Tasal 6
K’utb’esinb’il na’leb’ k’eeb’il re laj Jose Smith li Profeet ut laj Oliver Cowdery, sa’ Harmony, Pennsylvania, Abril 1829. Laj Oliver Cowdery kixtikib’ lix k’anjel jo’ aj tz’iib’anel sa’ xjaltesinkil ru lix Hu laj Mormon, sa’ 7 Abril, 1829. Ak kixk’ul chaq jun choxahil k’utb’esihom chirix lix yaalalil lix ch’olob’ahom li Profeet chirixeb’ li perel ch’iich’ tz’iib’anb’il wi’ li esil sa’ lix Hu laj Mormon. Li Profeet kipatz’ok chiru li Qaawa’ rik’in li Urim ut Tumim, ut kixk’ul li aatin a’in choq’ xsumenkil ru.
1–6, Eb’ laj k’anjel sa’ li rawimq li Qaawa’ neke’xk’ul li kolb’a-ib’; 7–13, Maajun maatan wan li naq’axok re li maatan re li kolb’a-ib’; 14–27, Nak’utman xyaalal li yaal rik’in lix wankil li Musiq’ej; 28–37, Chex’iloq wan wi’ li Kristo, ut cheb’aanu li chaab’ilal rajlal.
1 Jun nim ut sachb’a-ch’oolejil k’anjel ok re chi k’utmank chiruheb’ li ralal xk’ajoleb’ li winq.
2 K’ehomaq reetal, laa’in li Dios; chek’e eexik rik’in li waatin, li yo’yo ut nim xwankil, q’es wi’chik chiru jun yok’leb’ ch’iich’ ka’pak’al xq’esnal, li najache’ wi’ ru xb’asalil li b’aqelej jo’ ajwi’ li sulutz; jo’kan ut, k’ehomaq eexik rik’in li waatin.
3 K’ehomaq reetal, ak q’an ru li awimq choq’ re q’ole’k; jo’kan ut, ani na’ajok re q’olok, chixch’ik lix setleb’ ch’iich’ rik’in xmetz’ew, ut chiq’oloq naq toj nakana li kutan, re taaruuq chixk’uulankil choq’ re li raam kolb’a-ib’ li junelik nakana, sa’ li rawa’b’ejihom li Dios.
4 Relik chi yaal, yalaq ani taach’ikoq re lix setleb’ ch’iich’ ut taaq’oloq, a’an ajwi’ b’oqb’il xb’aan li Dios.
5 Jo’kan ut, wi textz’aamanq chiwu texk’uluq; wi textoch’oq, taatehe’q cheru.
6 Anajwan, jo’ xextz’aaman, k’ehomaq reetal, ninye eere, chepaab’ lin taqlahom, ut chesik’ xk’eeb’al chi k’utmank ut xxaqab’ankil li k’anjel re Sion;
7 Meesik’ li b’ihomal; xchaab’ilal b’an eena’leb’ chesik’, ut k’ehomaq reetal, lix muqmuukil na’leb’ li Dios taateeliiq cheru, toja’ ut naq texk’ehe’q chi b’ihomo’k. K’ehomaq reetal, b’ihom li ani nak’uluk re li yu’am chi junelik.
8 Chi yaal, chi yaal, ninye aawe, jo’ chanru ajwi’ nakawaj wik’in, jo’kan taa’uxq aawe; ut wi nakawaj, tatwanq choq’ k’anjeleb’aal re xb’aanunkil naab’al li chaab’ilal sa’ li tasal tenamit a’in.
9 Maak’a’ chik chaye, ka’ajwi’ li jalb’a-k’a’uxlej chiru li tasal tenamit a’in; chapaab’ lin taqlahom, ut chattenq’anq chixk’eeb’al chi k’utmank lin k’anjel, jo’ chanru lin taqlahom, ut tat-osob’tesiiq.
10 K’e reetal, wan aawik’in jun maatan, ut osob’tesinb’ilat xb’aan laa maatan. Chijultiko’q aawe naq loq’ a’an, ut taqe’q nachal chaq—
11 Ut wi tatpatz’oq, taanaw li muqmuukil na’leb’ li nim ru ut sachol ch’oolej; jo’kan ut, taak’anjela laa maatan, re naq taaruuq taataweb’ chaq xyaalal li muqmuukil na’leb’, re taaruuq taak’ameb’ naab’al chixnawb’al chirix li yaal, relik chi yaal, taaq’unb’esiheb’ xch’ool chirix li sachk wan wi’ lix b’eheb’.
12 Maak’e chi nawe’k laa maatan chiru anihaq, ka’ajeb’ wi’ li ani xkomoneb’ laa paab’aal. Maab’atz’unle li k’a’aq re ru loq’.
13 Wi taab’aanu li chaab’il, relik chi yaal, ut tatkanaaq chi tiik chi paab’ank toj sa’ roso’jik, tatkole’q sa’ li rawa’b’ejihom li Dios, a’an xnimal ru reheb’ li maatan re li Dios, xb’aan naq maajun maatan wan li naq’axok re li maatan re li kolb’a-ib’.
14 Chi yaal, chi yaal, ninye aawe, osob’tesinb’ilat xb’aan li k’a’ru xab’aanu; xb’aan naq xatpatz’ok wik’in, ut k’e reetal, jo’ k’ihal sut katpatz’ok kak’ul aatzolb’al rik’in inMusiq’. Wi ta ink’a’ jo’kan, ink’a’ raj katchal sa’ li na’ajej wankat wi’ sa’ li hoonal a’in.
15 K’e reetal, nakanaw naq katpatz’ok chiwu ut laa’in kinkutanob’resi aak’a’uxl; ut anajwan ninye aawe li k’a’aq re ru a’in re taaruuq taanaw naq kutanob’resinb’ilat xb’aan li Musiq’ej re li yaal;
16 Relik chi yaal, ninye aawe, re taaruuq taanaw naq maajun chik wan, ka’ajwi’ li Dios, li nanawok re laa k’oxlahom ut li rajom aach’ool.
17 Ninye aawe li k’a’aq re ru a’in jo’ jun xk’utb’al xyaalal chawu—naq li aatin malaj li k’anjel li yookat chixtz’iib’ankil, yaal.
18 Jo’kan ut, chatwanq chi yalb’il aaq’e; xaqab’ aawib’ chixk’atq lin moos aj Jose, chi xaqxo aach’ool, sa’ jo’ k’ihal li ch’a’ajkilal taawanq wi’ a’an sa’ xk’ab’a’ li aatin.
19 Chatij a’an sa’ chixjunil lix majelal, ut jo’kan ajwi’ chak’ul aatijb’al xb’aan a’an. Aj kuyunelaqat; tiikaq aak’a’uxl; aakuyumaq aawib’; chiwanq aawik’in li kuyuk, li paab’aal, li yo’onink, ut li rahok.
20 K’e reetal, laa’at aj Oliver, ut xatwaatina xb’aan laa wajom; jo’kan ut, k’uula li aatin a’in sa’ aach’ool. Chatwanq chi tiik chi paab’ank, ut chi yalb’il aaq’e sa’ xpaab’ankil lix taqlahom li Dios, ut laa’in tatinsuti rik’in li wuq’ aj rahonel.
21 K’e reetal, laa’in li Jesukristo, li Ralal li Dios. Laa’in ajwi’ li kinchal rik’ineb’ li we, ut eb’ li we moko kine’xk’ul ta. Laa’in li saqen li nalemtz’un sa’ q’ojyin, ut li q’ojyin moko naxtaw ta ru.
22 Chi yaal, chi yaal, ninye aawe, wi nakawaj chik xyaalal k’utb’il chawu, b’eresi laa k’a’uxl sa’ li q’ojyin naq kat-elajin chiwu sa’ laa ch’ool, re taaruuq taanaw chirix lix yaalalil li k’a’aq re ru a’in.
23 Ma ink’a’ kinye tuqtuukilal re aak’a’uxl chirix li na’leb’ a’an? K’a’ru xk’utb’al xyaalal naru nakak’ul li naq’axok ta re li nachal chaq rik’in li Dios?
24 Anajwan ut, k’e reetal, kak’ul jun xk’utb’al xyaalal; xb’aan naq wi xinye aawe k’a’ru li maajun winq nanawok re, ma ink’a’ xak’ul jun xk’utb’al xyaalal?
25 Ut k’e reetal, nink’e aawe jun maatan, wi nakawaj wik’in, naq taajaltesi ru aatin, jo’ chanru ajwi’ lin moos aj Jose.
26 Chi yaal, chi yaal, ninye aawe, naq wankeb’ li tz’iib’anb’il esil li wankeb’ wi’ naab’al re lin evangelio, li moko k’eeb’ileb’ ta chaq xb’aan xmaa’usilaleb’ li tenamit.
27 Ut anajwan nakatintaqla, naq wi wan xchaab’ilal aawajom—jun aawajom re xtamresinkil choq’ aawe b’ihomal sa’ choxa—rik’in a’an tattenq’anq sa’ xk’amb’al chi kutankil, rik’in laa maatan, li jar raqal a’an reheb’ lin loq’laj hu li wanjenaq chaq chi muqmu xb’aan li maa’usilal.
28 Ut anajwan, k’e reetal, nink’e aawe, ut re ajwi’ lin moos aj Jose, xlaawil li maatan a’in, li taak’amoq chi kutankil li k’anjelil a’in; ut rik’in xtz’uumaleb’ re wiib’ malaj oxib’ chi aj yehol nawom taaxaqab’amanq xwankil li junjunq chi aatin.
29 Chi yaal, chi yaal, ninye eere, wi neke’xtz’eqtaana li waatin, ut li jun raqal a’in re lin evangelio ut lin k’anjelil, osob’tesinb’ilex laa’ex, xb’aan naq maak’a’ chik naru te’xb’aanu eere chiru li ke’xb’aanu we laa’in.
30 Ut wi neke’xb’aanu eere jo’ chanru ajwi’ ke’xb’aanu we, osob’tesinb’ilex, xb’aan naq texwanq wik’in sa’ loq’alil.
31 Wi b’an ink’a’ neke’xtz’eqtaana li waatin, li taaxaqab’amanq xwankil xb’aan li xyaalalil taach’olob’amanq, osob’tesinb’ileb’, toja’ ut naq taawanq xsahil eech’ool rik’in li ruuchinihom lee k’anjel.
32 Chi yaal, chi yaal, ninye eere, jo’ kinye reheb’ lin tzolom, b’ar wankeb’ wiib’ malaj oxib’ chi ch’utch’u sa’ lin k’ab’a’, chirix jun li na’leb’, aran tinwanq laa’in sa’ xyiheb’—chi jo’kan ajwi’ wankin sa’ eeyi laa’ex.
33 Meexuwa xb’aanunkil li chaab’il, ex walal, xb’aan naq jo’ k’ihal li nekeraw, a’an ajwi’ teeq’ol; jo’kan ut, wi nekeraw li chaab’il teeq’ol ajwi’ li chaab’il choq’ eeq’ajkamunkil.
34 Jo’kan ut, mexxuwak, ex ch’ina teep inkarneer, cheb’aanu li chaab’il; che’xmol rib’ li ruchich’och’ ut li xb’alb’a cheru, xb’aan naq wi kab’lanb’ilex sa’ xb’een insaqoonaq, ink’a’ neke’ru chi numtaak.
35 K’ehomaq reetal, ink’a’ nekexink’e sa’ tojb’a-maak; chapomaq eeb’e ut mexmaakob’ chik; b’aanuhomaq rik’in x’anchalil eek’a’uxl li k’anjel li kexintaqla wi’.
36 Chex’iloq wankin wi’ sa’ li junjunq eek’oxlahom; miwiib’an eech’ool, mexxuwak.
37 K’ehomaq reetal li k’ob’olal kik’ob’e’ wi’ xk’atq insa’, ut jo’kan ajwi’ li reetalil li klawx sa’ li wuq’ ut sa’ li woq; tiikaqex chi paab’ank, chepaab’ lin taqlahom, ut laa’ex teereechani li awa’b’ejihom re choxa. Amen.