1 Amini, hivyo ndivyo asemavyo Bwana kwenu ninyi watumishi wangu, kuhusu mfano wa ngano na magugu:

2 Tazama, amini ninasema, lile konde ni ulimwengu, na mitume walikuwa ni wapanda mbegu;

3 Na baada ya kuwa wamelala mtesaji mkuu wa kanisa, muasi, kahaba, hata Babilonia, yule ayafanyaye mataifa yote kunywa kikombe chake, ambao katika mioyo yao adui, hata Shetani, hukaa na kutawala—tazama yeye ndiye hupanda magugu; kwa hiyo, magugu huikaba ngano na kulifukuzia kanisa nyikani.

4 Lakini tazama, katika siku za mwisho, hata sasa wakati Bwana anapoanza kulileta neno, na jani linapoanza kumea na likiwa bado changa—

5 Tazama, amini ninawaambia, malaika wanamlilia Bwana usiku na mchana, ambao wako tayari na wanasubiri kutumwa ili kuyakata chini makonde;

6 Lakini Bwana huwaambia, msiyangʼoe magugu wakati jani likiwa bado changa (kwani amini imani yenu ni dhaifu), msije mkaharibu na ngano pia.

7 Kwa hiyo, acha ngano na magugu yakue pamoja hadi mavuno yatakapokuwa yameiva kikamilifu; ndipo kwanza mtaikusanya ngano kutoka miongoni mwa magugu, na baada ya kuikusanya ngano, tazama na lo, magugu yamefungwa matita matita, na konde limebaki kwa kuchomwa.

8 Kwa hiyo, hivyo ndivyo asemavyo Bwana kwenu ninyi, ambao ukuhani umedumu kupitia safu ya uzao wa baba zenu—

9 Kwani ninyi ni warithi kisheria, kwa jinsi ya mwili, na mkafichwa kutoka ulimwenguni, pamoja na Kristo katika Mungu—

10 Kwa hiyo maisha yenu na ukuhani vimedumu, na havina budi kudumu kupitia ninyi na safu ya uzao wenu hata zije zama za urejesho wa vitu vyote vilivyonenwa kwa vinywa vya manabii wote watakatifu tokea mwanzo wa ulimwengu.

11 Kwa hiyo, heri ninyi kama mtakaa katika wema wangu, na nuru ya kuwa mwangaza kwa Wayunani, na kupitia ukuhani huu, mwokozi kwa watu wangu, Israeli. Bwana amesema hili. Amina.