1 E dina, e dina au sa kaya vei kemudou, koi Au kau sa vosa mai na domo ni Yaloqu, io na Alifa kei na Omeka, na nomudou Turaga ka nomudou Kalou—

2 Dou vakatudaliga, koi kemudou dou sa vakadonuya mo dou lako yani ka vunautaka na noqu kosipeli, ka samaka na noqu were ni vaini.

3 Raica, au sa kaya vei kemudou ni sa noqu lewa mo dou lako yani ka kakua tale ni lokuyara, dou kakua tale ga ni vakawelewele ia mo dou cakacaka vagumatua sara—

4 Dou tabalaka cake na domomudou me vaka na rorogo ni davui, ka vunautaka yani na dina me vaka na ivakatakila kei na ivakaro au sa solia vei kemudou.

5 Ia oqo, kevaka dou sa yalodina tiko ga ena levu na nomudou ivau sila, ia dou na vakaisalataki ena vakarokoroko kei na lagilagi, kei na tawa mate rawa, kei na bula tawamudu.

6 O koya, au sa kaya vakaidina kina vei Viliame E. Makilelini na noqu tamata, au sa vakasuka na ilesilesi ka’u a lesi koya kina, me lako ki na veivanua mai na tokalau;

7 Ia au sa solia vua e dua na ilesilesi vou kei na ivakaro vou, raica koi Au na Turaga, au sa cudruvi koya ena nona dau vosakudrukudru e lomana;

8 Ka sa ivalavala ca ko koya, ia au sa vosoti koya, ka’u sa kaya tale vua, Mo lako ki na veivanua ena ceva.

9 Me rau lako vata kei Luke Jonesoni na noqu tamata, io me rau vunautaka yani na veika au sa vakarota vei rau—

10 Ia me rau masuta na yaca ni Turaga me solia mai na Dauveivakacegui, io me na vakavulica vei rau na veika sa kilikili me tu vei rau—

11 Me rau daumasu tiko ga me rau kakua ni guce; ena veigauna kece erau kitaka vakakina, au na tiko ga kei rau me yacova na ivakataotioti.

12 Raica, oqo na inaki ni Turaga na nomudrau Kalou ena vukumudrau. Ia ena vakakina. Emeni.

13 Kei na dua tale, sa kaya dina vakaoqo na Turaga, me rau lako ko Osoni Aidi na noqu tamata kei Samuela H. Simici na noqu tamata, ki na veivanua mai na tokalau, ka vunautaka kina na veika au sa vakarota vei rau; ia kevaka erau sa yalodina kina, au na tiko vata kei rau me yacova na ivakataotioti.

14 Kei na dua tale, au sa kaya vakaidina vei Laimeni Jonesoni na noqu tamata, kei Osoni Pereta na noqu tamata, me rau lako talega ena nodrau ilakolako ki na veivanua mai na tokalau; ia raica au na tiko talega vata kei rau, io me yacova na ivakataotioti.

15 Kei na dua tale, au sa kaya vei Asa Dodo na noqu tamata kei Kavusi Wilisoni na noqu tamata, me rau lako talega ena nodrau ilakolako ki na veivanua mai na ra, io me rau vunautaka kina na noqu kosipeli me vaka au sa vakarota vei rau.

16 Ia ko koya sa yalodina ena rawa na ka kecega, io ena laveti cake ena siga mai muri.

17 Kei na dua tale, au sa kaya vei Metia N. Asaeli na noqu tamata kei Buru Riki na noqu tamata, me rau lako talega ena nodrau ilakolako ki na veivanua ena ceva.

18 Io, me ra lako kece ena nodra ilakolako ko ira oqori, me vaka au sa vakarota vei ira, me ra lako mai na dua na vale ki na dua tale na vale, kei na dua na koro ki na dua tale na koro, ka vakakina mai na dua na koro levu ki na dua tale na koro levu.

19 Ia na vale kecega dou sa curu kina ka ra sa ciqomi kemudou, dou qai biuta koto na nomudou veivakalougatataki ena vale ko ya.

20 Ia na vale kecega dou sa curu kina ka ra sega ni ciqomi kemudou, mo dou qai lako tani kusarawa mai na vale oqori, ka kuretaka na kuvu ni soso mai na yavamudou me ra beitaki kina.

21 Ka na vuabale na nomudou reki kei na marau; ka mo dou kila oqo, ena siga ni veilewai dou na qai lewa na vale oqori, ka cudruva;

22 Raica era na vinaka cake na tawa lotu, ena siga ni lewa, mai vei ira na lewe ni vale oqori; o koya mo dou vakadreta na ivau ni tolomudou ka yalodina tiko ga, ka mo dou rawa kina na ka kecega, ka mo dou laveti cake ena siga mai muri. Sa vakakina. Emeni.

23 Kei na dua tale, sa kaya vakaoqo na Turaga vei kemudou, oi kemudou na italatala qase ni noqu lotu, dou sa solia na yacamudou mo dou kila na lomana me baleti kemudou—

24 Raica au sa kaya vei kemudou, sa nona itavi na lotu me vukea na nodra qaravi na nodra matavuvale, ka vakatalega kina na nodra qaravi na nodra matavuvale o ira era sa kacivi ka sa dodonu me ra talai yani ki vuravura me ra vunautaka na kosipeli ki vuravura.

25 O koya, au sa solia kina vei kemudou na ivakaro oqo, koi Au na Turaga, mo dou raica rawa na vanua me ra vakaitikotiko kina na nomudou matavuvale, kevaka era sa lomasoli kina na wekamudou lewenilotu.

26 Ia ko ira kecega era sa kunea na vanua me ra tiko kina na nodra matavuvale, kei na veitokoni ni lotu me baleti ira, me ra lako kusarawa yani ki vuravura; io ki na tokalau se ki na ra, ki na vualiku se ki na ceva.

27 Ia me ra kerekere ka ra na rawata, tukituki ka na dolavi vei ira, ka na qai vakatakilai vei ira mai cake, io mai vua na Dauveivakacegui, na vanua me ra lako kina.

28 Kei na dua tale, au sa kaya vakaidina vei kemudou, ko koya yadua sa dodonu me qarava ga na nona matavuvale, me qarava ga, me kakua kina ni calata na nona isala vakatui; ia me qarava talega na itavi ni lotu.

29 Ia me ra gumatua ena ka kecega na tamata kecega. Ia na tamata vakawelewele sa sega na nona tikina ena lotu, vakavo ga kevaka sa veivutuni ka vakadodonutaka na nona ilakolako.

30 Ia, me rau vakaitavi vata ko Simione Kata na noqu tamata kei Ima Erisi na noqu tamata, ena cakacaka;

31 Ka vakatalega kina ko Esera Tea na noqu tamata kei Tomasi B. Masi na noqu tamata;

32 Ka vakatale ga kina ko Airame Simici na noqu tamata kei Rinoli Kauni na noqu tamata;

33 Ka vakatalega kina ko Taniela Sitenitoni na noqu tamata kei Simo Baranisoni na noqu tamata;

34 Ka vakatalega kina ko Silivesita Simici na noqu tamata kei Kitione Kata na noqu tamata;

35 Ka vakatalega kina ko Rakeli Emesi na noqu tamata kei Sitiveni Baneti na noqu tamata;

36 Ka vakatalega kina ko Maika B. Weletoni na noqu tamata kei Iteni Simici na noqu tamata. Io ena vakakina. Emeni.