Wase 83
Na veika sa vakatakilai yani mai vei Josefa Simici na Parofita mai Inidipenideni, Misuri, ena 30 ni Epereli, 1832. A ciqomi na ivakatakila oqo ni a bose tiko kei ira na nona itokani na Parofita ena veiliutaki ni lotu.
1–4, Sa tu na dodonu vei ira na yalewa kei na gone vei ira na watidra kei na tamadra ena ka me ra bula kina; 5–6, Sa tu na dodonu vei ira na dawai kei ira na luveniyali ki na Lotu me qaravi ira.
1 Sa kaya vakaidina vakaoqo na Turaga, me ikuri ni lawa ni Lotu, me baleti ira na marama kei na gone, o ira era lewena na lotu, ka ra sa yali na watidra kei na tamadra;
2 Sa tu na dodonu vei ira na marama vua na watidra ena veika ni nodra bula, me yacova na gauna sa mate kina na watidra; ia kevaka era na sega ni kunei ni ra sa dau talaidredre, me ra na tokoni tiko ena loma ni lotu.
3 Ia kevaka era sa sega ni yalodina me ra na kakua ni tokoni tiko mai na lotu; ia e rawa ni ra tiko ga ena nodra ivotavota vakawa me vaka na lawa ni vanua.
4 Na gone kece sa tu vei ira na dodonu vei ira na nodra itubutubu ena veika ni nodra bula me yacova ni ra sa yacova na kena yabaki.
5 Ni sa oti oya, sa tu vei ira na dodonu ki na lotu, se ena dua tale na kena vosa ki na lololo ni Turaga, kevaka sa sega ni rawa vei ira na nodra itubutubu me ra solia vei ira na nodra ivotavota vakawa.
6 Ia me na cicivaki tiko na lololo ena veika era sa vakatabuya ki na lotu na lewena; ka me ra na qaravi kina na dawai kei na luveniyali, ka vakakina ko ira na dravudravua. Emeni.