Benneg 82
Paltiing a naited ken ni Joseph Smith a Propeta, iti Jackson County, Missouri, idi 26 ti Abril 1832 (History of the Church, 1:267–269). Kangrunaan a taripnong ti Simbaan ti pasken a nakakanunongan ni Joseph Smith a Propeta a Presidente ti Nangato a Kinasaserdote, ti takem a nakaordenanna iti napalabas a taripnong dagiti nangato a saserdote, elder, ken kameng, iti Amherst, Ohio, idi 25 Enero 1832 (kitaen ti paulo ti benneg 75). Iti napalabas naaramat dagiti karkarna a nagan iti pannakaipablaak daytoy a paltiing a pangipalgakan iti kinasiasino dagiti nainaganan a tao (kitaen ti paulo ti benneg 78).
1–4, No adu ti maited, adu met ti kasapulan; 5–7, Agari ti sipnget iti lubong; 8–13, Maragsakan ti Apo no aramidentayo ti ibagana; 14–18, Nasken a mapapintas ken mapasanto pay ti Zion; 19–24, Nasken a tun-oyen ti tunggal tao ti pagsayaatan ti padana a tao.
1 Pudno, pudno, kunak kadakayo, a katulongak, a no la ket napakawanyon ti basol ti tunggal maysa, siak, nga Apo, pakawanenkayo.
2 Nupay kasta, adda kadakayo ti nalabes ti panagbasolna; wen, nagbasolkayo amin; ngem pudno kunak kadakayo, agannadkayo manipud ita, ket liklikanyo ti agbasol, no saan nadagsen a pangngeddeng ti maituon kadagiti uloyo.
3 Ta isu nga adu ti naited adu met ti kasapulan; ket isu a nagbasol iti nabilbileg a lawag umawatto iti nakarkaro a pannakadusa.
4 Umawagkayo iti naganko para kadagiti paltiing, ket itedko ida kadakayo; ket no saanyo a tungpalen dagiti saok, nga itedko kadakayo, agbalinkayo a managbasol; ket ti linteg ken panangukom ti dusa a maikappeng iti paglintegak.
5 Ngarud, ania man ti sawek iti maysa sawek iti amin: Agalibtakkayo, ta isaksaknap ti kabusor ti masakupanna, ket agari ti sipnget;
6 Ket sumged ti pungtot ti Dios a maibusor kadagiti agindeg iti daga; ket awan ti agaramid iti naimbag, ta simmiasi ti amin.
7 Ket ita, pudno kunak kadakayo, siak ti Apo, saankayo a pabasolen; mapankayo iti ayoyo ket saankayon nga agbasol; ngem iti dayta kararua nga agbasol ti pagsublian dagiti sigud a basol, kinuna ti Apo a Diosyo.
8 Ket manen, kunak kadakayo, ikkankayo iti baro a bilin, tapno maawatanyo ti pagayatak maipanggep kadakayo;
9 Wenno, iti sabali a pannao, iwanwankayo no kasano ti panagtignayyo iti sangok, tapno agbalin a pakaisalakananyo.
10 Siak, ti Apo, ikarik nga aramidek ti sawek no agtungpalkayo; ngem no diyo tungpalen ti sawek, awan ti kariyo.
11 Ngarud, pudno kunak kadakayo, a nasken a sangsangkamaysa dagiti katulongak a da Edward Partridge ken Newel K. Whitney, A. Sidney Gilbert ken Sidney Rigdon, ken ti katulongak a ni Joseph Smith, ken ni John Whitmer ken Oliver Cowdery, ken W.W. Phelps ken Martin Harris babaen ti tulag ken katulagan a saan a malabsing babaen ti panagbasol, malaksid no mayetnag a dagus ti panangukom, kadagiti sumagmamano nga agaywan—
12 A mangasikaso iti pagimbagan dagiti nakurapay, ken amin a banag a maipanggep iti kamkameng ti pagobispuan iti man daga ti Zion ken iti daga ti Kirtland;
13 Ta naikkak-pategen ti daga ti Kirtland iti bukodko a panawen para iti pagimbagan dagiti santo ti Kangatuan, ken para iti istaka ti Zion.
14 Ta nasken a mapapintas ti Zion, ken mapasanto; nasken a mapalawa dagiti beddengna; nasken a mapapigsa dagiti istakana; wen, pudno kunak kadakayo, nasken a tumakder ti Zion ken agaruat kadagiti napintas a pagan-anay.
15 Ngarud, itedko daytoy a bilin kadakayo, tapno pagkakappengenyo ti bagbagiyo iti daytoy a katulagan, ket maaramidto a maibatay kadagiti paglintegan ti Apo.
16 Adtoy, nainsiriban met ditoy kaniak para iti pagimbaganyo.
17 Ket agpapataskayo, wenno iti sabali a pannao, addaankayo iti agpapatas a kalintegan kadagitoy a pagsanikuaan, para iti pagimbagan iti panangiwanwan iti pagsayaatan dagiti aywanyo, tunggal tao a maibatay kadagiti kayatna ken kasapulanna, no la ketdi nainkalintegan ti kayatna—
18 Ket amin daytoy para iti pagimbagan ti simbaan ti sibibiag a Dios, tapno mapasayaat ti tunggal tao ti gamengna, tapno makagun-od ti tunggal tao iti sabali a gameng, wen, uray pay iti maminggasut, a maikabil iti pagidulinan ti Apo, tapno agbalin a kukua ti sibubukel a simbaan—
19 Tunggal tao a maseknan iti pagimbagan ti padana a tao, ken mangaramid iti amin a banag a naitalimudok dagiti matana iti dayag ti Dios.
20 Daytoy urnos nga intudingko nga agnanayon nga urnos kadakayo, ken kadagiti sumarsaruno kadakayo, no la ketdi saankayo nga agbasol.
21 Ket ti kararua nga agbasol iti maibusor iti daytoy a katulagan, ken mangpatangken iti pusona a maibusor iti daytoy, makednganto a maibatay kadagiti paglintegan ti simbaanko, ken mayawat a pagrennekan ni Satanas agingga iti aldaw ti pannakasubbot.
22 Ket ita, pudno kunak kadakayo, ket nainsiriban daytoy, makigayyemkayo kadagiti nabaknang iti kinikillo nga aramid, ket saandakayo a dadaelen.
23 Ibatiyo laeng kaniak ti panangukom, ta kukuak ket bayadakto. Adda koma kadakayo ti kappia; agtultuloy ti bendisionko kadakayo.
24 Ta kukuayo pay laeng ti pagarian, ket agnanayonto, no saankayo nga agkamtud iti kinatibkeryo. Pudno a kasta. Amen.