1 Dou vakatudaliga, ka rogoca, e dua na domo, me vaka e dua sa talai sobu mai cake sara, ko koya sa kaukauwa ka qaqa, na nona lako yani ena yacova na iyalayala kei vuravura, io, na domona sa baleta na tamata—Dou caramaka na sala ni Turaga, ka vakadodonutaka na nona salatu.

2 Sa soli na idola ni matanitu ni Kalou vua na tamata e vuravura, ia mai kea ena qai tete yani na kosipeli me yacova na iyalayala kei vuravura, me vaka na vatu sa kavida mai na ulunivanua ka sa sega ni ta ena liga, io ena roboti vuravura taucoko.

3 Io, e dua na domo sa kacikaci—Dou caramaka na sala ni Turaga, dou vakarautaka na ivakayakavi ni Lami, vakarautaka na nona yaco mai na Tagane sa qai Vakawati.

4 Dou masu vua na Turaga, dou masuta na yacana tabu, io mo dou tukuna yani na nona cakacaka e veivakurabuitaki vei ira na tamata.

5 Dou masuta vua na Turaga, me toso tiko ga na nona matanitu e vuravura, me ra ciqoma ko ira na tamata, ka ra vakarautaki ira ki na siga ena qai yaco mai, io na siga ka na lako sobu kina mai lomalagi na Luve ni Tamata, ka vakaisulu ena iserau ni nona lagilagi, me sota kina kei na matanitu ni Kalou sa tauyavutaki e vuravura.

6 O koya, me toso tikoga na matanitu ni Kalou, me qai yaco mai kina na matanitu vakalomalagi, io mo ni vakalagilagi kina na Kalou, mai lomalagi kei vuravura, ia me ra vakamalumalumutaki na nomuni meca; raica sa nomuni tiko ga na vakarokoroko kei na kaukauwa, kei na lagilagi, me sega ni mudu ka sega ni mudu. Emeni.