Mwakoro 49
Kaotioti ae kaotaki rinanon Iotebwa Timiti te Burabeti nakon Sidney Ridgon, Parley P. Pratt, ao Leman Copley, i Kirtland, Ohio, ni Maati 7, 1831. E a tia Leman Copley n butimwaea te euangkerio ma e bon kakoauai naba tabeua reirein te Shakers (Te Botaki ae Katiteuanaki ni Kakoaua Kauaokin Kristo [United Society of Believers in Christ’s Second Appearing]), are e kaaina ngkoa mai i mwaaina. Tabeua aia koaua tenaan Shakers bwa e a tia n riki Kauaokin Kristo ao bwa E a tia ni kaoti n rabwatan te aine, ae Ann Lee. A aki kakoaua bwa e kakawaki te bwabetito n te ran. A totokoa te mare ao a kakoaua te maiu n akea te iein. Tabeman naba Shakers a katabua kanakin irikon man. Ni kabwarabwaran te kaotioti aei, e koreaki n rongorongon Iotebwa Timiti ae kangai, “Ibukin karekean te atatai ae kororaoi i aon aio, I bubutia te Uea, ao I karekea aio.” Te kaotioti e aki kakoauai tabeua oin ana koaua te botaki ae te Shaker. Taari ake atongaki mai moana a uota katotongan te kaotioti nakoia kaain te Shaker (ae kaan ma Cleveland, i Ohio) ao a warekia ni kabane nakoia, ma e aki butimwaeaki.
1–7, Bongin ma auan rokon Kristo e na tiku n aki ataaki ni karokoa E roko; 8–14, A riai aomata n raira nanoia, ni kakoaua te euangkerio, ao n ongeaaba nakon otenanti ni karekea te kamaiuaki; 15–16, Te mare e bon baireaki iroun te Atua; 17–21, Kanakin irikon maan e bon kaukaki; 22–28, E na rikirake Tion ao taian Reimwanaite a na uee n aiaron te rooti i mwaain te Kauaoki.
1 Ongora nakon au taeka, au tia mwakuri ae Sidney, ao Parley, ao Leman; bwa nooria, e koaua ae I tuangkami, bwa I anganingkami te tua bwa kam na nako ao n tataekina au euangkerio ae kam a tia ni karekea, n aron naba ae kam a tia ni karekea, nakoia kaain te Shakers.
2 Nooria, I tuangkami, bwa a tangiria n atai tabeua koaua, ma tiaki ni kabane, bwa a aki eti i matau ao a riai n raira nanoia.
3 Mangaia are, I kanakoingkami, au taan mwakuri ae Sidney ao Parley, bwa kam na tataekina te euangkerio nakoia.
4 Ao au tia mwakuri ae Leman e na katabuaki nakon te mwakuri aei, bwa e aonga ni kabwarabwara ma ngaia, tiaki ni kaineti nakon are e a tia ni karekea mai irouia, ma ni kaineti nakon are e na tia n reireinaki iroumi au taan mwakuri; ao man karaoan aio N na kakabwaia, ke ngkana e aki ao e na aki kakabwaiaaki.
5 E taku te Uea; bwa Ngai te Atua, ao I a tia ni kanakoa Natiu ae te Rikitemanna nakon te aonaba ibukin kaboakin te aonaba, ao I a tia n taekinna bwa ane e butimwaia e na bon kamaiuaki, ao ane e aki butimwaia e na kabuakakaaki—
6 Ao a tia ni karaoia nakon Natin te Aomata n aron are a kantaningaia; ao e a tia n anaa mwaakana ni mimitongin angatain te Atua, ao n uea ngkai i karawa, ao e na bon uea ni karokoa e ruo nakon te aonaba ni kaaki ni kabane ana kairiribai i aan waena, are te tai ae e a kaan—
7 Ngai, te Uea ae te Atua, I a tia n taekinna; ma te aoa ao te bong akea te aomata ae e ataia, ke anera i karawa, ao a na aki ataia ni karokoa e roko.
8 Ngaia are, I tangiria bwa a na raira nanoia aomata ni kabane, bwa ni kabane a mena i aan te bure, ma tii naake I a tia n katauwiia nakoiu, aika aomata aika a mimitong ae kam a aki ataia.
9 Mangaia are, I tuangkami bwa I a tia ni kanakoa nakoimi au berita ae tabu ae akea tokina, are bon man moan rikin bwaai.
10 Ao anne are I a tia ni beritanna are I a tia ni kakoroa bukina, ao botanaomata n te aonaba a na bon karinea; ao, ngkana tiaki ibukiia, a na karinanoaki, bwa ane e karietataaki i bon irouna e na bon karinanoaki n te mwaaka.
11 Mangaia are, I anganingkami te tua bwa kam na nako buakoia aomata aikai, ao n tuangiia, n aron au abotoro are ngkoa, ae arana Betero:
12 Kakoaua aran te Uea ae Iesu, are e mena ngkoa i aon te aonaba, ao e na bon roko, te moan ao te toki;
13 Raira nanomi ao ni bwabetitooaki n aran Iesu Kristo, ni kaineti nakon te tua ae tabu, ibukin kamaunaan bure;
14 Ao ane e karaoa aei e na karekea te bwaintituaraoi ae te Tamnei ae Raoiroi, man te katoka bai irouia unimwaanen te ekaretia.
15 Ao e koaua ae I a manga tuangkami, bwa ane e tabua te mare e bon aki kariaiakaki iroun te Atua, bwa te mare e bon baireaki iroun te Atua ibukiia aomata.
16 Mangaia are, bon te tua bwa te mwaane e na riai n tii temanna buuna te aine, ao ngaiia uoman a na riki n tii te irikona, ao ni kabane aikai bwa e aonga te aonaba ni kaekaa bukin karikana;
17 Ao bwa e aonga ni kaonaki ma aomata aika mwaiti, ni kaineti nakon ana karikibwai i mwaain karikan te aonaba.
18 Ao ane e tabua kanakin irikon maan, bwa a riai aomata n aki kana ae titebo, e bon aki kariaiakaki iroun te Atua;
19 Bwa, nooria, manin aon te aba ao manin aan karawa, ao bwain aon te aba, a bon katauaki ibukiia aomata ibukin kanaia ao ibukin kunnikaia, ao bwa e aonga ni mwaiti ni iai irouna.
20 Ma e bon aki riai bwa temanna te aomata e na karekea ae e raka i aon temanna, mangaia are e wene te aonaba n te bure.
21 Ao te rekenikai nakon te aomata are e kawaanakoa te rara ke are e bakataea te iriko n aki kabongana.
22 Ao e koaua ae I a manga tuangko, bwa Natin te Aomata e aki roko n aiaron te aine, ke te mwaane ae mwamwananga i aon te aonaba.
23 Mangaia are, tai mwamwanaaki, ma reitinako n teimatoa, ni kantaningaa mwaingingin karawa, ao mwaeieien te aonaba ao e na bebei n aron te aomata ae manging, ao mwaruarua bwa a na karietataaki, ao maunga bwa a na karinanoaki, ao taabo aika aobuaka bwa a na riki ni booraoi—ao ni kabane bwaai aikai ngkana e katanga ana buu te anera.
24 Ma i mwaain rokon ana bong ae kakannato te Uea, e na korakora rikiraken Iakobwa n te rereua, ao Reimwanaite a na uee n aiaron te rooti.
25 E na korakora rikiraken Tion i aon tabuki ao ni kimwareirei i aoni maunga, ao a na ikotaki ni kabane n te tabo are I a tia n rineia.
26 Nooria, I tuangkami, waaki nako n aron ae I a tia n tuangkami; raira nanomi man ami bure ni kabane; bubuti ao kam na anganaki; karebwerebwe ao e na kaukaki nakoim.
27 Nooria, N na ri moami ao n riki bwa te tia tararuaa akumi; ao N na bon mena i buakomi, ao kam na bon aki kamangaoaki.
28 Nooria, Ngai Iesu Kristo, ao e tawe rokou. Eng. Amen.