Jekjōn 67
Revelesōn letok kōn Josep Smith Rikanaan eo, ilo Hiram, Ohio, im̧aaninļo̧k Nobōm̧ba 1831 eo. Tōre in ekar ilo iien kōm̧m̧ane juon kwelo̧k ejenolo̧k, im likūt revelesōn ko ilo bok ekar dedeļo̧k kar bōke jān Irooj kōn Rikanaan eo kar watōke im kar kōm̧m̧ane (lale kōm̧eļeļe ko ijōbbōran jekjōn 1). William W. Phelps ekar kajutak jikin kōm̧m̧an bok eo an Kabun̄ jet raan rar jab to jān tōrre in ilo Independence, Missouri. Kwelo̧k eo ekar pepe n̄an likit ilo bok revelesōn ko ilo juon bok etan Book of Commandments (Bok in Kien Ko) im n̄an kōm̧m̧ane 10,000 malen (ko me kōn kar jet kaban̄ban̄ rekar jab loi tokālik rekar kadikļo̧k n̄an 3,000 malen). Elōn̄ ian em̧m̧aan ro rekar kwaļo̧k naan in kam̧ool ko ke revelesōn kein kar kobaiki n̄an likūti ilo bok rekar kanooj m̧ool, āinwōt kar kam̧oole jān Jetōb Kwōjarjar eo kar lutōkleplep ioer. Bwebwenato an Josep Smith ej ļo̧o̧k e bwe ālikin kar bōk e revelesōn eo kar jeļā kake bwe ej jekjōn 1, jet naan ko rekar waļo̧k kōn jekjek in kajin eo kōjerbale ilo revelesōn kein. Revelesōn in eaar ļoore men in.
1–3, Irooj ej ron̄ jar ko im lale elder ro An; 4–9, Ej ba eo emālōtlōt tata en m̧ōk kōm̧m̧ane juon malen in jidik in wōt revelesōn ko An; 10–14, Elder ro retiljek Jetōb enaaj kōmour er im renaaj lo turin mejān Anij.
1 Lo im eo̧ron̄, O kom̧ elder ro an kabun̄ eo Aō, ro rekar kuktok er ippān doon, ro jar ko aer Iaar ron̄jaki, im ro burueer I jeļā, im ro ikdeelel ko aer rekar wanlōn̄tak Im̧aō.
2 Lo im lo, Meja rej pād ioomi, im lan̄ ko im laļ rej ilo pā ko Peiū, im m̧weiie ko an indeeo rej Aō n̄an liwōj.
3 Kom̧ ar kajjion̄ in tōmak bwe kom̧in bōk kōjeraam̧m̧an eo me kar ajewaj n̄an kom̧; ak lo, em̧ool Ij ba n̄an kom̧ bwe ekar wōr mijak ko ilo būruōmi, im em̧ool en̄in ej un eo kom̧ ar jab bōk.
4 Im kiiō N̄a, Irooj, Ij lewōj n̄an kom̧ juon naan in kam̧ool kōn m̧ool eo an kien kein ko rej erļo̧k imami.
5 Mājāmi rekar pād ioon rikarejera Josep Smith, Jun., im kajin eo an kom̧ ar jeļā kake, im jab weeppān ko an kom̧ ar jeļā kaki; im kom̧ ar kappukot ilo būruōmi jeļāļo̧kjeņ bwe kom̧in maron̄ kōmmeļeļe ilōn̄in kajin eo an; men in kom̧ barāinwōt jeļā.
6 Kiiō, kom̧in kappukot jān Book of Commandments (Bok in Kien Ko), em̧ool men eo ediktata ilubwiljier, im jitōn̄ eo emālōtlōt tata ilubwiljimi;
7 Ak, eļan̄n̄e ewōr jabdewōt ilubwiljimi enaaj kōm̧m̧ane juon āinwōt e, innām kom̧ij jim̧we ilo ba bwe kom̧ij jab jeļā bwe rem̧ool;
8 Ak eļan̄n̄e kom̧ij jab maron̄ kōm̧m̧ane juon āinwōt e, kom̧ij pād ium̧win liaakeļo̧k eļan̄n̄e kom̧ij jab kam̧ool ilo jeje bwe rem̧ool.
9 Bwe kom̧ jeļā bwe ejjeļo̧k jab weeppān ilo er, im bwe men eo eweeppān ej wanlaļtak jān lan̄, jān Jemān meram ko.
10 Im bar juon alen, em̧ool Ij ba n̄an kom̧ bwe e ej ami utiej, im juon kallim̧ur Ij lewōj n̄an kom̧ ro em̧ōj kar aer ekkapit n̄an jerbal in, bwe toun wōt ami utūkļo̧k jān kom̧ ebbanban ko im mijak ko, im kōttāik kom̧ Im̧aō, bwe kom̧ ejjab bwe ami ettā, ron̄el nuknuk eo naaj kekōle im kom̧ naaj lo Eō im jeļā bwe N̄a ij—jab ippān ļōmņak in juwaļōn̄ļōn̄ im jab kanniōk, ak ippān jetōb.
11 Bwe ejjeļo̧k armej enan̄in kar lo Anij ilo jabdewōt iien ilo kanniōk, ijello̧kun n̄e kōmour e jān Jetōb eo an Anij.
12 Im ejjeļo̧k jabdewōt armej ilo lukkuun paotokin emaron̄ mour ilo im̧aan mejān Anij, barāinwōt jab ekkar n̄an ļōmņak in kanniōk.
13 Kom̧ij jab maron̄ mour im̧aan mejān Anij kiiō, im jab ilo jerbal ko an enjeļ raņ; kōn menin, wōnm̧aanļo̧k wōt ilo kijenmej m̧ae ami weeppān.
14 Jab kōtļo̧k ļōmņak ko ami n̄an bar jālōkļo̧k; im n̄e kom̧ij tōllo̧ke, ilo iien eo Aō make, kom̧ naaj lo im jeļā men eo me kar likūt ioomi jān pā ko pein rikarejera Josep Smith, Jun., Amen.