1 Faalogo mai ia, outou e toeaina o la’u ekalesia, o e ua outou faapotopoto faatasi outou lava i lo’u igoa, o Iesu Keriso lava le Atalii o le Atua soifua, le Faaola o le lalolagi; e tusa ai ua outou talitonu i lo’u igoa ma tausi i a’u poloaiga.

2 Ou te toe fai atu ia te outou, faalogo ma faafofoga ma usiusitai i le tulafono o le a Ou tuu atu ia te outou.

3 Aua e moni Ou te fai atu, talu ai ona ua outou faapotopoto faatasi outou lava e tusa ma le poloaiga na Ou poloaiina ai outou, ma ua outou autasi e faatatau i lenei mea e tasi, ma sa outou ole atu ai i le Tamā i lo’u igoa, o le a faapea lava ona outou maua.

4 Faauta, e moni Ou te fai atu ia te outou, Ou te tuu atu ia te outou le poloaiga muamua lenei, ia outou o atu i lo’u igoa, outou uma taitoatasi, vagana ai a’u auauna o Iosefa Samita, Le Itiiti, ma Sini Rikitone.

5 Ma Ou te tuu atu ia te i laua se poloaiga ia laua o atu mo se vaitau itiiti, ma o le a tuu atu e le mana o le Agaga le taimi la te toe foi mai ai.

6 Ma ia outou o atu i le mana o lo’u Agaga, ma talai atu la’u talalelei, taitoalua, i lo’u igoa, ma sii a’e o outou leo faapei o le leo o se pu, e alaga atu la’u upu e pei o agelu a le Atua.

7 Ma ia outou o atu ma papatiso atu i le vai, fai atu: Inā outou salamo ia, inā outou salamo ia, ona ua oo mai le malo o le lagi.

8 Ma mai i lenei nofoaga, ia outou o atu ai i nofoaga i sisifo; ma e tusa ai ma lo outou mauaina o i latou o e o le a latou taliaina outou, ia outou atia’e la’u ekalesia i itulagi uma—

9 Sei oo i le taimi o le a faaali atu ai ia te outou mai luga, le taimi o le a saunia ai le aai o le Ierusalema Fou, ina ia mafai ona faapotopotoina outou i se tino e tasi, ina ia mafai ona avea outou ma o’u nuu ma o le a avea A’u ma o outou Atua.

10 O lenei foi, Ou te fai atu ia te outou, o le a tulai pea la’u auauna o Eteuati Paterika i le tofiga ua Ou tofia i ai o ia. Ma o le a oo mai, afai e solitulafono o ia, o le a tofia se tasi i lona tulaga. E faapea lava. Amene.

11 O lenei foi Ou te toe fai atu ia te outou, o le a lē tuuina atu i soo se tasi e alu e talai atu la’u talalelei, pe ati a’e la’u ekalesia, vagana ai ua faauuina o ia e se tasi ua i ai le pule, ma ua lauiloa i le ekalesia ua ia te ia le pule ma ua faauuina o ia i le ala e tatau ai e ao o le ekalesia.

12 O lenei foi, ia aoao atu e toeaina, ositaulaga ma aoao o lenei ekalesia, mataupu autu o la’u talalelei, ua i ai i totonu o le Tusi Paia ma le Tusi a Mamona, ua i ai le atoatoaga o le talalelei.

13 Ma ia latou vaai ia faia feagaiga ma mataupu faavae o le ekalesia, ma o mea ia ia latou aoao atu, e pei ona o le a taitaiina ai i latou e le Agaga.

14 Ma o le a tuu atu ia te outou le Agaga e ala i le tatalo o le faatuatua; ma afai tou te lē maua le Agaga aua tou te aoao atu.

15 Ma o nei mea uma ia outou vaai ia faia e pei ona Ou poloaiina e faatatau ia outou aoaoga, sei oo ina tuuina atu le atoatoaga o a’u tusitusiga paia.

16 Ma a’o siitia a’e o outou leo e ala i le Fesoasoani, o le a outou tautatala ma vavalo atu e pei ona lelei ia te a’u;

17 Aua, faauta, ua silafia e le Fesoasoani mea uma, ma ua molimau e uiga i le Tamā ma le Atalii.

18 Ma o lenei, faauta, Ou te tautala atu i le ekalesia. Aua e te fasioti tagata; ma o ia o lē e fasioti tagata o le a lē maua se faamagaloga i le lalolagi lenei, po o i le lalolagi a sau.

19 O lenei foi, Ou te fai atu, aua e te fasioti tagata; ae o ia e fasioti tagata o le a oti.

20 Aua e te gaoi; ma o ia o lē e gaoi ma lē salamo o le a tuli i fafo.

21 Aua e te pepelo; o ia o lē e pepelo ma lē salamo o le a tuli i fafo.

22 Ia e alofa i lau ava ma lou loto atoa, ma ia e pipii atu ia te ia ae lē o se isi.

23 Ma o ia o lē e vaai atu i se fafine i le manao ia te ia, o le a faafiti e ia le faatuatua, ma o le a lē maua e ia le Agaga; ma afai e lē salamo o ia o le a tuli o ia i fafo.

24 Aua e te mulilua; ma o ia o lē e mulilua, ma lē salamo, o le a tuli i fafo.

25 Peitai o ia o lē ua mulilua ma ua salamo ma lona loto atoa, ma lafoai i ai, ma lē toe faia, ia outou faamagaloina.

26 Ae afai e toe faia e ia, o le a lē faamagaloina o ia, ae o le a tuli i fafo.

27 Aua e te tautala leaga e uiga i lē lua te tuaoi, pe faatiga ia te ia.

28 Ua outou iloa o a’u tulafono e faatatau i nei mea ua tuu atu i totonu o a’u tusitusiga paia; o o ia o lē e agasala ma lē salamo o le a tuli i fafo.

29 Afai e te alofa mai ia te a’u, e te auauna mai ia te a’u ma tausi i a’u poloaiga uma.

30 Ma faauta, ia e manatua e ua matitiva, ma ia faapaiaina mo lo latou tausiga ni mea mai au meatotino ua ia te oe e faasoa atu ia te i latou, faatasi ma se feagaiga ma se pepa faamaonia mo meatotino e lē mafai ona solia.

31 Ma e tusa ai ma la outou faasoa atu o a outou mea i e ua matitiva, ia outou faia ia te a’u; ma ia folasia atu ia mea i luma o le epikopo o la’u ekalesia ma ona fesoasoani, o ni toeaina e toalua, po o ni faitaulaga sili, o i laua ia o le a ia tofia pe ua ia tofia ma vaetofia mo lena faamoemoe.

32 Ma o le a oo mai a uma ona folasia atu o ia mea i luma o le epikopo o la’u ekalesia, ma a uma ona ia maua o ia molimau e faatatau i le faapaiaga o meatotino a la’u ekalesia, e lē mafai ona aveesea o ia mea mai le ekalesia, e tusa ai ma a’u poloaiga, ia faia ia tali mai tagata uma taitoatasi ia te a’u, o se tausimea i luga o ana lava meatotino, po o mea ua ia maua e ala mai i le faapaiaga, e tusa ma le tele ua tatau ai mo ia lava ma le aiga.

33 O lenei foi, afai e i ai ni meatotino i lima o le ekalesia, po o ni ona tagata taitoatasi, ua sili atu nai lo mea ua tatau ai mo lo latou tausiga pe a uma lenei faapaiaga muamua, o se toega lea e faapaia atu i le epikopo, ia teuina e avatu ia te i latou o e ua leai ni mea, mai lea taimi i lea taimi, ina ia lava tuuina atu ma maua e tagata uma taitoatasi o e ua manaomia ni mea, e tusa ma ona manao.

34 O lea, o mea e totoe ia teu i lo’u faleteuoloa, e avatu i e ua matitiva ma e ua lē tagolima, e pei ona o le a tofia ai e le aufono maualuga o le ekalesia, ma le epikopo ma lana aufono;

35 Ma mo le faamoemoe o le faatauina mai o fanua mo le manuia lautele o le ekalesia, ma le fausia o fale tapuai, ma le atiina’eina o le Ierusalema Fou lea o le a faaali atu mulimuli mai—

36 Ina ia mafai ona faapotopotoina o lo’u nuu o le feagaiga i se tino e tasi i lena aso pe a Ou alu atu i lo’u malumalu. Ma o le a Ou faia lenei mea mo le faaolataga o o’u tagata.

37 Ma o le a oo mai, o le a tuli ese i fafo o le ekalesia o ia o lē e agasala ma lē salamo, ma o le a lē toe mauaina e ia mea na ia faapaia mai mo e ua matitiva ma lē tagolima o la’u ekalesia, po o i ni isi upu, ia te a’u—

38 E faapei ona outou faia o ia mea i se aupito itiiti o i latou nei, ua outou faia ia mea ia te a’u.

39 Aua o le a oo mai le faataunuuina o mea na Ou tautala atu ai e ala i fofoga o a’u perofeta; ona o le a Ou faapaiaina ni mea mai oloa a i latou o e e taliaina la’u talalelei i totonu o Nuuese, mo e ua matitiva o lo’u nuu o e o le aiga o Isaraelu.

40 O lenei foi, aua e te faamaualuga i lou loto; ia faafaigofie ou ofu uma, ma o lo latou matagofie ia tuu ia faia i le matagofie o galuega a ou lava lima;

41 Ma ia tuu atu i mea uma ia faia i le mama i o’u luma.

42 Aua e te paie; ona o ia e paie o le a lē ’aia le areto pe ofu i ofu o lē e galue.

43 Ma o soo se tasi e i totonu o outou ua ma’i, ma ua leai se faatuatua e faamaloloina ai, ae ua talitonu, ia tausia ma le faapelepele atoa, i laau-afu ma meaai vaivai, ae lē i le lima o se fili.

44 Ma ia valaauina ni toeaina o le ekalesia, e toalua pe sili atu, e tatalo mo i latou ma faaee o latou lima i luga o i latou i lo’u igoa; ma afai e oti i latou e oti i latou ia te a’u, ma afai e ola i latou e ola i latou ia te a’u.

45 Ia outou nonofo faatasi i le alofa, ia outou fetagisi ai i le toesea o i latou o e ua oti, ma aemaise lava mo i latou o e ua leai se faamoemoe mo se toetutu mamalu.

46 Ma o le a oo mai o le a lē tofo i le oti i latou o e e oti ia te a’u, aua o le a suamalie ia te i latou;

47 Ma o i latou o e e lē oti ia te a’u, oi talofa ia te i latou, aua e oona lo latou oti.

48 O lenei foi, o le a oo mai e faamaloloina o ia o lē ua faatuatua mai ia te a’u, ma ua lē tofia e oti, o le a faamaloloina.

49 O ia o lē ua i ai le faatuatua e vaai ai o le a vaai.

50 O ia o lē ua i ai le faatuatua e faalogo ai o le a faalogo.

51 O le pipili o lē ua i ai le faatuatua e oso ai o le a oso.

52 Ma o i latou o e ua lē i ai le faatuatua e faia ai nei mea, ae ua talitonu mai ia te a’u, ua i ai le mana e avea ai mo o’u atalii; ma e tusa ai ma lo latou lē solia o a’u tulafono, ia e tauaveina o latou vaivaiga.

53 Ia e tulai i le tulaga o lau mea-tausi.

54 Aua e te ave le ofu o lou uso; ia e totogi mo mea e te maua mai lou uso.

55 Ma afai e te maua ni mea e sili atu nai lo mea mo lou tausiga, ia e tuu atu ia mea i lo’u faleteuoloa, ina ia mafai ona faia o mea uma e tusa ai ma mea ua Ou fai atu ai.

56 Ia e ole mai, ma o le a tuuina atu ai a’u tusitusiga paia e pei ona Ou tofia, ma o le a faasaoina i latou i le saogalemu;

57 Ma ua tatau ai ia te oe ona taofi lou filemu e faatatau i ia tusitusiga paia, ma lē aoaoina atu i latou seia e mauaina i latou i le atoatoa.

58 Ma Ou te tuu atu ia te outou se poloaiga, ona outou aoao atu ai lea o i latou i tagata uma; ona o le a aoao atu i latou i atunuu uma, ituaiga, gagana ma nuu.

59 Ia e ave mea ua e mauaina, ia na tuu atu ia te oe i a’u tusitusiga paia mo se tulafono, e avea ma a’u tulafono e pulea ai la’u ekalesia;

60 Ma o ia o lē na te faia e tusa ma nei mea, o le a faaolaina, ma o ia o lē na te lē faia ia mea o le a malaia pe afai e faaauau pea o ia faapea.

61 Afai e te ole mai, o le a e maua lea faaaliga e faaopoopo i luga o lea faaaliga, lea malamalama e faaopoopo i luga o lea malamalama, ina ia mafai ona e iloa mealilo ma mea filemu—o mea ia e maua ai le olioli, o mea ia e maua ai le ola e faavavau.

62 Ia e ole mai, ma o le a faaali atu ia te oe i lo’u lava taimi e tatau ai le mea o le a faatuina ai le Ierusalema Fou.

63 Ma faauta, o le a oo mai o le a auina atu a’u auauna i sasae ma sisifo, i matu ma i saute.

64 Ma i le taimi nei lava, ia tuu atu ia te ia o lē e alu atu i sasae ia aoaoina i latou o e o le a liliu mai, ia sosola atu i sisifo, ma o le pogai o lenei mea ona o mea o le a oo mai i luga o le lalolagi, ma ona o faapotopotoga faalilolilo.

65 Faauta, ia e tausia nei mea uma, ma o le a tele lava lou taui; ona ua tuu atu ia te outou ia outou iloaina mealilo o le malo, ae ua lē tuuina atu i le lalolagi ia latou iloaina.

66 Ia outou tausia tulafono ua outou maua ma ia faamaoni.

67 Ma o le a outou maua i se taimi o mulimuli mai feagaiga o le ekalesia, ia o le a lava e faatutumau ai outou iinei ma i le Ierusalema Fou.

68 O lea, o ia o lē ua lē o i ai se poto, ia tuu atu ia te ia e ole mai ia te a’u, ma o le a Ou foai tele atu ia te ia ma lē aoaiina o ia.

69 Ia siitia a’e o outou loto ma olioli, ona ua tuu atu ia te outou le malo, pe faapea foi, o ki o le ekalesia. Ua faapea lava. Amene.

70 O le a maua e ositaulaga ma aoao a latou matafaioi, e pei lava o tagata o le ekalesia.

71 Ma o toeaina po o faitaulaga sili o e ua tofia e lagolago i le epikopo o ni fesoasoani i mea uma, ia tausia o latou aiga mai meatotino ua faapaia atu i le epikopo, mo le lelei o e ua matitiva, ma mo isi faamoemoega, e pei ona ta’ua atu muamua;

72 Pe ia latou maua se totogi tatau ai mo a latou auaunaga uma, pe i se mea-tausi po o se isi mea, e pei ona manatu pe filifili i ai le epikopo ma ona fesoasoani ua sili ona lelei.

73 Ma ia maua foi e le epikopo lona tausiga, po o se totogi tatau ai, mo ana auaunaga uma i le ekalesia.

74 Faauta, e moni Ou te fai atu ia te outou, o ai lava ni tagata i totonu o outou, ua tuu ese a latou soa ona o le faitaaga, po o i ni isi upu, afai latou te molimau mai i o outou luma i le maualalo atoa o le loto o le tulaga lea ua i ai, aua tou te tutuliesea i latou mai totonu o outou;

75 Ae afai tou te maua ni tagata ua latou tuua a latou soa ona o le mulilua, ma o i latou lava ua solitulafono, ma o loo soifua pea a latou soa, ia tutuliese i latou mai i totonu o outou.

76 O lenei foi, Ou te fai atu ia te outou, ia outou mataala ma faaeteete, i le suesue lelei atoa, ina ia outou lē talia ni isi faapea i totonu o outou, pe afai ua faaipoipoina i latou;

77 Ma afai e lei faaipoipoina i latou, ia latou salamo ia latou agasala uma, po ua outou lē taliaina i latou.

78 O lenei foi, o tagata uma taitoatasi o e ua i ai i lenei ekalesia a Keriso, ia vaai ia latou tausia poloaiga ma feagaiga uma o le ekalesia.

79 Ma o le a oo mai, afai e i ai ni tagata o outou e fasioti tagata, ia avatu i latou i luga ma faia ia te i latou e tusa ai ma tulafono o le laueleele; aua ia manatua ua leai se faamagaloga mo ia; ma ia faamaonia lena mea e tusa ma tulafono o le laueleele.

80 Ma afai e faia e soo se alii po o se tamaitai le mulilua, ia faamasinoina o ia i luma o ni toeaina e toalua, pe sili atu, o le ekalesia, ma ia faamautuina upu uma e faasaga i lea alii po o le tamaitai e ni molimau e toalua o le ekalesia, ae lē o le fili; ae afai ua sili atu i le toalua ni molimau ua i ai, ua sili atu ona lelei.

81 Peitai o fofoga o molimau e toalua e tausalaina ai lea alii po o le tamaitai; ma ia folasia atu e toeaina le moliaga i luma o le ekalesia, ma ia siitia a’e e le ekalesia o latou lima e faasaga i lea alii po o le tamaitai, ina ia mafai ona faia ia te i laua e tusa ai ma le tulafono a le Atua.

82 Ma afai e mafai, e tatau i le epikopo ona auai foi.

83 Ma ia faapea ona outou faia i moliaga uma e oo mai i o outou luma.

84 Ma afai e faomea se alii po o se tamaitai, ia avatu lea alii po o le tamaitai i luma o le tulafono o le laueleele.

85 Ma afai e gaoi se alii po o se tamaitai, ia avatu lea alii po o le tamaitai i luma o le tulafono o le laueleele.

86 Ma afai e pepelo se alii po o se tamaitai, ia avatu lea alii po o le tamaitai i luma o le tulafono o le laueleele.

87 Ma afai e faia e se alii po o se tamaitai soo se ituaiga o amioletonu, ia avatu lea alii po o le tamaitai i le tulafono, le tulafono lava a le Atua.

88 Ma afai e faatausuai mai sou uso po o sou tuafafine ia te oe, ia e ave lea uso po o lea tuafafine tau lava o ia ma oe; ma afai e ta’uta’u mai e lea uso po o lea tuafafine, ia e faalelei atu i ai.

89 Ma afai e lē ta’uta’u mai e lea alii po o lea tuafafine, ia e avatu lea alii po o le tuafafine i luma o le ekalesia, e lē i tagata o le ekalesia, ae i toeaina. Ma ia faia lea i se fono, ae lē o luma o le lalolagi.

90 Ma afai e faatausuai sou uso po o sou tuafafine i ni tagata e toatele, ia aoaia o ia i luma o tagata e toatele.

91 Ma afai e faatausuai aliali se tasi, ia aoaiina faaaliali lea alii po o le tamaitai, ina ia faamaasiasi lea alii po o le tamaitai. Ma afai e lē ta’uta’u mai e lea alii po o le tamaitai, ia avatu lea alii po o le tamaitai i luga i le tulafono a le Atua.

92 Afai e i ai se e faatausuai faalilolilo, ia aoaiina faalilolilo lea alii po o le tamaitai, ina ia mafai ona maua e lea alii po o le tamaitai le avanoa e ta’uta’u faalilolilo atu ai i le alii po o le tamaitai na faatausuai i ai, ma i le Atua, ina ia lē ta’u inosia lea alii po o le tamaitai e le ekalesia.

93 Ma ia faapea ona outou faia i mea uma.