1 Faauta, ua faapea ona fetalai mai o le Alii i toeaina o e ua ia valaaulia ma filifilia i aso nei e gata ai, i le siufofoga o lona Agaga—

2 Ua fetalai mai: O A’u, o le Alii, o le a faailoa atu ia te outou mea ua Ou loto ia outou faia mai le taimi nei seia oo atu i le konafesi e sosoo ai, lea o le a faia i Misuri, i luga o le laueleele o le a Ou faapaiaina mo lo’u nuu, o e o se vaega o totoe o Iakopo, ma i latou o e o suli e tusa ma le feagaiga.

3 O le mea lea, e moni Ou te fai atu ia te outou, ia tuu atu i a’u auauna o Iosefa Samita, Le Itiiti, ma Sini Rikitone, e alu la laua malaga i le taimi lava e mafai ona faia ai o ni sauniuniga e tuua ai o laua aiga, ma malaga atu i le laueleele o Misuri.

4 Ma e tusa ai ma lo la faamaoni ia te a’u, o le a faailoa atu ia te i laua mea la te faia;

5 Ma o le a faailoa atu foi, ia te i laua, e tusa ai ma lo la faamaoni, o le laueleele o lo laua tofi.

6 Ma e tusa ai ma lo laua lē faamaoni, o le a vavae ese i laua, e pei lava ona Ou loto i ai, e pei ona lelei ia te a’u.

7 O lenei foi, e moni Ou te fai atu ia te outou, ia tuu atu i la’u auauna o Laimani Uaite ma la’u auauna o Ioane Corrill, ia alu vave la laua malaga;

8 Ma o la’u auauna foi o Ioane Murdock, ma la’u auauna o Ailama Samita, ia alu la laua malaga i le nofoaga lava lena e tasi e ui atu i Detroit.

9 Ma ia tuu i laua e malaga mai iina ma talai atu le afioga i le ala, ia lē fai atu ni isi lava mea nai lo mea ua tusia e perofeta ma aposetolo, ma mea e aoao atu ia te i laua e le Fesoasoani e ala i le tatalo o le faatuatua.

10 Ia tuu atu ia te i latou e o taitoalua, ma ia faapea ona tuu atu ia te i latou e talai atu i le ala i faapotopotoga uma, ma papatiso atu i le vai, ma le faaee atu o lima i tafatafa o le vai.

11 Ona ua faapea ona fetalai mai o le Alii, o le a Ou faapuupuuina la’u galuega i le amiotonu, ona e oo mai aso o le a Ou auina atu ai le faamasinoga mo le manumalo.

12 Ma tuu atu i la’u auauna o Laimani Uaite ia faaeteete, ona e manao Satani e lūlū o ia e pei o le aputi.

13 Ma faauta, o ia o lē e faamaoni o le a faia o ia ma pule i mea e tele.

14 O lenei foi, o le a Ou tuu atu ia te outou se ata i mea uma, ina ia lē faaseseina outou; ona ua i ai Satani i le salafa o le laueleele, ma ua fealuai o ia e faasese i atunuu—

15 O le mea lea, o ia o lē e tatalo, o lē ua salamo lona agaga, o ia lava lea Ou te talia pe afai e usiusitai o ia i a’u sauniga.

16 O ia o lē e tautala atu, o lē ua salamo lona agaga, o lē o lana gagana e agamalu ma faagaeetia, o ia lava lea ua mai le Atua pe afai e usiusitai o ia i a’u sauniga.

17 O lenei foi, o ia o lē e gatete i lalo o lo’u mana o le a faamalosia, o le a ia aumai fua o le viiga ma le poto, e tusa ma faaaliga ma upumoni ua Ou tuu atu ia te outou.

18 O lenei foi, o ia o lē ua toilalo ma ua lē aumaia ni fua, e tusa lava ma lenei mamanu, ua lē a a’u o ia.

19 O le mea lea, o le faatusa lenei tou te iloa ai agaga i tulaga uma i lalo o le lagi atoa.

20 Ma ua oo mai aso; e tusa ai ma le faatuatua o tagata o le a faapea lava ona faia ia te i latou.

21 Faauta, ua tuu atu lenei poloaiga i toeaina uma o e ua Ou filifilia.

22 O lenei foi, e moni Ou te fai atu ia te outou, ia tuu atu i la’u auauna o Thomas B. Marsh ma la’u auauna o Ezra Thayre, e alu foi la laua malaga, ma talai atu le upu i le ala i lea lava laueleele.

23 O lenei foi, ia tuu atu i la’u auauna o Isaako Morley ma la’u auauna o Ezra Booth e alu la laua malaga, ma talai atu foi le afioga i le ala i lea lava laueleele.

24 O lenei foi, ia tuu atu i a’u auauna o Eteuati Paterika ma Matini Harisi e alu la laua malaga faatasi ma a’u auauna o Sini Rikitone ma Iosefa Samita, Le Itiiti.

25 Ia tuu atu i a’u auauna o Tavita Uitimera ma Harvey Whitlock e alu foi la laua malaga, ma talai atu i le ala i lea lava laueleele.

26 Ma ia tuu atu i a’u auauna o Parley P. Pratt ma Orson Pratt e alu la laua malaga, ma talai atu i le ala, i lea lava laueleele.

27 Ma ia tuu atu foi i a’u auauna o Solomona Hancock ma Simeona Kata e alu la laua malaga i lea lava laueleele, ma talai atu i le ala.

28 Tuu atu foi i a’u auauna o Edson Fuller ma Jacob Scott e alu la laua malaga.

29 Tuu atu foi i a’u auauna o Levi W. Hancock ma Zebedee Coltrin e alu la laua malaga.

30 Tuu atu foi i a’u auauna o Reynolds Cahoon ma Samuelu H. Samita e alu la laua malaga.

31 Tuu atu foi i a’u auauna o Wheeler Baldwin ma Viliamu Kata e alu la laua malaga.

32 Ma tuu atu i a’u auauna o Newel Knight ma Selah J. Griffin ia faauuina i laua uma, ma alu foi la laua malaga.

33 Ioe, e moni Ou te fai atu, ia tuu atu ia te i latou uma nei e o a latou malaga i le nofoaga e tasi, i o latou ala eseese, ma ia lē ati a’e le tasi tagata i luga o le faavae o le isi, pe malaga i le ala o le isi.

34 O ia o lē e faamaoni, o ia lea o le a tausia ma faamanuiaina i fua e tele.

35 O lenei foi, Ou te fai atu ia te outou, ia tuu atu i a’u auauna o Iosefa Wakefield ma Solomona Humphrey e alu la laua malaga i laueleele i sasae;

36 Ia tuu atu ia te i laua e galulue i o laua aiga, ia lē talai atu ni isi lava mea nai lo o perofeta ma aposetolo, o mea ua la vaaia ma faalogoina ma talitonu moni i ai, ina ia faataunuuina valoaga.

37 Ona o le solitulafono, ia tuu le mea na faaee i luga o Heman Basset ia aveesea mai ia te ia, ma tuuina i luga o le ulu o Simonds Ryder.

38 O lenei foi, e moni Ou te fai atu ia te outou, ia faauuina Iareto Kata o se ositaulaga, ma ia faauuina foi Siaosi James o se ositaulaga.

39 Ia tuu atu i le vaega o totoe o toeaina e leoleo i aulotu, ma talai atu ana afioga i nofoaga o faataamilo ia te i latou; ma ia tuu atu ia te i latou e galulue i o latou lava lima ina ia lē i ai se ifo i tupua po o se amioleaga e faia.

40 Ma ia manatua i mea uma e ua matitiva ma e ua lē tagolima, e ua mama’i ma e ua puapuagatia, ona o ia o lē na te lē faia ia mea, o ia lava lea e lē o so’u soo.

41 O lenei foi, ia tuu atu i a’u auauna o Iosefa Samita, Le Itiiti, ma Sini Rikitone ma Eteuati Paterika, ia latou ave faatasi ma i latou se tusi faamaonia mai le ekalesia. Ma ia i ai foi se tusi faamaonia e maua mo la’u auauna o Oliva Kaotui.

42 Ma e faapea, e pei lava ona Ou fai atu ai, afai tou te faamaoni o le a outou faapotopoto faatasi outou lava e olioli i luga o le laueleele o Misuri, le laueleele lea o lo outou tofi, lea o loo avea nei ma laueleele o outou fili.

43 Ae, faauta, o A’u, o le Alii, o le a faanatinatia le aai i lona taimi, ma o le a faapaleina ē e faamaoni i le olioli ma le fiafia.

44 Faauta, o A’u o Iesu Keriso, le Atalii o le Atua, ma o le a Ou siitia a’e i latou i luga i le aso gataaga. E faapea lava. Amene.