Wase 14
Na ivakatakila sa soli yani mai vei Josefa Simici na Parofita kivei Tevita Witima, e Feieti, Niu Ioka, June 1829. Eratou sa taleitaka sara vakalevu na kena vakadewataki na iVola i Momani na matavuvale na Witima. Sa laki yavutaka na nona itikotiko na Parofita ena vale nei Pita Witima Levu, a sa vakaitikotiko mai kea me yacova na vakacavari ni vakadewa, ka vakataudeitaki na kena taukeni na dodonu ni ivola ka sa voleka mai. E tolu na luvei Witima tagane, ka ratou sa dui ciqoma na ivakadinadina ena dina ni cakacaka oqo, e ratou sa lomaleqa ena vuku ni nodratou dui itavi yadua. Na ivakatakila oqo kei na rua ka tarava (wase 15 kei na 16) a soli me isau ni dua na vakatataro ena Urimi kei na Cumimi. Ko Tevita Witima a qai yaco me dua vei iratou na tolu na ivakadinadina ki na iVola i Momani.
1–6, Era na vakabulai na dautatamusuki ena were ni vaini; 7–8, Na bula tawamudu sa isolisoli levu duadua ni Kalou; 9–11, E bulia ko Karisito na lomalagi kei na vuravura.
1 E dua na cakacaka levu ka veivakurabuitaki sa vakarau yaco vei ira na luve ni tamata.
2 Raica, koi Au na Kalou; mo rogoca matua na noqu vosa, ni sa bula ka kaukauwa, sa gata vakalevu ka mucu ga na iseleiwau batirua, sa wasea rua na isema kei na uto ni sui; o koya, mo rogoca matua kina na noqu vosa.
3 Raica, sa matua tu na were ka sa vakarau na tatamusuki; ia, ko koya sa gadreva me tatamusuki, me curumaka na nona isele takelo ena nona igu, ka ia na tatamusuki ni sa siga toka, io me kumuna vata ki yalona na veivakabulai tawavakaiyalayala ena matanitu ni Kalou.
4 Io, ko koya yadua sa curumaka na nona isele takelo ka tatamusuki, sa kacivi dina mai vua na Kalou ko koya.
5 O koya oqo, kevaka ko na kerea vei au, ena soli vei iko; kevaka ko na tukituki ena dolavi vei iko.
6 Mo gumatua sara mo tara cake na noqu Saioni. Mo muria na noqu ivakaro ena veika kecega.
7 Ia, kevaka ko sa muria na noqu ivakaro ka vosota me yacova na ivakataotioti ko na rawata dina na bula tawamudu, na isolisoli uasivi duadua vei ira na isolisoli uasivi ni Kalou.
8 Ka na qai yaco, ni kevaka ko na kerea na Tamada ena yacaqu, ena vakabauta ka vakadinata, ko na ciqoma na Yalo Tabu, ka dau veivakauqeti vei iko, mo na tu ka ivakadinadina ni veika ruarua ko na rogoca ka raica, ka vakakina mo na vakatakila yani na veivutuni vei ira na itabatamata oqo.
9 Raica, koi Au ko Jisu Karisito, na Luve ni Kalou bula, o koya, ka bulia na lomalagi kei na vuravura, e dua na rarama ka na sega ni rawa ni vunitaki ena butobuto;
10 O koya, sa dodonu meu kauta mai na taucoko ni noqu kosipeli mai na Matanitu Tani ki na mataqali i Isireli.
11 Ia raica, ko iko Tevita, ko sa kacivi mo veivuke; ia kevaka ko na vakayacora, ka yalodina kina, ko na vakalougatataki ruarua, vakayalo ka vakayago, ia ena levu sara na kemu isau. Emeni.