Vaega 49
Faaaliga na tuuina mai e ala mai ia Iosefa Samita le Perofeta, ia Sini Rikitone, Parley P. Pratt, ma Leman Copley, i Katelani, Ohaio, i le aso 7 o Me, 1831. Sa talia e Leman Copley le talalelei peitai sa taofi pea o ia i ni isi o aoaoga a le Au Sieka (United Society of Believers in Christ’s Second Appearing [Sosaiete Aufaatasi a Tagata Talitonu i le Afio Mai Faalua]), lea sa auai muamua o ia. O ni isi o talitonuga o le Au Sieka e faapea ua uma ona taunuu le Afio Mai Faalua o Keriso ma e faapea sa afio mai o Ia i le foaitino o se fafine, o Ann Lee. Sa latou le amanaiaina le papatisoga i le vai o se mataupu taua. Na latou teena le faaipoipoga ma talitonu i se olaga o le lē faitoalua atoatoa. O ni isi Sieka sa faasā le aiina o aano o manu. I le faatomuaga o lenei faaaliga na faapea mai le talafaasolopito a Iosefa Samita, “Ina ia maua [se] malamalama atoatoa e uiga i lenei mataupu, o lea na ou ole atu ai i le Alii, ma maua mai ai le faaaliga lenei.” Ua ta’u sese mai i le faaaliga ni isi o talitonuga faavae o le vaega a le au Sieka. Sa ave e uso ua ta’ua i luga se kopi o le faaaliga i le nuu o le au Sieka (e latalata i Kalivilani, Ohaio) ma faitau atu ia te i latou i le atoatoa, peitai sa teena.
1–7, O le aso ma le itula o le afio mai o Keriso o le a tumau pea ona lē iloa seia afio mai o Ia; 8–14, E ao i tagata ona salamo, talitonu i le talalelei, ma usiusitai i sauniga ina ia latou maua le olataga; 15–16, Ua faauuina e le Atua le faaipoipoga; 17–21, Ua faatagaina le ’ai o aano o manu; 22–28, O le a uluola Siona ma fuga mai sa Lamanā e pei o le rosa ae lei oo i le Afio Mai Faalua.
1 Faalogo mai ia i la’u upu, a’u auauna e, Sini, ma Parley, ma Limani; aua faauta, e moni Ou te fai atu ia te outou, Ou te tuu atu ia te outou se poloaiga ia outou o atu ma talai atu i le Au Sieka la’u talalelei ua outou mauaina, e pei lava ona outou mauaina.
2 Faauta, Ou te fai atu ia te outou, ua latou mananao e fia iloa se vaega o le upu moni, ae lē o le atoa, ona e lē o sa’o i latou i o’u luma ma e ao ina salamo.
3 O le mea lea, Ou te auina atu ai oulua, a’u auauna, o Sini ma Parley, e talai atu le talalelei ia te i latou.
4 Ma ia faauu la’u auauna o Limani i lenei galuega, ina ia mafai ona talatala o ia faatasi ma i latou, e lē tusa ai ma mea na ia maua mai ia te i latou, ae e tusa ai ma mea e aoao atu ia te ia e oulua o a’u auauna; ma o le faia o lenei mea o le a Ou faamanuiaina ai o ia, a leai e lē manuia o ia.
5 Ua faapea ona fetalai mai o le Alii; ona o A’u o le Atua, ma sa Ou auina atu lo’u Atalii Pele e Toatasi i le lalolagi mo le togiolaina o le lalolagi, ma ua Ou folafola atu, o ia o lē na te talia o ia o le a faaolaina, ma o ia o lē na te lē talia o ia o le a faamalaiaina—
6 Ma ua faapea ona latou faia i le Atalii o le Tagata e pei ona sa latou loto i ai; ma sa ave e ia lona mana i le lima taumatau o lona mamalu, ma ua nofotupu nei i le lagi, ma o le a nofotupu seia toe afio ifo i le lalolagi e tuu i lalo o ona vae fili uma, o se taimi lea ua lata lava ona oo mai—
7 O A’u, o le Alii le Atua, ua Ou tautala atu ai; ae o le itula ma le aso e leai se tagata na te iloaina, po o agelu i le lagi, pe latou te iloaina seia oo ina afio mai o ia.
8 O le mea lea, ou te manao ai ia salamo tagata uma, ona ua i lalo o le agasala i latou uma, vagana ai i latou ua Ou faasaoina mo au lava, o ni tagata paia tou te lē iloa lava.
9 O le mea lea, Ou te fai atu ai ia te outou ua Ou auina atu ia te outou la’u feagaiga tumau e faavavau, o le feagaiga lava lena ua mai i le amataga.
10 Ma o le mea lena na Ou folafola atu ua faapea ona uma ona Ou faataunuuina, ma o le a ifo i ai atunuu o le lalolagi; ma, afai e lē faapea ona faia e i latou lava, o le a auina ifo i latou i lalo, ona o lē ua faaeaina nei ia te ia lava, o le a aveesea faamaualalo i le mana.
11 O le mea lea, Ou te tuu atu ai ia te outou se poloaiga ia outou o atu i totonu o nei tagata, ma fai atu ia te i latou, e pei o la’u aposetolo anamua, o lē o lona igoa o Peteru:
12 Ia talitonu i le suafa o le Alii o Iesu, o lē sa i le lalolagi, ma o lē o le a afio mai, o le amataga ma le gataaga;
13 Ia salamo ma papatiso i le suafa o Iesu Keriso, e tusa ma le poloaiga paia, mo le faamagaloina o agasala;
14 Ma ai se na te faia lenei mea o le a maua e ia le meaalofa o le Agaga Paia, e ala i le faaeeina o lima o toeaina o le ekalesia.
15 O lenei foi, e moni Ou te fai atu ia te outou, ai se na te faasaina ona faaipoipo ua lē faauuina o ia e le Atua, ona o le faaipoipoga ua faauuina e le Atua mo le tagata.
16 O le mea lea, ua tusa ai ma le tulafono le tatau ona maua e ia o se ava e toatasi, ma avea i laua e toalua ma tino e tasi, ma ua faia lenei mea atoa ina ia mafai ona faataunuu e le lalolagi le faamoemoe o lona foafoaga;
17 Ma ina ia mafai ona faatumuina i le fuataga o le tagata, e tusa ma lona foafoaga ae lei faia le lalolagi.
18 Ma ai se na te faasaina le ’ai i aano o manu, ina ia lē ’ai ai le tagata, ua lē faauuina o ia e le Atua;
19 Aua, faauta, o manu vaefa o le fanua ma manu felelei o le vanimonimo, ma mea e sau mai i le eleele, ua faauuina mo le faaaogaina e le tagata mo meaai ma mo lavalava, ma ina ia maua tele e ia.
20 Peitai ua lē tuuina mai ia maua e se tagata e toatasi ni mea e sili atu i le isi, o le mea lea ua taoto ai le lalolagi i le agasala.
21 Ma oi talofa i le tagata na te faamasaa le toto pe na te faatauna aano o manu ae ua lē manaomia e ia.
22 O lenei foi, e moni Ou te fai atu ia te outou, e lē afio mai le Atalii o le Tagata i le fuaitino o se fafine, po o se alii o femalagaa’i i le lalolagi.
23 O le mea lea, aua nei faaseseina outou, ae ia tutu mausali pea, ma tulimatai i luma mo le luluina o le lagi, ma le faagateteina o le lalolagi ma tifatifa solo e pei o se tagata ’onā, ma mo le faaeaina o vanu, ma mo le faamaualalaloina o mauga, ma mo le faalauleleia o mea gaoā—ma o nei mea uma o le a oo mai pe a ili e le agelu lana pu.
24 Peitai ae lei oo mai le aso tele o le Alii, o le a tupuolaola Iakopo i le vao, ma o le a fuga mai sa Lamanā e pei o le rosa.
25 O le a tupuolaola Siona i luga o maupuepue ma olioli i luga o mauga, ma o le a faapotopoto faatasi i le nofoaga ua Ou filifilia.
26 Faauta, Ou te fai atu ia te outou, o atu ia e pei ona Ou poloaiina ai outou; ia outou salamo mai iā outou agasala uma; ole mai ma o le a outou maua; tu’itu’i mai ma o le a tatala atu ia te outou.
27 Faauta, o le a Ou alu atu i o outou luma ma avea foi ma o outou muli’au; ma o le a Ou i ai i lo outou lotolotoi, ma o le a lē faafememeaiina outou.
28 Faauta, o A’u o Iesu Keriso, ma ua vave ona Ou alu atu. E faapea lava. Amene.