Jekjōn 34
Revelesōn letok kōn Josep Smith Rikanaan eo n̄an Orson Pratt, ilo Fayette, New York, Nobōm̧ba 4, 1830. Brother Pratt ar jon̄oul ruwatimjuon iiō dettan ilo tōre in. Eaar oktak im peptaij ke eaar ron̄ kwaļo̧k naan kōn gospel eo kar kōjepļaaktok jān ļeo jein erūtto, Parley P. Pratt, jiljino wiik m̧oktaļo̧k. Revelesōn in kar bōke ilo m̧weo im̧ōn Piter Whitmer Sr.
1–4, Ro rej tōmak rej erom m̧aan ro nejin Anij kōn Pinmuur eo; 5–9, Kwaļo̧k naan kōn gospel eo ej kōpooje iaļ eo n̄an Itok eo Kein Karuo; 10–12, Kanaan ej itok jān kajoor eo an Jetōb Kwōjarjar.
1 Nejū m̧aan Orson, eo̧ron̄ im ron̄ im lo ta N̄a, Irooj Anij, Inaaj ba n̄an eok, em̧ool Jisōs Kraist am Ripinmuur;
2 Meram eo im mour eo an laļ, meram eo me ej romaak ilo marok im marok ej jab jeļā E;
3 Eo jon̄an An iakwe laļ Eaar ajeļo̧k mour eo An make, bwe jon̄an wōt eo enaaj kar lōke remaron̄ erom m̧aan ro nejin Anij. Kōn menin kwe kwōj nejū m̧aan;
4 Im kwo jeraam̧m̧an kōnke kwaar lōke;
5 Im kwo jeraam̧m̧anļo̧k kōnke em̧ōj Aō kar kūr eok n̄an kwaļo̧k naan kōn gospel eo Aō—
6 N̄an kotak ainikiōm āinwōt ainikien juon jilel, jim̧or aetok im eļļaaj, im kūr ukeļo̧k n̄an juon epepen eankeke im nana, kōpooj iaļ eo an Irooj n̄an Itok eo An kein karuo.
7 Bwe lo, em̧ool, em̧ool, Ij ba n̄an eok, iien eo ej jab ettoļo̧k im Inaaj itok ilo juon kōdo̧ kōn kajoor im aiboojoj eļap.
8 Im enaaj juon raan eļap ilo iien eo Ij itok, bwe aolep laļ ko renaaj m̧akūtkūt.
9 Ak m̧okta jān itok an raan eo eļap, aļ enaaj marok, im allōn̄ enaaj oktak n̄an bōtōktōk; im iju ko renaaj m̧akoko in romaak, im jet renaaj wōtlo̧k, im ko̧kkure eļap ej kōttar ro renana.
10 Kōn menin, kotak ainikiōm im jab dāpiji, bwe Irooj Anij eaar kōnono; kōn menin kanaan, im naaj lewōj jān kajoor eo an Jetōb Kwōjarjar.
11 Im eļan̄n̄e kwōj niknik, lo, Ij pād ippam̧ m̧ae Aō itok—
12 Im em̧ool, em̧ool, Ij ba n̄an eok, em̧ōkaj Aō itok. N̄aij am Irooj im am Ripinmuur. Em̧ool āindein. Amen.