Jekjōn 81
Revelesōn letok kōn Josep Smith Rikanaan eo, ilo Hiram, Ohio, M̧aaj 15, 1832. Frederick G. Williams ej kūri bwe en juon pris eutiej im juon rikōkapilōklōk an Priesthood eo Eutiej. Ļo̧o̧k in bwebwenato ko rej kwaļo̧k bwe ke kar bōke revelesōn in ilo M̧aaj 1832, e kar kūr Jesse Gause n̄an opij eo an rikōkapilōklōk n̄an Josep Smith ilo Presidency eo. Ijoke, ke eaar likjab n̄an wōnm̧aanļo̧k ilo wāween eo ejejjet ippān ijjitōn̄ in, kūr eo tokālik kar kōm̧akūti n̄an Frederick G. Williams. Revelesōn in (ļo̧o̧ke ilo M̧aaj 1832) aikuj watōke āinwōt juon bun̄tōn ļo̧k lukkuun ekkar eo an Presidency eo Kein Kajuon, eļaptata ilo kūr n̄an opij eo an rikōkapilōklōk ilo doulul in im kōmmeļeļeik utiej eo an ijjitōn̄ in. Brother Gause eaar jerbal ium̧win jidik iien ak kar bukweļo̧k jān Kabun̄ in ilo Tijem̧ba 1832. Brother Williams eaar ekkapit n̄an opij in kōmlet kake ilo M̧aaj 18, 1833.
1–2, Ki ko an aelōn̄ eo aolep iien Presidency eo Kein Kajuon ej kabwijeri; 3–7, Eļan̄n̄e Frederick G. Williams ej tiljek ilo jerbal in an, enaaj an mour indeeo.
1 Em̧ool, em̧ool, Ij ba n̄an eok rikarejera Frederick G. Williams: Ron̄jake ainikien E eo ej ekkōnono, n̄an naan eo an Irooj am Anij, im eo̧ron̄ kūr in kar kūr eo n̄an e, em̧ool n̄an juon pris eutiej ilo kabun̄ eo Aō, im juon rikōkapilōklōk n̄an rikarejera Josep Smith, Jun.;
2 Eo n̄an e Iaar liļo̧k ki ko an aelōn̄ eo, ko rej aolep iien an Presidency eo an Priesthood eo Eutiej:
3 Kōn menin, em̧ool Ij kile e im naaj kōjeraam̧m̧ane e, im barāinwōt kwe, toun wōt am tiljek ilo kapilōk, ilo opij eo Iaar jitōn̄ n̄an eok, ilo jar aolep iien, ilo ainikien im ilo būruōm̧, ilo im̧aan armej raņ im ilo make iaam, barāinwōt ilo jerbal eo am ilo kabun̄bun̄ļo̧k gospel eo ilo āneo ro remour, im ilubwiljin ro jeiūm̧ im jatūm.
4 Im ilo kōm̧m̧ani men kein kwo naaj kōm̧m̧an eļap em̧m̧an n̄an armej ro am, im kwo naaj iuunm̧aanļo̧k aiboojoj E eo ej am Irooj.
5 Kōn menin, kwōn niknik; jutak ilo opij eo me Iaar jitōn̄ n̄an eok; rie ro reban, kotak lōn̄ļo̧k pā ko rej allitoto, im kōkajoor bukwe ko rem̧ōjņo̧.
6 Im eļan̄n̄e kwōj niknik n̄an jem̧ļo̧kin kwo naaj bōk juon kūrawūn in jab wabanban, im mour indeeo ilo im̧ōn irooj ko Iaar kōpooji ilo m̧weo im̧ōn Jema.
7 Lo, im lo, Erkein rej naan ko an Alpa im Omega, em̧ool Jisōs Kraist.