Mwakoro 39
Kaotioti ae kaotaki rinanon Iotebwa Timiti te Burabeti nakon James Covel, i Fayette, New York, n Tianuare 5, 1831. James Covel, are ngaia ngkoa te minita n te aro are te Methodist i nanon ae kania abwi te ririki, e berita ma te Uea bwa e na ongeaba nakon tua nako are e na anganna te Uea rinanon Iotebwa te Burabeti.
1–4, Iai mwaakaia Aomata aika a Itiaki n riki bwa natin te Atua; 5–6, Ni karekean te euangkerio bon karekean Kristo; 7–14, E tuangaki James Covel bwa e na bwabetitoaki ao ni mwakuri n ana nne ni kurebe te Uea; 15–21, A na tataekina te euangkerio ana taan mwakuri te Uea i mwaain te Kauaoki; 22–24, Naake a karekea te euangkerio a na bon ikotaki n te tai aei ao n te tai ae akea tokina.
1 Ongora ao kakauongo nakon bwanaan teuare boni ngaia man taai are akea tokiia nakon taai are akea tokiia, ae Korakora ae Ngai, ae Iesu Kristo—
2 Ootan ao maiun te aonaba; te oota are e oota n te roo ao te roo e aki kinaa.
3 Titebo ma are e roko i nukan te tai nakoia ake oin au aomata, ao ake oin au aomata aki butimwaeai;
4 Ma nakoia ni kabane ake a butimwaeai, I anganiia te mwaaka n riki bwa natiu; ao N na bon anga nakoia ni kabane ake a na butimwaeai te mwaaka n riki bwa natiu.
5 Ao e koaua, e koaua ae I tuangko, bwa ane e butimwaea au euangkerio e butimwaeai; ao ane e aki butimwaea au euangkerio e aki butimwaeai.
6 Ao bon aio au euangkerio—te rairannano ao te bwabetito i nanon te ran, ao i mwina e na reke te bwabetito n te ai ao te Tamnei ae Raoiroi, are te Tia Karaunano, are e kaoti bwaai ni kabane, ao n reirei bwain te abanuea aika rau.
7 Ao ngkai, nooria, I tuangko, au tia mwakuri ae James, I a tia n tarai am mwakuri ao I ataiko.
8 Ao e koaua ae I tuangko, bwa ngkai eti nanom imatau n te tai aei; ao, nooria, I a tia ni katokai kakabwaia aika korakora i aon atuum;
9 Ma e ngae n anne, ko a tia n rinanon te nanokawaki ae korakora, bwa ko a tia n rawa n ongo Irou n taai aika mwaiti ibukin te kamoamoa ao raraomaeakinan bwain te aonaba.
10 Ma, nooria, e a roko bongin kamaiuam, ngkana ko ongo nakon bwanaau, are e taku nakoim: Teirake ao bwabetitoaki, ao n teboki am bure, ni wetea arau, ao ko na karekea Tamneiu, ao te kakabwaia ae korakora ae ko tuai n ataia.
11 Ao ngkana ko karaoa aei, I a tia ni katauraoiko ibukin te mwakuri ae korakora riki. Ko na tataekina bwaninin au euangkerio, are I a tia ni kanakoa ni boong aika kaitira aikai, te berita ae tabu are I a tia ni kanakoa ni kamaiuiia au aomata, aika kaain te bata are Iteraera.
12 Ao e na koro bukina bwa e na tiku te mwaaka i aom; ko na karekea te onimaki ae korakora, ao N na mena iroum ao N na rimoam.
13 Ko weteaki bwa ko na mwakuri n au nne ni kurebe, ao ni karikirakea au ekaretia, ao ni katea Tion, bwa e na kimwareirei i aon tabuki ao man korakora rikirakena.
14 Nooria, e koaua, e koaua, ae I tuangko, ko aki weteaki bwa ko na nako nakon aaba ake i mainiku, ma ko weteaki bwa ko na nako Ohio.
15 Ao ngkana a teimatoa au aomata ni botaki i Ohio, I a tia ni kawakina te kakabwaia ae e aki ataaki i buakoia natiia aomata, ao e na kabwaroaki i aon atuuia. Ao man te tai anne a na waaki mwaane nakoia botanaomata ni kabane.
16 Nooria, e koaua, e koaua, ae I tuangko, bwa aomata ake i Ohio a weteai ma te onimaki ae bati, n iangoia bwa N na taua baiu ni motikitaeka i aoia botanaomata, ma I aki kona ni kakewei au taeka.
17 Mangaia are waaki ni karaoia ma marurungim ao weteia taan mwakuri aika kakaonimaki nakon au nne ni kurebe bwa e aonga n ereaki ibukin te kabanea n tai.
18 Ao ngkana a raira nanoia ao ni butimwaea bwaninin au euangkerio, ao ni katabuaki, N na taua baiu ni motikitaeka.
19 Mangaia are, waaki nako, takarua ma te bwana ae baibati, ni kangai: E a kaan roko abanuean karawa; n taekina: Otanna! E na kakabwaiaki aran te Atua ae Moan te Rietata.
20 Waaki nako bwabetito i nanon te ran, katauraoa te kawai imwaiu ibukin tain rokou;
21 Bwa e a kaan roko te tai; akea te aomata ae ataa te bong ke te aoa; ma e na bon roko.
22 Ao ane e butimwaai bwaai aikai e butimwaeai; ao a na ikotaki nakoiu n te tai aei ao n te tai ae akea tokina.
23 Ao teuana riki, e na bon koro bukina bwa i aoia ni kabane ake ko bwabetitoia i nanon te ran, ko na katoka baim i aoia, ao a na karekea te bwaintituaraoi ae te Tamnei ae Raoiroi, ao a na taratarai kanikina ibukin rokou, ao a na ataai.
24 Nooria, E tawe rokou. Eng. Amen.