Jekjōn 66
Revelesōn letok kōn Josep Smith Rikanaan eo, ilo Hiram, Ohio, Oktoba 29, 1831. William E. McLellin eaar kajjitōk ippān Irooj ilo ittino bwe En kwaļo̧k ļo̧k n̄an e kōn Rikanaan eo uwaak in ļaļem kajjitōk, ko me Josep Smith ekar jaje kaki. Jān kajjitōk in an McLellin, Rikanaan eo ekar kajjitōk jān Irooj im ekar bōk revelesōn in.
1–4, Bujen eo ejjeļo̧k jem̧ļo̧kin ej tarlep in gospel eo; 5–8, Elder ro ren kwaļo̧k naan, kam̧ool, im pepe ippān armej raņ; 9–13, Niknik ilo jerbal in rikwaļo̧k naan ej kadedeļo̧k kallim̧ur in jolōt e mour indeeo.
1 Lo, āindein Irooj ej ba n̄an rikarejera William E. McLellin—Kwo jeraam̧m̧an, toun wōt am kar eļļo̧k jān nana ko am, im kar bōki m̧ool ko Aō, Irooj am Ripinmuur ej ba, Rilo̧mo̧o̧r eo an laļ, em̧ool an jon̄an wōt ro rej lōke ioon Eta.
2 Em̧ool Ij ba n̄an eok, kwo jeraam̧m̧an kōn am bōk bujen eo ejjeļo̧k jem̧ļo̧kin Aō, em̧ool tarlep in gospel eo Aō, kar jilkinļo̧k n̄an ro nejin armej raņ, bwe ren maron̄ mour im ribōk aiboojoj ko me rej itōn waļo̧k ilo raan kein āliktata, āinwōt ekar jeje jān rikanaan ro im rijjilōk ro ilo raan ko etto.
3 Em̧ool Ij ba n̄an eok, rikarejera William, bwe kwo erreo, ak ej jab aolep; ukeļo̧k, kōn menin, jān aolep men ko me rej jab em̧m̧an ilo Meja, Irooj ej ba, bwe Irooj enaaj kwaļo̧ki n̄an eok.
4 Im kiiō, em̧ool, N̄a, Irooj, Inaaj kwaļo̧k n̄an eok ta Ikōņaan kōn kwe, ak ta ej Ankilaō kōn kwe.
5 Lo, em̧ool Ij ba n̄an eok, bwe ej Ankilaō bwe kwōn kabun̄bun̄ļo̧k gospel eo Aō jān āne n̄an āne, im jān jikin kwelo̧k n̄an jikin kwelo̧k, aaet, ilo jikin ko ipeļaakin ijin ijoko im jan̄in kar kabun̄bun̄ļo̧k e ie.
6 Jab pād elōn̄ raan ko ilo jikin in; jab kijōr in wanlōn̄ļo̧k n̄an āneen Zaion; ak jon̄an wōt am maron̄ jilkinļo̧k, jilkinļo̧k; eļan̄n̄e jaab, jab ļōmņak kōn men ko mweiōm.
7 Etal n̄an bukwōn ko irear, kwaļo̧k naan in kam̧ool ilo jikin otemjej, n̄an armej otemjej im ilo im̧ōn jar ko aer, pepe ippān armej raņ.
8 Kōtļo̧k rikarejera Samuel H. Smith bwe en etal ippam̧, im jab eļļo̧k jān e, im leļo̧k n̄an e naan in tōl ko am; im e eo ej tiljek naaj kōkajoorļo̧k ilo jikin otemjej; im N̄a, Irooj, Inaaj etal ippam̧.
9 Likūt pā ko peim ioon ro rinan̄inmej, im renaaj bar mour. Jab bar ro̧o̧l m̧ae N̄a, Irooj, Inaaj jilkinļo̧k eok. Kwōn kōmmaanwa ilo en̄taan. Kajjitōk, im kwo naaj bōk; kaļļaļļaļ, im enaaj peļļo̧k n̄an eok.
10 Kappukot jaab n̄an eddo. eļļo̧k jān aolep jab weeppān. Kwōn jab lōn̄—kapo eo me kake kwo kar inepata.
11 Kōjparoki kien kein, bwe rem̧ool im retiljek; im kwōn kōļapļo̧k opij eo am, im iuuni elōn̄ armej n̄an Zaion kōn al ko in m̧ōņōņō ejjeļo̧k jem̧ļo̧kin ioon bōraer.
12 Wōnm̧aanļo̧k wōt ilo men kein em̧ool n̄an jem̧ļo̧kin, im kwe enaaj wōr juon am kūrawūn in mour indeeo ilo anbwijmaron̄ in Jema, eo eobrak kōn jouj im m̧ool.
13 Em̧ool, āindein Irooj am Anij ej ba, am Ripinmuur, em̧ool Jisōs Kraist. Amen.