1 Chex’ab’inq, ex xb’eenil re lin iglees, ut k’ehomaq eexik rik’in lix yaab’ xkux li yo’yookil Dios, ut chek’e reetal li aatin re chaab’il na’leb’ li taak’eemanq eere, jo’ chanru kextz’aaman ut wankex sa’ aatin chirix li iglees, ut eb’ li musiq’ej li xikenaqeb’ sa’ li ruchich’och’.

2 K’ehomaq reetal, chi yaal ninye eere, naq wankeb’ naab’al li musiq’ej li aj b’alaq’eb’, li xikenaqeb’ sa’ li ch’och’, chixb’alaq’inkil li ruchich’och’.

3 Ut jo’kan ajwi’ laj Satanas ak xsik’ eeb’alaq’inkil, re taaruuq chi numtaak sa’ eeb’een.

4 K’ehomaq reetal, laa’in, li Qaawa’, kin’ilok eere, ut wilom li tz’eqb’eetalil sa’ li iglees li neke’k’amok re lin k’ab’a’ jo’ neke’xye.

5 A’ut osob’tesinb’ileb’ li ani tiikeb’ chi paab’ank ut neke’kana chi kuyuk, us ta sa’ li yu’am malaj sa’ li kamk, xb’aan naq eb’ a’an te’reechani li junelik yu’am.

6 A’b’an rahilal sa’ xb’eeneb’ li ani aj b’alaq’ ut aj ka’pak’al-u, xb’aan naq, jo’ka’in naxye li Qaawa’, laa’in teb’ink’am sa’ li raqb’a-aatin.

7 K’ehomaq reetal, chi yaal ninye eere, wankeb’ laj ka’pak’al-u sa’ eeyanq, li ke’b’alaq’ink re junjunq, rik’in li k’eeb’il wi’ chaq wankilal re laj xik’ ilonel; a’ut k’ehomaq reetal naq te’k’ame’q chaq wi’chik xkomoneb’ a’an;

8 A’b’an eb’ laj ka’pak’al-u te’tawe’q ut te’isiiq chaq, sa’ li yu’am malaj sa’ li kamk, jo’ chanru ajwi’ nawaj; ut rahilal sa’ xb’eeneb’ li isinb’ileb’ chaq sa’ lin iglees, xb’aan naq xnumta li ruchich’och’ sa’ xb’een xkomoneb’ a’an.

9 Jo’kan ut, li junjunq chi winq chiril rib’ maare anchal tixb’aanu li k’a’ru moko wan ta sa’ li yaal ut li tiikilal chiwu.

10 Anajwan ut chalqex, chan li Qaawa’, rik’in li Musiq’ej, reheb’ li xb’eenil re lix iglees, ut choona’leb’anq sa’ komonil, re teetaw xyaalal;

11 Choona’leb’anq jo’ chanru nana’leb’an jun winq rik’in li jun chik chi k’utk’u chiru rilob’aal.

12 Anajwan, naq nana’leb’an junaq winq natawe’ ru xb’aan li winq, xb’aan naq nana’leb’an jo’ winq; chi jo’kan ajwi’ laa’in, li Qaawa’, tinna’leb’anq eerik’in re teetaw xyaalal.

13 Jo’kan ut, laa’in li Qaawa’ ninpatz’ eere li patz’om a’in—k’a’ aj-e kexk’ojob’aak wi’?

14 Re xjultikankil lin evangelio rik’in li Musiq’ej, a’an ajwi’ laj K’ojob’anel Ch’oolej li kitaqlaman chaq re xk’utb’al li yaal.

15 Toja’ ut naq xek’uleb’ li musiq’ej li ink’a’ kexru chixtawb’al ru, ut xek’uleb’ jo’ chalenaqeb’ rik’in li Dios; ut ma tiikob’resinb’il eeru rik’in a’in?

16 K’ehomaq reetal, teesume li patz’om a’in eejunes; a’b’anan, laa’in tinwuxtaana eeru; li ani q’un xmetz’ew sa’ eeyanq, chirix a’in taakawob’resiiq xmetz’ew.

17 Chi yaal ninye eere, li ani k’ojob’anb’il inb’aan ut taqlanb’il chixjultikankil li aatin re li yaal rik’in laj K’ojob’anel Ch’oolej, sa’ li Musiq’ej re li yaal, ma naxjultika rik’in li Musiq’ej re li yaal, malaj chi jalan chik chan ru?

18 Ut wi chi jalan chik chan ru, moko re ta li Dios.

19 Ut jo’kan wi’chik, li ani nak’uluk re li aatin re li yaal, ma naxk’ul rik’in li Musiq’ej re li yaal, malaj chi jalan chik chan ru?

20 Wi chi jalan chik chan ru, moko re ta li Dios.

21 Jo’kan ut, k’a’ut naq ink’a’ nekexru chixtawb’al ru ut xnawb’al, naq li ani nak’uluk re li aatin xb’aan li Musiq’ej re li yaal, naxk’ul jo’ chanru naq jultik’anb’il xb’aan li Musiq’ej re li yaal?

22 Jo’kan ut, li ani najultikan ut li ani nak’uluk, neke’xtaw ru chirib’ileb’ rib’, ut xkab’ichaleb’ neke’waklesiik li raameb’ ut neke’saho’ sa’ xch’ool sa’ komonil.

23 Ut li k’a’ru ink’a’ nawaklesink aamej, moko re ta li Dios, ut a’an q’ojyin.

24 Li k’a’ru re li Dios a’an saqen; ut ani nak’uluk re li saqen, ut nakana rik’in li Dios, naxk’ul chik li saqen; ut li saqen a’an yoo chi nimank xlemtz’unkil toj reetal li tz’aqal kutan.

25 Ut jo’kan wi’chik, chi yaal ninye eere, ut ninye re taaruuq teenaw li yaal, re naq texruuq chiralinasinkil chaq li q’ojyin sa’ eeyanq;

26 Li ani k’ojob’anb’il xb’aan li Dios ut taqlanb’il, a’an ajwi’ xaqab’anb’il re naq a’anaq li q’axal nim ru, us ta a’an li q’axal kub’enaq xwankil ut lix mooseb’ chixjunil.

27 Jo’kan ut, eechaninb’il xb’aan a’an chixjunil li k’a’aq re ru; xb’aan naq chixjunil li k’a’aq re ru wan rub’el xwankil, sa’ choxa jo’ ajwi’ sa’ li ruchich’och’, li yu’am ut li saqen, li Musiq’ej ut li wankilal, chi taqlanb’il chaq xb’aan li rajom xch’ool li Yuwa’b’ej rik’in ruq’ li Jesukristo, li Ralal.

28 A’ut maajun winq na’eechanink re chixjunil li k’a’aq re ru, ka’ajwi’ wi saqob’resinb’il ru ut ch’ajob’resinb’il chirix chixjunil li maak.

29 Ut wi saqob’resinb’il eeru ut ch’ajob’resinb’ilex chirix chixjunil li maak, teetz’aama yalaq k’a’ru teeraj sa’ lix k’ab’a’ li Jesus ut taab’aanumanq.

30 A’b’an chenawaq a’in, taak’eemanq eere k’a’ru teetz’aama; ut jo’ xaqab’anb’ilex choq’ jolomil, eb’ li musiq’ej te’wanq rub’el eewankil.

31 Jo’kan ut, taak’ulmanq, naq wi nekeril jun musiq’ej chi k’utb’esimank li ink’a’ nekexru chixtawb’al ru, ut ink’a’ nekek’ul li musiq’ej a’an, textz’aamanq chiru li Yuwa’b’ej sa’ lix k’ab’a’ li Jesus; ut wi ink’a’ naxk’e eere li musiq’ej a’an, rik’in a’an naru teenaw naq moko re ta li Dios.

32 Ut k’eeb’ilaq eere, wankilal sa’ xb’een li musiq’ej a’an, ut teech’olob’ chirix li musiq’ej a’an chi kaw xyaab’ eekux, naq moko re ta li Dios—

33 Moko rik’in ta xjitom laj hob’onel, re naq ink’a’ taaq’axe’q eeru, chi moko rik’in nimank-ib’ chi moko saho’k ch’oolej, maare anchal texchape’q rik’in.

34 Ani nak’uluk chiru li Dios, chixk’ul jo’ xk’ehom li Dios; ut chisaho’q xch’ool naq ilb’il xb’aan li Dios chi k’ulub’ej re taak’uluq.

35 Ut rik’in xk’eeb’al reetal ut xb’aanunkil li k’a’aq re ru a’in li kek’ul, ut li toj teek’ul moqon—ut li awa’b’ejihom k’eeb’il eere xb’aan li Yuwa’b’ej, ut li wankilal chi numtaak sa’ xb’een chixjunil li k’a’aq re ru li moko k’ojob’anb’il ta xb’aan a’an—

36 Ut k’ehomaq reetal, chi yaal ninye eere, osob’tesinb’ilex laa’ex li yookex anajwan chirab’inkil li aatin a’in sa’ xtz’uumal re lin moos, xb’aan naq kuyb’il lee maak.

37 Lin moos aj Joseph Wakefield, li nasaho’ wi’ chi tz’aqal inch’ool, ut lin moos aj Parley P. Pratt che’xikaq sa’ xyanqeb’ li iglees ut che’xk’ehaq xkawilaleb’ rik’in li tijb’il aatin;

38 Ut jo’kan ajwi’ lin moos aj John Corrill, malaj jo’ k’ihaleb’ lin moos li k’ojob’anb’ileb’ choq’ re li opiis a’in, ut che’k’anjelaq sa’ li awimq; ut maajun winq chiramoq reheb’ sa’ xb’aanunkil li k’a’ru kinxaqab’ choq’ reheb’—

39 Jo’kan ut, sa’ li na’leb’ a’in lin moos aj Edward Partridge moko tiikob’resinb’il ta ru; a’b’anan chixjal xk’a’uxl ut taakuye’q xmaak.

40 K’ehomaq reetal, laa’ex toj kok’alex ut ink’a’ nekexru chixkuyb’al chixjunil li k’a’aq re ru anajwan; tento texk’iiq sa’ li usilal ut sa’ xnawb’al li yaal.

41 Mexxuwak, ex kok’al, xb’aan naq wehex, ut laa’in kinnumta sa’ xb’een li ruchich’och’, ut laa’ex xkomonex li k’eeb’ileb’ we xb’aan li Yuwa’b’ej;

42 Ut maajun xkomoneb’ li k’eeb’ileb’ we xb’aan li Yuwa’b’ej taasachq.

43 Ut li Yuwa’b’ej ut laa’in junajo. Laa’in wankin rik’in li Yuwa’b’ej ut li Yuwa’b’ej wik’in laa’in; ut a’ yaal jo’ xineek’ul, laa’ex wankex wik’in ut laa’in eerik’in.

44 Jo’kan ut, laa’in wankin sa’ eeyi, ut laa’in li chaab’il aj ilol karneer, ut li pek re Israel. Ani nakab’lak sa’ xb’een li saqoonaq a’in maajo’q’e taat’ane’q.

45 Ut taachalq xkutankil naq teerab’i xyaab’ inkux ut tineeril, ut teenaw naq wankin.

46 Chexyo’leq ut, re naq kawresinb’ilaqex. Chi jo’kan. Amen.