Jekjōn 49
Revelesōn letok kōn Josep Smith Rikanaan eo n̄an Sidney Rigdon, Parley P. Pratt, im Leman Copley, ilo Kirtland, Ohio, Māe 7, 1831. Leman Copley ekar atbo̧kwōje gospel in ak ekar dāpij wōt jet ian katak ko an riShaker Ro (United Society of Believers in Christ’s Second Appearing), eo ekar pād ie m̧okta. Jet ian tōmak ko an riShaker Ro kar bwe Itok eo an Kraist Kein Karuo em̧ōj an kar bōk jikin im bwe Eaar waļo̧k ilo jekjekin juon kōrā, Ann Lee. Rekar jab likūt peptaij āinwōt juon men ekanooj aorōk. Rekar jab bōk mare im rekar tōm̧ak ilo jabdewōt elolo ilo kanniōk. Jet riShaker ro rekar barāinwōt kōm̧o̧ mōn̄ā kanniōk. Ilo kōmmeļeļe ko m̧okta jān revelesōn in, bwebwenato an Josep Smith ej kwaļo̧k, “Bwe en wōr [juon] jeļā eweeppānļo̧k kōn menin, Iaar kajjitōk kake ippān Irooj, im bōke ennaan kein.” Revelesōn in ej m̧anļo̧k jet ian ļōmņak ko an kumi in an riShaker Ro. Ļōm̧arein ba kake er m̧oktaļo̧k rekar bōk juon malen in revelesōn in n̄an jukjukin pād eo an riShaker Ro (epaake Cleveland, Ohio) im kōnono n̄an er jān e ilo dipiioōn, ak rekar jab bōk e.
1–7, Raan im awa eo in itok eo an Kraist enaaj pād wōt ilo ejjeļo̧k jeļā kake m̧ae An itok; 8–14, Armej rej aikuj ukeļo̧k, tōmak ilo gospel eo, im pokaki kain̄i ko n̄an bōk lo̧mo̧o̧r; 15–16, M̧are ej kōmālim in Anij; 17–21, Kan̄i kanniōk e mālim; 22–28, Zaion enaaj uwa im riLeman renaaj ebbōl āinwōt juon rose m̧okta jān Itok eo Kein Karuo.
1 Eo̧ron̄ Aō innaan, ro rikarejera Sidney, im Parley, im Leman; bwe lo, em̧ool Ij ba n̄an kom̧ijel, bwe Ij lewōj n̄an kom̧ijel juon kien bwe kom̧ijel naaj ilo̧k im kwaļo̧k naan kōn gospel eo Aō me kom̧ijel ar bōke, em̧ool āinwōt amijel kar bōk e, n̄an Shaker raņ.
2 Lo, Ij ba n̄an kom̧ijel, bwe rej kōņaan n̄an jeļā m̧ool eo ilo m̧ōttan, ak jab aolepān, bwe rej jab jim̧we Im̧aō im aikuj in ukeļo̧k.
3 Kōn menin, Ij jilkinļo̧k kom̧ijel, ro rikarejera Sidney im Parley, n̄an kwaļo̧k naan kōn gospel eo n̄an er.
4 Im rikarejera Leman enaaj ekkapit n̄an jerbal in, bwe e emaron̄ em̧m̧ao ippāer, jaab ekkar n̄an men eo me eaar bōk jān er, ak ekkar n̄an men eo me enaaj katakin e jān kom̧iro rikarejera; im jān an kōm̧m̧ane Inaaj kōjeraam̧m̧an e, eļan̄n̄e jaab e ejamin jeraam̧m̧an.
5 Āindein Irooj ej ba; bwe N̄aij Anij, im em̧ōj Aō kar jilkinļo̧k eo Nejū Iaar Make Keotake ilo laļ n̄an lo̧mo̧o̧ren eo an laļ, im em̧ōj kar kean̄ bwe eo ej bōk E enaaj mour, im eo ej jab bōk E enaaj jako—
6 Im em̧ōj aer kar kōm̧m̧an n̄an Nejin Armej em̧ool āinwōt aer kōņaan; im Eaar bōke An kajoor ianbwijmaron̄ in pein wōj eo An, im kiiō ej irooj ilo lan̄ ko, im Enaaj irooj m̧ae iien An wanlaļtak ioon laļ n̄an likūt aolep rikōjdat ro An ium̧win neen, iien in eo ej epaak tok—
7 N̄a, Irooj Anij, Iaar kōnono men in; ak awa eo im raan eo ejjeļo̧k armej ejeļā, jaab enjeļ raņ ilo lan̄, im reban jeļā m̧ae iien eo Ej itok.
8 Kōn menin, I kōņaan bwe aolep armej ren ukeļo̧k, bwe aolep rej pād ium̧win jero̧wiwi, ijello̧kun wōt ro Iaar dāpij wōt er n̄an Eō, em̧m̧aan kwōjarjar ro kom̧ij jab jeļā kake er.
9 Kōn menin, Ij ba n̄an kom̧ijel bwe em̧ōj Aō kar jilkinwaj n̄an kom̧ bujen eo ejjeļo̧k jem̧ļo̧kin n̄an kom̧, em̧ool eo me ekar jān jinoin.
10 Im men eo me Iaar kallim̧ur kake em̧ōj Aō kar kakūrm̧oole, im laļ ko ilo laļ in renaaj badikdik n̄an e; im, eļan̄n̄e jab jān er make, renaaj wanlaļļo̧k, bwe men ko me ej kiiō utiej jān e make naaj lelaļļo̧k kajoor in.
11 Kōn menin, Ij lewōj n̄an kom̧ijel juon kien bwe kom̧ijel en ilo̧k ilubwiljin armej rein, im ba n̄an er, āinwōt kar rijjilōk eo Aō etto, eo kar etan Piter:
12 Lōke ioon etan Irooj Jisōs, eo eaar pād ioon laļ, im E ej itok, ej jinoin im jem̧ļo̧kin;
13 Ukeļo̧k im peptaij ilo etan Jisōs Kraist, ekkar n̄an kien eo ekwōjarjar, n̄an jeorļo̧k in jero̧wiwi ko;
14 Im jabdewōt eo ej kōm̧m̧ane men in enaaj bōk mennin letok eo an Jetōb Kwōjarjar, jān likūt pā ko ioon jān elder ro an kabun̄ in.
15 Im bar juon alen, em̧ool Ij ba n̄an kom̧ijel, bwe jabdewōt eo ej bōbrae n̄an m̧are ej jab kōmālim jān Anij, bwe m̧are ej kōmālim jān Anij n̄an armej.
16 Kōn menin, ekkar n̄an kōmlet an kien bwe en wōr juon pāleen kōrā, im rein ruo renaaj juon wōt kanniōk, im aolep men in bwe laļ en maron̄ uwaake unin ejaak eo an;
17 Im bwe en maron̄ obrak kōn jon̄an oran armej, ekkar n̄an kōm̧anm̧an eo an m̧okta jān kar kōm̧m̧ane laļ in.
18 Im jabdewōt eo ej bōbrae n̄an jab bōk kanniōk ko, bwe armej en jab m̧ōn̄ā ejja men kein, ej jab kōmālim jān Anij;
19 Bwe, lo, kidu ko in meļaaj ko im bao ko in mejatoto, im men eo ej itok jān laļ, ej mālim n̄an kōjerbale an armej n̄an m̧ōn̄ā im n̄an balle, im bwe en maron̄ wōr ilo kanooj ļap.
20 Ak e ej jab leļo̧k bwe juon armej en bōk men ko ilōn̄in bar juon, kōn menin laļ ej babu ilo jero̧wiwi.
21 Im wo n̄an armej eo ej kōto̧o̧rļo̧k bōtōktōk ak ko̧kkure kanniōk im ej jab aikuj.
22 Im bar juon alen, em̧ool Ij ba n̄an kom̧ijel, bwe Nejin Armej ej itok jaab ilo jekjek in juon kōrā, ak jab in armej eo ej ito-itak ioon laļ in.
23 Kōn menin, jab po ilo m̧oņ, ak wōnm̧aanļo̧k wōt ilo dim, reim̧aanļo̧k n̄an m̧akūtkūt ko an lan̄ ko, im n̄an an laļ wūdiddid im n̄an jebwāālel im em̧m̧alm̧al āinwōt armej eo ekadek, im n̄an kom̧laļ ko n̄an utiejļo̧k, im n̄an toļ ko n̄an kōttāik er, im n̄an jikin ko rekurbalōklōk n̄an meoeo—im aolep men in n̄e enjeļ eo enaaj uuk jilel eo an.
24 Ak m̧okta jān an raan eo eļap an Irooj enaaj itok, Jekab enaaj jebar ilo āne jem̧aden, im riLeman ro renaaj ebbōl āinwōt rose eo.
25 Zaion enaaj jebar ioon bat ko im lan̄lōn̄ ioon toļ ko, im naaj kuktok ippān doon n̄an jikin eo em̧ōj Aō kar jitōn̄e.
26 Lo, Ij ba n̄an kom̧ijel, kom̧in ilo̧k āinwōt em̧ōj Aō kar jiron̄ kom̧ijel; ukeļo̧k jān aolep jero̧wiwi ko ami; kajjitōk im kom̧ naaj bōk; kaļļaļļaļ im enaaj peļļo̧k n̄an kom̧.
27 Lo, Inaaj etal im̧aamiļo̧k am naaj pād ilikimi; im Inaaj pād ilubwiljimi, im kom̧ jamin naaj pok.
28 Lo, N̄aij Jisōs Kraist, im em̧ōkaj Aō itok. Em̧ool āindein. Amen.