1 Faauta, ua faapea ona fetalai mai o le Alii lo outou Atua ia te outou, e outou e toeaina o la’u ekalesia, ia outou faalogo mai ma lagona, ma talia lo’u loto e faatatau ia te outou.

2 Aua e moni Ou te fai atu ia te outou, Ou te loto ia outou manumalo i le lalolagi; o le mea lea o le a i ai lo’u agaalofa i luga o outou.

3 E i ai ni isi o i latou o e o i totonu o outou ua agasala; ae e moni Ou te fai atu, i le taimi e tasi lenei, mo lo’u lava mamalu, ma mo le faaolataga o agaga, ua Ou faamagaloina outou ia outou agasala.

4 O le a Ou alofa mutimutivale ia te outou, ona ua Ou tuu atu ia te outou le malo.

5 Ma o ki o mealilo o le malo, e ala i auala ua Ou tofia, o le a lē aveesea mai la’u auauna o Iosefa Samita, Le Itiiti, a’o soifua o ia, e tusa ai ma lona usitaia o a’u sauniga.

6 Ua i ai ni isi o i latou o e ua latou saili ni mea e faasaga ia te ia e aunoa ma se pogai;

7 Ae ui i lea, sa agasala o ia; ae e moni Ou te fai atu ia te outou, o A’u, o le Alii, Ou te faamagaloina agasala a i latou o e e ta’uta’u mai a latou agasala i o’u luma ma ole mai mo se faamagaloga, o e ia e lei agasala i le oti.

8 O o’u soo, i aso anamua, sa latou saili ni mea e faasaga i le tasi ma lē faamagalo i le isi i o latou loto; ma o lenei mea leaga na faapuapuagatia ma aoai mamafa tele ai i latou.

9 O le mea lea, Ou te fai atu ai ia te outou, e tatau ona outou faamagalo i le tasi; ona o ia o lē e lē faamagalo atu i lona uso i ana agasala, e tu ta’usalaina o ia i luma o le Alii; aua e tumau ia te ia le agasala tele atu.

10 O A’u, o le Alii, Ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma.

11 Ma e tatau ona outou fai ifo i o outou loto—ia tuu i le Atua e faamasino i le va o a’u ma oe, ma taui ia te oe e tusa ma au galuega.

12 Ma o ia o lē e lē salamo i ana agasala, ma lē ta’uta’u atu i latou, ia outou aumai i luma o le ekalesia, ma fai ia te ia e pei ona fai mai tusitusiga paia ia te outou, pe ala i le poloaiga po o i le faaaliga.

13 Ma ia outou faia lenei mea ina ia faamamaluina ai le Atua—e lē ona ua outou lē faamagalo atu, ona ua leai so outou agaalofa, ae ina ia mafai ona ta’uamiotonu ai outou e tusa ai ma le tulafono, ina ia outou lē faatausuai ai ia te ia o lē o lo outou faitulafono—

14 E moni Ou te fai atu, o le pogai lenei ia outou faia ai ia mea.

15 Faauta, o A’u, o le Alii, sa Ou ita ia te ia o lē sa avea ma a’u auauna, o Ezra Booth, ma la’u auauna foi o Isaako Morley, ona sa laua lē tausia le tulafono, po o le poloaiga;

16 Sa laua saili le leaga i o laua loto, ma o A’u, o le Alii, na taofia lo’u Agaga. Sa laua ta’u ua leaga lena mea sa leai se leaga na i ai; ae ui i lea, ua Ou faamagaloina la’u auauna o Isaako Morley.

17 Ma o la’u auauna foi o Eteuati Paterika, faauta, ua agasala o ia, ma ua saili Satani e faaumatia lona agaga; ae a faailoa atu nei mea ia te i latou, ma latou salamo ai i le leaga, o le a faamagaloina i latou.

18 Ma o lenei, e moni Ou te fai atu ua tatau ai ia te a’u ona toe foi atu o la’u auauna o Sini Gilbert, pe a mavae ni nai vaiaso, i lana pisinisi, ma i lona tofi o le sui i le laueleele o Siona;

19 Ma o mea na vaai ma faalogo i ai o ia e mafai ona faailoa atu i o’u soo, ina ia lē fano i latou. Ma o le pogai lenei ua Ou tautala atu ai i nei mea.

20 O lenei foi, Ou te fai atu ia te outou, ina ia lē faaosoosoina la’u auauna o Isaako Morley e sili atu i luga o le mea e mafai ona ia gafatia, ma fautua sese atu ai i mea tou te tiga ai, na Ou tuu atu ai le poloaiga e tatau ona faatau atu lana faatoaga.

21 Ou te lē loto ia faatau atu e la’u auauna o Feterika G. Viliamu lana faatoaga, ona o A’u, o le Alii, Ou te loto ia i ai pea se taofiga malosi i le laueleele o Katelani, mo le va o le lima tausaga, lea o le a Ou lē faatoilaloina ai e ua amioleaga, ina ia mafai ona Ou faaolaina ai ni isi.

22 Ma a mavae lena aso, o A’u, o le Alii, o le a lē ta’usalaina soo se tasi e alu a’e ma le loto matala i le laueleele o Siona; ona o A’u, o le Alii, Ou te manaomia loto o le fanauga a tagata.

23 Faauta, ua ta’ua nei o le asō seia oo i le afio mai o le Atalii o le Tagata, ma e moni o se aso o le taulaga, ma o se aso mo le totogiina o le sefuluai e lo’u nuu; ona o ia o lē ua totogi le sefuluai o le a lē mu i lona afio mai.

24 Aua a mavae le aso o le a oo mai le mu—o le faamatalaga lenei e tusa ma le ala a le Alii—aua e moni Ou te fai atu, o taeao, o le a faapei o tagutugutu o saito i latou uma ua faamaualuluga ma i latou o e ua fai amioleaga; ma o le a Ou susunuina i latou, aua o A’u o le Alii o ‘Au; ma o le a Ou lē faasaoina soo se tasi e tumau i Papelonia.

25 O le mea lea, afai tou te talitonu mai ia te A’u, o le a outou galulue manū o ta’ua o le asō.

26 Ma ua lē o se mea tatau i a’u auauna, o Newel K. Whitney ma Sini Gilbert, ona faatau atu lo la’ua faleoloa ma a la’ua mea ua maua, iinei; ona ua lē poto lena mea seia o a’e i le laueleele o Siona e o totoe o le ekalesia, o loo tumau pea i le nofoaga lenei.

27 Faauta, ua fai mai i a’u tulafono, pe ua faasaina, le ’aitalafu i o outou fili;

28 Ae faauta, ua lē o fai mai i soo se taimi e faapea e lē tatau i le Alii ona ia ave pe a ia finagalo i ai, ma totogi atu e pei ona lelei ia te ia.

29 O le mea lea, ona o oulua o sui, ua oulua o atu i le feau a le Alii; ma o soo se mea lua te faia e tusa ma le finagalo o le Alii o le matafaioi lea a le Alii.

30 Ma ua ia faatutuina oulua e saunia mea mo lana au paia i aso nei e gata ai, ina ia mafai ona latou maua se tofi i le laueleele o Siona.

31 Ma faauta, o A’u, o le Alii, Ou te tautino atu ia te oulua, ma o a’u upu e mautinoa ma e lē i’uvale, o le a latou maua lava.

32 Peitai o le a oo mai mea uma i lo latou taimi.

33 O le mea lea, aua le faavaivai i le faia o mea lelei, ona o lo o oulua faataatiaina le faavae o se galuega tele. Ma e maimea iti e tutupu mai ai mea tetele.

34 Faauta, e manaomia e le Alii le loto ma le mafaufau malie; ma o e e loto malilie ma usiusitai o le a aai i le lelei o le laueleele o Siona i aso nei e gata ai.

35 Ma o e e fouvale o le a vavae ese mai le laueleele o Siona, ma o le a auina ese atu, ma o le a lē mautofi i le laueleele.

36 Aua, e moni Ou te fai atu o e e fouvale ua lē mai le toto o Efaraima, o le mea lea o le a aveeseina ai i latou.

37 Faauta, o A’u, o le Alii, ua Ou faia la’u ekalesia i aso nei e gata ai e faapei o se faamasino o loo nofo i luga o se mauga, po o se nofoaga maualuga, e faamasino atunuu.

38 Aua o le a oo mai o e o aumau i Siona o le a faamasino i mea uma e faatatau ia Siona.

39 Ma o e e pepelo ma faatagālelei o le a faamaonia e i latou, ma o i latou o e e lē o ni aposetolo ma perofeta o le a iloa.

40 Ma e oo i le epikopo, o lē o se faamasino, ma ona fesoasoani, afai latou te lē faamaoni ia latou matafaioi o le a tausalaina, ma o le a tuu isi i o latou tulaga.

41 Aua, faauta, Ou te fai atu ia te outou o le a tupu olaola Siona, ma o le a i ona luga le mamalu o le Alii;

42 Ma o le a avea o ia o se tagavai i le nuu, ma o le a o mai ia te ia tagata mai atunuu uma o i lalo o le lagi.

43 Ma e oo mai le aso o le a gatete ai atunuu uma o le lalolagi ona o ia, ma o le a matata’u ona o ona tagata matautia. Ua fetalai mai ai le Alii. Amene.