Chikamu 83
Zvakazarurwa zvakapihwa kuburikidza naJoseph Smith Muporofita, paIndependence, Missouri, 30 Kubvumbi 1832 (History of the Church, 1:269–270). Chakazarurwa ichi chakagashirwa Muporofita agere mudare nevamwe vake.
1–4, Madzimai nevana vanekodzero yekutarisa kuvarume nekumadzibaba avo kutsvaka kuriritirwa kwavo; 5–6, Shirikadzi nenherera vanotarisira kuChechi kuti variritirwe.
1 Zvirokwazvo vanodaro Ishe, pamusoro pemitemo yechechi iyi maererano nevakadzi nevana, avo vari muchechi, vakarasikirwa nevarume kana madzibaba:
2 Vakadzi vanekodzero kuvarume vavo yekuchengetwa kwavo, kusvika varume vavo vatorwa; uye kana vasina kubatwa nokutadza vachawana ruwadzano muchechi.
3 Uye kana vasingatendeke, havazove nekuwadzana muchechi; asi vanogona kuramba vari munhaka dzavo maererano nemitemo yenyika.
4 Vose vana vanekodzero kuvabereki vavo yekuriritirwa kusvika vabva zera.
5 Mushure mezvo, vanekodzero kuchechi, kana kuti nemamwe mazwi, pamusoro peimba yekuchengetera yaIshe, kana vabereki vavo vasina chekuvapa senhaka.
6 Uye imba yekuchengetera iyi ichachengetwa nemipiro yechechi; uye shirikadzi nenherera vachariritirwa, nevarombowo. Ameni.