1 O eo̧ron̄, kom̧ elder ro an kabun̄ eo Aō, im letok lo̧jiln̄ōmi n̄an naan ko me Inaaj kōnono n̄an kom̧.

2 Bwe lo, em̧ool, em̧ool, Ij ba n̄an kom̧, bwe em̧ōj ami kar bōk juon kien bwe en juon kean̄ n̄an kabun̄ in Aō, kōn e eo Iaar jitōn̄ e n̄an kom̧ n̄an bōki kien ko im revelesōn ko jān Peiū.

3 Im men in kom̧ naaj jeļā ilo kanooj dim—bwe ebar ejjeļo̧k juon jitōn̄e n̄an kom̧ n̄an bōki kien ko im revelesōn ko m̧ae iien n̄e naaj bōk e, eļan̄n̄e ej pād ilo N̄a.

4 Ak em̧ool, em̧ool, Ij ba n̄an kom̧, bwe ejjeļo̧k bar juon naaj jitōn̄e n̄an mennin letok in ijello̧kun n̄e ej kōn e; bwe eļan̄n̄e bōk e jān e enaaj ejjeļo̧k an kajoor ijello̧kun n̄an jitōn̄ bar juon ilo ijo ikijjien.

5 Im men in enaaj juon kean̄ n̄an kom̧, bwe kom̧in jab bōk katak ko an jabdewōt enaaj itok im̧aami āinwōt revelesōn ko ak kien ko;

6 Im men in Ij lewōj n̄an kom̧ bwe kom̧in maron̄ jab po ilo m̧oņ, bwe kom̧in maron̄ jeļā er rej jab jān N̄a.

7 Bwe em̧ool Ij ba n̄an kom̧, bwe e eo ej ekkapit jān N̄a enaaj itok ilo aor eo im ekkapit āinwōt Iaar ba n̄an kom̧ m̧oktaļo̧k, n̄an katakin revelesōn kein ko kom̧ ar bōki im naaj bōki kōn e eo em̧ōj Aō kar jitōn̄e.

8 Im kiiō, lo, Ij lewōj n̄an kom̧ juon kien, bwe n̄e kom̧ij kobatok ippān doon kom̧ naaj katakin im kotak doon, bwe kom̧in maron̄ jeļā wāween jerbal im kajeikik kabun̄ eo Aō, wāween jerbal ioon unleplep ko an kien ko Aō, ko em̧ōj Aō kar liwōji.

9 Im āindein kom̧ naaj erom ro em̧ōj katakin er ilo kien eo an kabun̄ eo Aō, im naaj kokwōjarjar kom̧ jān men eo kom̧ ar bōke, im kom̧ naaj lukwōj kom̧ make n̄an jerbal ilo aolep weeppān Im̧aō—

10 Bwe toun wōt ami kōm̧m̧ane men in, aiboojoj naaj kobaikļo̧k n̄an aelōn̄ in kiin̄ eo me kom̧ ar bōke. Toun wōt ami jab kōm̧m̧ane men in, naaj bōkļo̧k e, em̧ool men eo me kom̧ ar bōk e.

11 Kwaļļo̧k jān kom̧ nana eo me ej ilubwiljimi; kokwōjarjar kom̧ Im̧aō;

12 Im eļan̄n̄e kom̧ij kōņaan aiboojoj ko an aelōn̄ eo, kom̧in kile rikarejera Josep Smith, Jun., im kotak wōt e Im̧aō jān jar in tōmak.

13 Im bar juon alen, Ij ba n̄an kom̧, bwe eļan̄n̄e kom̧ij kōņaan mennin ittino ko an aelōn̄ eo, kom̧in ņa kijen im ballin, im jabdewōt men eo ej aikuji n̄an kōtōprak jerbal eo me em̧ōj Aō kar jiron̄ e;

14 Im eļan̄n̄e kom̧ij jab kōm̧m̧ane e naaj pād n̄an wōt ro rekar bōk e, bwe In maron̄ dāpiji n̄an Eō make juon armej erreo Im̧aō.

15 Bar juon alen Ij ba, eo̧ron̄ kom̧ elder ro an kabun̄ in Aō, ro em̧ōj Aō kar jitōn̄ er: Ej jab jilkinļo̧k kom̧ n̄an bōk katakin, ak n̄an katakin ro nejin armej men ko me Iaar likūti ilo peimi jān kajoor in Jetōb eo Aō;

16 Im kom̧ij itōn bōk katakin jān ijo eutiej. Kokwōjarjar kom̧ make im kom̧ naaj liboleplep kōn kajoor, bwe kom̧in maron̄ leļo̧k em̧ool āinwōt Iaar ba.

17 Kom̧in eo̧ron̄, bwe, lo, raan eo eļap an Irooj ej epaaktok.

18 Bwe raan eo ej itok n̄e Irooj enaaj ekkōnono ainikien jān lan̄; lan̄ ko renaaj m̧akūtkūt im laļ enaaj wūdiddid, im jilel eo an Anij enaaj jan̄ jim̧or aetok im eļļaaj, im naaj ba n̄an laļ ko rej kiki: Kom̧ ro rekwōjarjar kom̧in jerkak im mour; kom̧ rijero̧wiwi pād im kiki m̧ae I naaj bar kūr.

19 Kōn menin kom̧in kan̄ōrn̄ōre ipūmi n̄e eab lo kom̧ ilubwiljin ro renana.

20 Kotak ainikiōmi im jab dāpiji. Kūr ioon laļ ko n̄an ukeļo̧k, jim̧or rūtto im dik, jim̧or rikōm̧akoko im rianemkwōj, im ba: Kom̧in kōpooj kom̧ make n̄an raan eo eļap an Irooj;

21 Bwe eļan̄n̄e n̄a, eo ej juon armej, ij kotakļo̧k ainikiō im kūr ioomi n̄an ukeļo̧k, im kom̧ij dike eō, ta kom̧ naaj ba n̄e raan eo ej itok n̄e jourur ko naaj ekkōnono ainikier jān jem̧ļo̧k ko an laļ, im ekkōnono n̄an lo̧jiln̄in aolep ro remour, im ba—Ukeļo̧k, im m̧aanjāppopo n̄an raan eo eļap an Irooj?

22 Aaet, im bar juon alen, n̄e jarom ko renaaj kakijeekekļo̧k jān rear n̄an rilik, im naaj kōnono ainikier n̄an aolep ro rej mour, im kōm̧m̧an bwe lo̧jiln̄in aolep ro rej ron̄ ren kōjan̄jan̄, im ba naan kein—Kom̧in ukeļo̧k, bwe raan eo eļap an Irooj e moottok?

23 Im bar juon alen, Irooj enaaj ekkōnono ainikien jān lan̄, im ba: Eo̧ron̄, O kom̧laļ ko in laļ, im ron̄ naan ko an Anij eo eaar kōm̧anm̧an kom̧.

24 O, kom̧laļ ko in laļ, ewi ekkutkut in Aō kar aini kom̧ ippān doon āinwōt lo̧lo̧ eo ej aini jojo ko nejin ium̧win pā ko pein, ak kom̧ ar jab kōņaan!

25 Ewi ekkutkut in Aō kar kūr kom̧ jān lo̧n̄iin ro rikarejera, im jān jerbal an enjeļ raņ, im jān ainikiō make, im jān ainikien jourur ko, im jān ainikien jarom ko, im jān ainikien lan̄ eļap ko, im jān ainikien m̧akūtkūt ko an laļ, im wōt dekā ko reļļap, im jān ainikien n̄ūta ko im nan̄inmej ko otemjej, im jān ainikien eļap in jilel, im jān ainikien ekajet, im jān ainikien tūriam̧okake aolepān raan eo, im jān ainikien aiboojoj im utiej im m̧weiie ko an mour indeeo, im naaj kar lo̧mo̧o̧ren kom̧ kōn juon lo̧mo̧o̧r ejjeļo̧k jem̧ļo̧kin, ak kom̧ ar jab kōņaan!

26 Lo, raan eo emoottok, n̄e kap in illu in Aō libabne elutōk mājidjid.

27 Lo, em̧ool Ij ba n̄an kom̧, bwe erkein rej naan ko an Irooj ami Anij.

28 Kōn menin, kom̧in jerbal, kom̧in jerbal ilo jikin kallib grep eo Aō n̄an iien in āliktata—n̄an iien in āliktata kūr ioon ro rej pād ioon laļ.

29 Bwe ilo iien eo Aō make Inaaj itok ioon laļ ilo ekajet, im armej ro Aō naaj pinmuuri er im renaaj irooj Ippa ioon laļ.

30 Bwe Meļļenium eo eļap, eo kake Iaar ekkōnono jān lo̧n̄iin ro rikarejera, enaaj itok.

31 Bwe Setan enaaj lokjak, im n̄e ej bar rōļo̧k e naaj irooj wōt ium̧win jidik iien, innām ej itok jem̧ļo̧k in laļ.

32 Im e eo ej mour ilo jim̧we enaaj oktak ilo būkkinkwōle ilo rom, im laļ enaaj jako āindein āinwōt jān kijeek.

33 Im ro renana renaaj etal ilo kijeek ejamin kun, im jem̧ļo̧kier ejjeļo̧k armej ejeļā ioon laļ, im rej jamin jeļā, m̧ae rej itok Im̧aō ilo ekajet.

34 Kom̧in eo̧ron̄ naan kein. Lo, N̄aij Jisōs Kraist, Rilo̧mo̧o̧r eo an laļ. Ko̧koņi men kein ilo būruōmi, im kejakļo̧kjeņ ko rem̧wilaļ an indeeo ren pād ilo ļōmņak ko ami.

35 En alikkar ami ļōmņak. Kōjparok aolep kien ko Aō. Em̧ool āindein. Amen.