Wase 37
Na veika sa vakatakilai vei Josefa Simici na Parofita kei Sidini Rikitoni, volekati Feieti e Niu Ioka, ena Tiseba 1830. Sa soli eke na imatai ni vakaro me baleta e dua na vakasoqoni vata tale ena itabagauna oqo.
1–4, Era sa kacivi na Yalododonu me ra soqoni vata yani ki na Oaio.
1 Raica, au sa kaya vei kemudrau, au sa lewa me cegu tu mada na nomudrau vakavakadewa ka mo drau lako ki Oaio, au sa kitaka oqo ena vukumudrau kei ira na kemudrau meca.
2 Ia au na kaya tale vei kemudrau, mo drau kakua mada ni lako, me yacova ni drau sa vunautaka na noqu kosipeli ena yasayasa oqo, ka vaqaqacotaka na lotu ena veivanua kecega sa tu kina, vakauasivi cake mai Kolosivili; raica, era sa dau masuti au vagumatua ena vakabauta.
3 Ia au na solia tale e dua na ivakaro ki na lotu, niu sa lewa me ra soqoni vata yani ki Oaio, ka waraka kina me lesu yani vei ira ko Oliva Kaudari na noqu tamata.
4 Raica, sai koya oqo na yalomatua, ia me ra dui lewa na tamata yadua na ka me ra kitaka me yacova na noqu lesu tale mai. Ia ena yaco vakakina. Emeni.