki hono leʻó, pea nau fiefia ʻi hono ʻaó, pea nau maʻu ʻa e fakamoʻuí ʻi hono toʻukupú.

27 Ka ko ʻene ngāue ʻi he lotolotonga ʻo kinautolu kuo pekiá naʻe fakangatangata pē ki he kiʻi vahaʻataimi nounou ʻi he vahaʻa ʻo hono kalusefaí pea mo ʻene toetuʻú;

28 Pea naʻá ku fifili ki he ngaahi lea ʻa Pitá—ʻa ia naʻá ne pehē ai naʻe malanga ʻa e ʻAlo ʻo e ʻOtuá ki he ngaahi laumālie ʻi he fale fakapōpulá ʻa ia naʻe talangataʻa ʻi muʻa, ʻi he tatali mo e faʻa kātaki ʻa e ʻOtuá ʻi he ngaahi ʻaho ʻo Noá—pē naʻe lava fēfē ke ne malanga ki he ngaahi laumālie ko iá pea fai mo e ngāue naʻe totonu ke fai ʻi honau lotolotongá, ʻi ha kiʻi taimi nounou pehē.

29 Pea ʻi he lolotonga ʻa ʻeku fifilí, naʻe fakaava ʻa hoku matá, pea naʻe fakaake hake ʻa ʻeku ʻiló, pea naʻe mahino kiate au naʻe ʻikai ke hāʻele tonu ʻa e ʻEikí ki he kau fai angahala mo e kau talangataʻa ʻa ia naʻa nau fakafisinga ʻa e moʻoní, ke akoʻi ʻa kinautolu;

30 Kae vakai, naʻá ne fokotuʻutuʻu haʻane kau ngāue, mei he kau māʻoniʻoní, peá ne fili ha kau talafekau, ʻo fakakofuʻi ʻaki ʻa e mālohi mo e mafai, pea tuʻutuʻuni ke nau ʻalu atu ʻo ʻave ʻa e maama ʻo e ongoongoleleí kiate kinautolu naʻe ʻi he fakapoʻulí, ʻio ki he ngaahi laumālie kotoa pē ʻo e tangatá; pea naʻe anga pehē ʻa hono malanga ʻaki ʻo e ongoongoleleí ki he kau pekiá.

31 Pea naʻe ʻalu atu ʻa e kau talafekau naʻe fili ke talaki fakahā ʻa e ʻaho ʻo e ʻaloʻofa ʻo e ʻEikí pea fakahā ʻa e tauʻatāiná ki he kau pōpula ʻa ia naʻe nofo haʻisiá; ʻio kiate kinautolu kotoa pē te nau fakatomala mei heʻenau ngaahi angahalá pea tali ʻa e ongoongoleleí.

32 Pea naʻe anga pehē ʻa hono malanga ʻaki ʻo e ongoongoleleí kiate kinautolu kuo nau mate ʻi heʻenau ngaahi angahalá, teʻeki te nau ʻilo ki he moʻoní, pe ko ʻenau maumau-fonó, ʻo nau fakafisinga ʻa e kau palōfitá.

33 Naʻe akoʻi kiate kinautolu ní ʻa e tui ki he ʻOtuá, fakatomala mei he angahalá, papitaiso fakafofonga ki he fakamolemole ʻo e ngaahi angahalá, pea mo e maʻu ʻo e meʻafoaki ʻo e Laumālie Māʻoniʻoní ʻi he hilifaki ʻo e nimá,

34 Pea mo e ngaahi tefitoʻi moʻoni kehe kotoa pē ʻo e ongoongoleleí, ʻa ia naʻe ʻaonga ke nau ʻilo ki ai ke nau lava ai ʻo fakafeʻungaʻi ʻa kinautolu koeʻuhí ke lava ʻo fakamāuʻi ʻa kinautolu ʻo fakatatau ki he tangatá ʻi he kakanó, kae moʻui ʻo fakatatau ki he ʻOtuá ʻi he laumālié.

35 Pea ko ia naʻe fakahā ai ki he kau pekiá, ʻa e iiki mo e lalahi fakatouʻosi, ki he taʻe-māʻoniʻoní pea mo e kau faivelengá, kuo fakahoko ʻa e huhuʻí tuʻunga ʻi he feilaulau ʻa e ʻAlo ʻo e ʻOtuá ʻi he funga kolosí.

36 Pea naʻe anga pehē ʻa hono fakahā ʻa e anga ʻo hono fakaʻaongaʻi ʻo e taimi ʻo hotau Huhuʻí lolotonga ʻa ʻene ʻafio taimi nounou ʻi he maama ʻo e ngaahi laumālié, ʻo ne fakahinohinoʻi mo teuteuʻi ʻa e ngaahi laumālie ʻo e kau palōfita angatonu ʻa ia naʻa nau fakamoʻoni kiate ia ʻi he kakanó;

37 Koeʻuhí ke nau ʻave ʻa e pōpoaki ʻo e huhuʻí ki he kau pekia kotoa pē, kiate kinautolu ʻa ia naʻe ʻikai te ne hāʻele tonu ki aí, koeʻuhi ko ʻenau angatuʻú mo ʻenau maumau-fonó, koeʻuhí ke nau lava ʻo fanongo ki heʻene folofolá ʻi he ngāue ʻa ʻene kau tamaioʻeikí.

38 Naʻe kau ʻi he kau tuʻu-ki-muʻa mo e kakai maʻongoʻonga ko ia naʻa nau fakataha mai ʻi he fuʻu haʻofanga lahi ko ʻeni ʻo e kau māʻoniʻoní ʻa e Tamai ko ʻĀtamá, ko e ʻI Muʻa ʻi Muʻa ʻi he Ngaahi ʻAhó pea mo e tamai ʻa e kakai kotoa pē;

39 Pea mo ʻetau Faʻē nāunauʻia ko ʻIví, mo e tokolahi ʻo hono ngaahi ʻofefine angatonu ʻa ia naʻa nau moʻui ʻi he ngaahi kuongá pea nau hū ki he ʻOtua moʻoni mo moʻuí.

40 Mo ʻĒpeli, ʻa ia ko e ʻuluaki maʻatá, naʻá ne ʻi ai, pea mo hono tokoua ko Setí, ko e taha ʻo e kakai naʻe maʻongoʻongá, ʻa ia naʻá ne ʻi he tatau moʻoni ʻo ʻene tamai ko ʻĀtamá.

41 Mo Noa, ʻa ia naʻá ne fai ʻa e fakatokanga ʻo kau ki he lōmakí; mo Semi, ʻa ia ko e taulaʻeiki lahi tuʻu-ki-muʻá; mo ʻĒpalahame, ko e tamai ʻo e kakai angatonú; mo ʻAisake, mo Sēkope, mo Mōsese, ʻa e tokotaha foaki fono maʻongoʻonga ʻo ʻIsilelí;

42 Mo ʻĪsaia, ʻa ia naʻá ne talaki fakahā ʻi he kikité ʻo pehē, naʻe pani ʻa e Huhuʻi ke ne nonoʻo ʻa e loto-mafesí, ke ne fakahā ʻa e tauʻatāiná ki he kau pōpulá, pea mo fakaava ʻa e fale fakapōpulá kiate kinautolu naʻe haʻisiá, naʻa nau ʻi ai foki mo kinautolu.

43 Pea ʻikai ia ko ia pē, ka naʻe ʻi ai foki mo ʻIsikeli, ʻa ia naʻe fakahā kiate ia ʻi he meʻa-hā-mai, ha fuʻu teleʻa lahi ʻo e ngaahi hui mōmoa, ʻa ia naʻe toe fakakofu ʻaki ʻa e kakanó, ke nau toetuʻu hake ʻi he toetuʻu ʻo e kau pekiá, ko ha ngaahi moʻoniʻi laumālie moʻui;

44 Mo Tāniela, ʻa ia naʻá ne muʻaki mamata mo tala ʻa hono fokotuʻu ʻo e puleʻanga ʻo e ʻOtuá ʻi he ngaahi ʻaho ki mui ní, ʻa ia ʻe ʻikai ʻaupito ke toe fakaʻauha pe toe tuku ia ki ha kakai kehe;

45 Mo ʻIlaiase, ʻa ia naʻá ne ʻi he Moʻunga ʻo e Liliú fakataha mo Mōsesé;

46 Pea mo Malakai, ʻa e palōfita ko ia naʻá ne fakamoʻoniʻi ʻe haʻu ʻa ʻIlaisiaá—ʻa ē naʻe lea foki ki ai mo Molonai ki he Palōfita ko Siosefa Sāmitá, ʻo pehē ʻe haʻu ki muʻa ʻi he heʻeki ai ke hoko ʻa e fuʻu ʻaho lahi mo fakamanavahē ʻo e ʻEikí—naʻa nau ʻi ai foki mo kinautolu.

47 ʻE tō ʻe he palōfita ko ʻIlaisiaá ʻi he loto ʻo e fānaú ʻa e ngaahi talaʻofa naʻe fai ki heʻenau ngaahi tamaí;

48 ʻO fakamelomelo ki he fuʻu ngāue lahi ʻe fai ʻi he ngaahi temipale ʻo e ʻEikí ʻi he kuonga ʻo e kakato ʻo e ngaahi kuongá, ki hono huhuʻi ʻo e kau pekiá, pea mo hono fakamaʻu ʻo e fānaú ki heʻenau mātuʻá, telia naʻa taaʻi ʻa e māmaní kotoa ʻaki ʻa e malaʻia, pea fakaʻauha ʻo ʻosiʻosingamālie ʻi heʻene hāʻele maí.

49 Ko ia ko e faʻahingá ni kotoa, pea mo ha niʻihi tokolahi kehe, ʻio ʻa e kau palōfita naʻa nau nofo ʻi he lotolotonga ʻo e kau Nīfaí pea nau fakamoʻoni ki he hāʻele mai ʻa e ʻAlo ʻo e ʻOtuá, naʻa nau fio ai ʻi he fuʻu fakatahataha lahi ko ʻení ʻo talitali ki honau fakahaofí.

50 He naʻe lau ʻe he kau pekiá ʻa e mavahe fuoloa ʻa honau laumālié mei honau sinó, ko ha nofo pōpula.

51 Naʻe akoʻi ʻa kinautolú ni ʻe he ʻEikí, pea foaki kiate kinautolu ʻa e mālohi ke nau tuʻu hake, ʻi he hili ʻa ʻene toetuʻu mei he pekiá, ke nau hū atu ki he puleʻanga ʻo ʻene Tamaí, pea fakakalauni ai ʻa kinautolu ʻaki ʻa e moʻui taʻe-faʻa-maté mo e moʻui taʻengatá.

52 Pea toe hoko atu ai pē ʻa ʻenau ngāué ʻo hangē ko e talaʻofa ʻa e ʻEikí, pea ke nau maʻu mo e ngaahi tāpuaki kotoa pē ʻa ia naʻe fakatatali maʻanautolu ʻoku ʻofa kiate Iá.

53 Naʻe ʻi he maama foki ʻo e ngaahi laumālié ʻa e Palōfita ko Siosefa Sāmitá, mo ʻeku tamaioʻeiki ko Hailame Sāmitá, mo Pilikihami ʻIongi, mo Sione Teila, mo Uilifooti Utalafi, pea mo e ngaahi laumālie kehe ʻe niʻihi naʻe fakatatali ke nau toki haʻu ʻi he kakato ʻo e ngaahi kuongá ke nau kau ʻi hono fokotuʻu ʻo e ngaahi makatuʻunga ʻo e fuʻu ngāue lahi ʻo e ngaahi ʻaho ki mui ní,

54 ʻA ia naʻe kau ai ʻa hono langa ʻo e ngaahi temipalé, pea mo hono fai ʻi ai ʻo e ngaahi ouau ki hono huhuʻi ʻo e kau pekiá ʻa ia naʻa nau ʻi he maama foki ʻo e ngaahi laumālié.

55 Naʻá ku vakai foki naʻa nau kau ʻi he kakai ʻeiki mo tuʻu-ki-muʻa ʻa ia naʻe fili ʻi he kamataʻangá ke nau hoko ko e kau pule ʻi he Siasi ʻo e ʻOtuá.

56 ʻIo, ki muʻa ʻi hono fanauʻi mai ʻo kinautolú, naʻa nau maʻu fakataha mo e fuʻu tokolahi kehe ʻa ʻenau ngaahi ʻuluaki lēsoní ʻi he maama ʻo e ngaahi laumālié pea naʻe teuteuʻi kinautolu ke nau haʻu ʻi he taimi totonu ʻo e ʻEikí ʻo ngāue ʻi heʻene ngoue vainé ki hono fakamoʻui ʻo e ngaahi laumālie ʻo e tangatá.

57 Naʻá ku mamata ai ko e kaumātuʻa angatonu ko ia ʻo e kuonga ko ʻení, ʻi heʻenau mavahe atu meí he moʻui fakamatelié, ʻoku hoko atu ai pē ʻa ʻenau ngāué ʻi hono malanga ʻaki ʻo e ongoongolelei ʻo e fakatomalá mo e huhuʻí, tuʻunga ʻi he feilaulau ʻa e ʻAlo pē Taha naʻe Fakatupu ʻo e ʻOtuá, ʻi he lotolotonga ʻo kinautolu ʻoku nau ʻi he fakapoʻulí pea nau kei haʻisia ʻi he angahalá ʻi he fuʻu maama lahi fau ʻo e ngaahi laumālie ʻo e kau pekiá.

58 Ko e kau pekia ko ia ʻoku fakatomalá ʻe huhuʻi ʻa kinautolu, ʻo kapau te nau talangofua ki he ngaahi ouau ʻo e fale ʻo e ʻOtuá,

59 Pea ʻo ka hili ʻa ʻenau totongi ʻa e tautea ʻo ʻenau ngaahi maumau-fonó, pea fufulu ʻa kinautolu ʻo nau maʻá, te nau toki maʻu ha totongi ʻo fakatatau ki heʻenau ngaahi ngāué, he ko e kau ʻea-hoko kinautolu ki he fakamoʻuí.

60 Pea naʻe anga pehē ʻa hono fakahā mai kiate au ʻa e meʻa-hā-mai ki hono huhuʻi ʻo e kau pekiá, pea ʻoku ou fakamoʻoniʻi ia, pea ʻoku ou ʻilo ʻoku moʻoni ʻa e ngaahi lekooti ko ʻeni ʻoku ou faí, tuʻunga ʻi he tāpuaki ʻa hotau ʻEiki mo hotau Fakamoʻui, ko Sīsū Kalaisí, ʻe pehē. ʻĒmeni.