Jekjōn 17
Revelesōn letok kōn Josep Smith Rikanaan eo n̄an Oliver Cowdery, Devid Whitmer, im Martin Harris, ilo Fayette, New York, Juun 1829, m̧oktaļo̧k jān aer lali pileij ko kar m̧wijit ioer im ļo̧o̧k in Bok in Mormon eaar pād ie. Josep im rijeje eo an, Oliver Cowdery, rekar jeļā jān ukok eo an Bok in Mormon pileij ko ke jilu rikam̧ool rejenolo̧k naaj kar kaalikkar er (lale Ether 5:2–4; 2 Nipai 11:3; 27:12). Oliver Cowdery, Devid Whitmer, im Martin Harris rekar em̧m̧akūt jān ikdeelel eo jān unoojdikdik an jetōb bwe ren rikam̧ool rein rejenolo̧k. Rikanaan eo ar kajjitōk ippān Irooj, im revelesōn in kar letok ilo uwaak kōn Urim im Tumim eo.
1–4, Jān tōmak Rikam̧ool Ro Jilu renaaj lo pileij ko im bar jet men ko rekwōjarjar; 5–9, Kraist ej letok naan in kam̧ool eo ke Bok in Mormon ej jān lan̄.
1 Lo, Ij ba n̄an kom̧, bwe kom̧ aikuj atartar ioon naan eo Aō, eo eļan̄n̄e kom̧ij kōm̧m̧ane kōn obrak in bōro em̧ool, kom̧ naaj loi pileij ko, im barāinwōt kom̧ naaj lo dipil eo, jāje eo an Leban, Urim im Tumim eo, ko kar leļo̧k n̄an ļeo jein im jatin Jered ioon toļ eo, ke eaar ekkōnono ippān Irooj ilo lukkuun jelm̧ae, im kein tōl ko rekabwilōn̄lōn̄ kar liļo̧k n̄an Liai ke eaar pād ilo āne jem̧aden, ioon tōrerein ko an Lom̧aļo Ekilmir.
2 Im ej jān tōmak eo amijel bwe kom̧ijel en maron̄ loi, em̧ool jān tōmak eo me eaar jān rikanaan ro etto.
3 Im ālikin amijel bōk tōmak, im kar loi kōn mājāmijel, kom̧ijel naaj kam̧ool kaki, jān kajoor eo an Anij;
4 Im men in kom̧ijel naaj kōm̧m̧ane bwe rikarejera Josep Smith, Jun., en jab maron̄ jorrāān, bwe In maron̄ kōjerkaktok jibadbad ko rejim̧we Aō n̄an ro nejin armej raņ ilo jerbal in.
5 Im kom̧ijel naaj kam̧ool bwe kom̧ijel ar loi, em̧ool āinwōt rikarejera Josep Smith, Jun., eaar loi; bwe ej jān kajoor eo Aō eaar loi, im ej kōnke eaar wōr an tōmak.
6 Im eaar ukōte bok eo, em̧ool m̧ōttan eo Iaar jiron̄ e, im āinwōt amijel Irooj im amijel Anij emour e em̧ool.
7 Kōn menin, kom̧ijel ar bōk ejja kajoor in wōt, im ejja tōmak in wōt, im ejja mennin letok in āinwōt e;
8 Im eļan̄n̄e kom̧ijel ej kōm̧m̧ani kien kein Aō āliktata, ko Iaar liwōj n̄an kom̧ijel, aor ko an hell rej jamin anjo̧ ņae kom̧ijel; bwe Aō jouj ebwe n̄an kom̧ijel, im naaj kotak kom̧ijel ilo raan eo āliktata.
9 Im N̄a, Jisōs Kraist, ami Irooj im ami Anij, Eaar kōnono men in n̄an kom̧ijel, bwe I maron̄ kōjerkaktok jibadbad ko Aō rejim̧we n̄an ro nejin armej raņ. Amen.