Wase 62
Na ivakatakila sa soli yani mai vei Josefa Simici na Parofita, ena bati ni uciwai na Misuri, mai Seritoni, Misuri ena 13 ni Okosita, 1831. Era a sota ena siga ko ya na Parofita kei rau na nona ivukevuke ka ra lako tiko mai Inidipenideni ki Katiladi, kei ira na italatala qase era lako tiko ki na vanua ko Saioni, era sa veimarautaki oti qai vakatakilai vua na veika oqo.
1–3, Sa volai mai lomalagi na nomudou ivakadinadina; 4–9, Me ra lako ka vunau yani na italatala qase ena sala era sa digia, me vaka na vakatulewa kei na veivakauqeti ni Yalo.
1 Dou vakatudaliga ka vakarorogo mai na italatala qase ni noqu lotu, sa kaya na Turaga na nomudou Kalou, io ko Jisu Karisito na nomudou dautataro, sa kila ko koya na malumalumu ni tamata, kei na sala me vukei ira kina era sa temaki.
2 Ia na mataqu sa wanonovi ira vakaidina tiko na noqu tamata era sa bera ni lako ki na vanua ko Saioni; o koya sa bera ni vakacavari kina na nomudou itavi.
3 Ia dou sa kalougata koi kemudou, ni sa volai mai lomalagi na nomudou ivakadinadina me ra dikeva na agilosi; io era sa rekitaki kemudou ka sa vosoti na nomudou ivalavala ca.
4 Mo dou ia tiko ga yani ena nomudou ilakolako. Ia mo dou la’ki soqoni vata ki na vanua ko Saioni; io me vakayacori na nomudou soqoni ka mo dou vakavinavinaka vata ka cabora na sakaramede vei Koya sa Cecere Sara.
5 Mo dou qai lesu ka vunau voli, io mo dou qai lewa, mo dou lako vata yani se lakolako yarua, sa vakatau ga vei kemudou; ia mo dou yalodina tiko ga ka vunautaka yani na itukutuku rekitaki vei ira na lewei vuravura, se vei ira na tamata ivalavala ca.
6 Raica koi Au na Turaga, au sa soqoni kemudou vata mai me vakayacori kina na vosa ni yalayala, ia ko koya sa yalodina tiko ga vei kemudou, ena maroroi me ra la’ki marau vata ena vanua ko Misuri. Ia koi Au na Turaga au sa yalataka vakaidina na veika oqo vei ira na tamata yalododonu, ka’u sega ni dau lasu.
7 Ia, koi Au na Turaga au na vakatara, kevaka dou gadreva mo dou vodo ena ose, se vodo ena meuli se ena qiqi, ka dou na vakalougatataki kina, io kevaka dou sa vakavinavinakataka ena yalodina vua na liga ni Turaga na veika kecega sa soli vei kemudou.
8 Raica sa tukuni vei kemudou na ivakaro oqo, ia sa vakatau ga ki na nomudou vakatulewa kei na veivakauqeti ni Yalo.
9 Au sa solia vei kemudou na matanitu. Raica au na tiko ga kei ira sa yalododonu me tawamudu. Io ena yaco vakakina. Emeni.