Chikamu 86
Zvakazarurwa zvakapihwa kuburikidza naJoseph Smith Muporofita, paKirtland, Ohio, 6Â Zvita 1832 (History of the Church, 1:300). Chakazarurwa chino chakatambirwa panguva Muporofita paakanga achidzokorora nekupepeta magwaro ezvinyorwa zvekududzira Bhaibheri.
1–7, Ishe vanopa zvinoreva rungano rwemufananidzo wegorosi nemasawi; 8–11, Vanotsanangura maropafadzo ehupirisita kune avo vagari venhaka vari mumurau, maererano nezvenyama.
1 Zvirokwazvo, vanodaro Ishe kwamuri imi varanda vangu, maererano nerungano rwemufananidzo wegorosi newemasawi:
2 Tarisai, zvirokwazvo ndinoti, munda wakanga uri nyika, uye vaapositori ndivo vakanga vari vadyari vembeu.
3 Uye mushure mekunge varara, mutambudzi mukuru wechechi, uyo akarasika pachitendero, mhombwe, kunyangwe Babironi, iyo inoita kuti marudzi ose anwe mukombe wayo, mumwoyo yavo muvengi, kunyangwe Satani agere achitonga, tarisai anodyara sawi; nokudaro, sawi rinovhunga gorosi uye nokuisa chechi murenje.
4 Asi tarisai, mumazuva ekupedzisira, kunyangwe iye zvino apo Ishe vavekutanga kuunza izwi, uye sora riri kubuda uye richiri dete—
5 Tarisai, zvirokwazvo ndinoti kwamuri, ngirozi dziri kuchema kuna Ishe masikati nehusiku, dziri dzakamirira kutumwa kuti dzizokohwa minda;
6 Asi Ishe vanoti kwavari, musatanhe sawi shizha richiridete (nokuti zvirokwazvo rutendo rwenyu haruna kusimba), potse mungaparadze negorosiwo.
7 Naizvozvo, regai gorosi nesawi zvikure pamwechete kudakara gohwo raibva; ndipo pamuchatanga kuunganidza gorosi kubva kusawi; uye mushure mokuunganidza gorosi, tarisai, uye muone, sawi rinosungwa masvinga, uye munda wosarira kupiswa.
8 Naizvozvo, vanodaro Ishe kwamuri, imi maramba muine hupirisita kuburikidza nemutsetse wedzinza remadzibaba enyu—
9 Nokuti ndimi vagari venhaka vari pamurau, maererano nezvenyama, uye mange makavigwa kunyika naKristu muna Mwari—
10 Naizvozvo upenyu hwenyu nehupirisita hwaramba huripo uye hunofanira kuti huvepo kuburikidza nemi uye nemutsetse wedzinza renyu kudakara kudzorerwa pakare kwezvinhu zvose zvakataurwa nemiromo yevaporofita vatsvene vose kubvira pakutanga kwenyika.
11 Naizvozvo, makaropafadzwa imi kana mukaramba muri mukunaka kwangu, chiedza kuvaJentairi, uye kuburikidza nehupirisita huno, muponesi kuvanhu vangu Israeri. Ishe vazvitaura. Ameni.