Mwakoro 35
Kaotioti ae kaotaki nakon Iotebwa Timiti te Burabeti ao Sidney Rigdon, i Fayette, New York ke i rarikina, n Ritembwa 7, 1830. N te tai aei, te Burabeti e kuri n rangi n tabe ni katoa bong ni karaoan te rairairi n te Baibara. E moanaki te rairairi n Tuun 1830, ao a riki Oliver Cowdery ma John Whitmer bwa taan koroboki. E ngae ngke a tia ni weteaki nakon tabeia tabeua, e a weteaki Sidney Rigdon iroun te Atua bwa e na beku bwa ana tia koroboki te Burabeti n te mwakuri aei (taraa te kibu 20). Ni kabwarabwaran te rongorongo n te kaotioti aei, n rongorongon Iotebwa Timiti e koreaki ae kangai: “N Ritembwa e roko Sidney Rigdon [mai Ohio] ni bubutia te Uea, ao e roko ma Edward Partridge. … E aki maan i mwin rokoia taari aika uoman aikai ao e taetae te Uea.”
1–2, A na kanga n riki aomata bwa natin te Atua; 3–7, E weteaki Sidney Rigdon bwa e na bwabetito ao n anga te Tamnei ae Raoiroi; 8–12, A karaoaki taiani kanikina ao kakai man te onimaki; 13–16, A na kamaenakoaki botanaomata aika buakaka mai irouia aika raoiroi irouia ana taan mwakuri te Uea ni mwaakan te Tamnei; 17–19, Iotebwa Timiti e taui kiingin mwakuri aika a raba; 20–21, Naake a tia n rineaki a na kona n tei n te bong are e na roko iai te Uea; 22–27, E na kamaiuaki Iteraera.
1 Ongo nakon bwanaan te Uea ae Atuam, are Arebwa ao Omeka, te moan ao te kabane, are kawaina ai aron te mronron ae akea tokina, titebo ngkai ma are ngkoananoa, ao n aki toki.
2 Ngai Iesu Kristo, Natin te Atua, are e tauraki ibukin buren te aonaba, ao ni kabane ake a kakoaua arau, bwa a na riki bwa natin te Atua, n riki n teuana Irou n aron ae I katiteuanaki ma te Tama, n aron ae katiteuanaki te Tama ma Ngai, bwa ti aonga ni katiteuanaki.
3 Nooria, e koaua, e koaua, ae I tuangko au tia mwakuri ae Sidney, I a tia n taraiko ma am mwakuri. I a tia n ongo am tataro, ao ni katauraoiko ibukin te mwakuri ae korakora riki.
4 Ko na kakabwaiaaki, bwa ko na karaoi bwaai aika korakora. Nooria ko kanakoaki, n aron Ioane, ni katauraoa te kawai i mwaiu, ao i mwain Eria are e na roko, ao ngkoe ko aki ataia.
5 Ko bwabetito n te ran nakon te rairannano, ma a aki karekea te Tamnei ae Raoiroi;
6 Ma ngkai I anganiko te tua, bwa ko na bwabwetito n te ran, ao a na karekea te Tamnei ae Raoiroi man te katoka bai, n aroia abotoro ake ngkoa.
7 Ao e na koro bukina bwa e na iai te mwakuri ae korakora n te aba aei, i buakoia naba Tientaire, bwa e na kaotaki babaia ma aia mwakuri aika bati n ribaki i mataia aomata ni kabane.
8 Bwa Ngai te Atua, ao e aki kakimototoaki baiu; ao N na kaotii taian kakai, kanikina, ao kamimi, nakoia ni kabane ake a kakoaua arau.
9 Ao ane e bubuti n arau ma te onimaki, a na kona ni kanakoi taian riaboro; a na kamarurungiia aoraki; a na karikiia taiani mataki bwa a na nooraba, ao bonotaninga bwa a na ongo, ao baenewe bwa a na taetae, ao mwauku bwa a na nakonako.
10 Ao e waekoa n roko te tai are a na kaotaki iai bwaai aika korakora nakoia natiia aomata;
11 Ma n akean te onimaki ana akea te bwai ae e na kaotaki ma ti te kananoanga i aon Bwaburon, titebo ma are e kairoroia botanaomata ni kabaneia bwa a na mooi ni wain n te un n ana wenenibure.
12 Ao akea ae karaoa ae raoiroi ma tii naake a tauraoi ni karekea bwaninin au euangkerio, are I a tia ni kanakoa nakon te roro aei.
13 Mangaia are, I wetei bwaai ake a mamaara n te aonaba, naake aki reirei ao a ribaki, bwa a na kamaenakoia botanaomata ni mwaakan Tamneiu;
14 Ao a na riki baia bwa baiu, ao N na riki bwa aia otanga ao otangaia ae e uarereke; ao N na kabaea nukaia, ao a na un n aroia mwaane ibukiu; ao aia kairiribai a na mena i aan waeia; ao N na kabwakaa te kabaang ibukiia, ao man ain uniu are N na kawakiniia iai.
15 Ao ake a kainano ao a nimamannei e na tataekinaki te euangkerio nakoia, ao a na kakantaningaa tain rokou, bwa e a kaan—
16 Ao a na reiakina te taetae ni kaikonaki ibukin te aroka ae te biiku, bwa n aron ae ngkai ae e nang roko tain te kabuebue.
17 Ao I a tia ni kanakoa bwaninin au euangkerio ni bain au tia mwakuri ae Iotebwa; ao ni kakabwaiaa ni kabwakana;
18 Ao I a tia n anganna kiingin mwakuri aika raba ake bwaai ake a tia ni kainaki, bwaai ake man moan karikan te aonaba, ao bwaai naba ake a na roko man te tai aei ni karokoa tain rokou, ngkana e kakaonimaki irou, ao ngkana e aki, N na unika temanna n onea mwiina.
19 Mangaia are, tarataraia bwa e na aki bwaka ana onimaki, ao e na anganaki mai iroun te Tia Karaunano, te Tamnei ae Raoiroi, are e atai bwaai ni kabane.
20 Ao I anganiko te tua—bwa ko na koroboki ibukina; ao N na anga koroboki aika tabu, n aron are bon mai i nanou, nakon kamaiuaia naake I a tia n rineia;
21 Bwa a na ongo bwanaau, ao n noorai, ao a na aki matu, n tei n te bong are N na roko iai; bwa a na kaitiakaki, n arou ae I itiaki.
22 Ao ngkai I tuangko, tiiku ma ngaia, ao e na mwananga ma ngkoe; tai kiitanna, ao a na bon koro bukin bwaai aikai.
23 Ao ngkana kam aki koroboki, nooria, e na anganaki bwa e na taetae ni burabeti; ao ko na tataekina au euangkerio ao ni weteia burabeti aika tabu bwa a na kakoauai ana taeka, n aron are e na anganaki.
24 Kawakin tua ni kabane ma berita ake ko bae iai; ao N na karika karawa bwa e na ruru ibukin kabwaiam, ao e na ruru Tatan ao e na kimwareirei Tion i aon tabuki ao ni korakora rikirakena;
25 Ao e na kamaiuaki Iteraera n oin au tai are I taku; ao a na kairaki ni kiing are I a tia n anga, ao a na akea te anga ae a na manga kamangaoaki iai.
26 Tabekarake nanomi ao kimwareirei, bwa e a kan roko kaboakimi.
27 Tai maaku, ngkami au nanai aika uarereke, bwa ami bwai te abanuea ni karokoa I roko. Nooria, e rangi n tawe rokou. Eng. Amen.