Wase 25
Na veika sa vakatakilai vei Josefa Simici na Parofita, mai Amoni, Penisilivenia, ena Julai, 1830. (raica na ikau ni wase 24). Sa vakatakilai ena ivakatakila oqo na nona inaki na Turaga ena vukui Ema Simici, na watina na Parofita.
1–6, Sa lesi ko Ema Simici, e dua na marama digitaki, me dauveivukei ka dauveiqaravi vua na watina; 7–11, Sa lesi tale ga ko koya me vunivola, me vakamacalataka na ivolanikalou, ka digitaka eso na sere; 12–14, A nodra sere na yalododonu sa nodra masu vua na Turaga; 15–16, Na ivakavuvuli ni talairawarawa ena ivakatakila oqo sa baleta na tamata kecega.
1 Vakatudaliga ki na domo ni Turaga na nomu Kalou, niu sa vosa tiko vei iko, i Ema Simici, na luvequ; ni’u sa kaya vakaidina vei iko, ko ira kecega sa vakabauta na noqu kosipeli, era sa luvequ tagane ka luvequ yalewa ena noqu matanitu.
2 E dua na ivakatakila kau sa solia vei iko me baleta na noqu inaki; ia kevaka ko sa yalodina ka lako ena sala ni caka dodonu e mataqu, au na maroroya na nomu bula ka vakarautaka e dua na nomu ivotavota vakawa mai Saioni.
3 Raica, sa vosoti na nomu ivalavala ca, ia ko sa marama digitaki ka’u sa lesi iko.
4 Mo kakua ni vosa kudrukudrutaka na ka a sega ni vakaraitaki vei iko, raica au sa lewa me kakua ni vakaraitaki vei iko kei ira tale ga na kai vuravura, ni sai koya oqo na noqu lewa yalomatua me yacova e dua na gauna mai muri.
5 Ia sa nomu ilesilesi mo qarava na noqu tamata, ko Josefa Simici Lailai, na watimu, ena gauna ni nona rarawa, ena vosa ni veivakacegui ena yalomalua.
6 Ka mo drau lako vata ena veigauna e dau lako kina, io mo nona vunivola voli ena gauna e sega tiko kina ni dua na nona vunivola, me rawa kina niu tala mada na noqu tamata, o Oliva Kaudari ki na veivanua au sa lewa.
7 Ia ko na tabaki mai na ligana mo vakamacalataka na ivolanikalou, ka veivakauqeti vei ira na lewe ni lotu, me vaka na kena ivalavala ena qai soli vei iko mai na Yaloqu.
8 Ni na vakotora na ligana vei iko, ka mo ciqoma na Yalo Tabu, ka me qai vakayagataki na nomu gauna ena volavola, ka vakakina ena vuli ka vakalevu.
9 Ia mo kakua ni rere, ni na tokoni iko na watimu ena lotu; ni sa nona ilesilesi ko koya me vakatakila vei ira na lewe ni lotu, na veika au sa lewa, me vaka ga na nodra vakabauta.
10 Raica au sa kaya vakaidina vei iko, mo kakua ni domona na iyau vakavuravura, ia mo vakasaqara na iyau e uasivi cake.
11 Ka na soli vei iko, mo digitaka talega eso na sere tabu, me vaka ni na soli vei iko, na kena e dodonu vei au, me vakayagataki ena noqu lotu.
12 Raica sa dau rekitaka na yaloqu na sere sa lagati ena yalodina; io, na nodra sere na yalododonu sa nodra masu vei au, ka na saumi vei ira ena veivakalougatataki ki uludra.
13 O koya, mo reki kina ka marau, ia mo dei tikoga ki na veiyalayalati ko sa cakava.
14 Toso tikoga ena yalomalua, ka qarauni iko mai na yalo qaciqacia. Me taleitaki watimu na yalomu, kei na lagilagi ena takavi koya mai.
15 Mo muria tiko ga na noqu vunau, ia ko na rawata kina na isala ni yalododonu. Ia vakavo ga kevaka ko na vakayacora na veika oqo, ko na sega ni lako rawa mai ki na vanua ka’u sa tiko kina.
16 E dina, e dina au sa kaya vei iko, sa domoqu oqo vei ira na tamata kecega. Emeni.